修補婚姻裂痕 鄺文珣喜迎第三胎

簡單妻子與複雜丈夫

文珣生於小康之家，自小生活無憂無慮，是一個開心小公主，之後加入TVB成為小花，雖未至於紅透半邊天，但形象入屋得到觀眾愛戴，婚後決定相夫教子淡出娛樂圈；Andrew則經營家族製衣業生意，但從小缺乏愛，且工作上得不到爸爸認同，屢受挫折。文珣坦言兩人的成長背景與性格南轅北轍，生活在一起難免摩擦多，「每對夫妻有問題唔出奇，因為兩個人來自好唔同嘅背景成長，大家性格又唔同，兩個人住埋一齊後，當有事發生就會用上自己慣常方法處理，我哋都一樣，相處時大家都係互相摩擦，好痛苦咁磨。」

超過五年的婚姻問題

有報道指丈夫Andrew患有狂躁症，他藉今次機會澄清沒有患病，因為過去在事業和家庭上的不快，令其性格比較火爆，不懂得控制脾氣。「男士對自己目標好清晰，好想達到目標去滿足自己，當受到挫折或達唔到期望就會有情緒，係我控制得唔好，但我唔係有病，唔係日日喺度發癲想打人，只係好易因為小小事激動咗。」

文珣飽受丈夫的情緒煎熬超過五年，曾一度想以離婚解決，但孩子還小，離婚對孩子的影響深遠，還是努力修補關係比較好，不過文珣的思想簡單，不懂得如何幫助丈夫。「我哋性格好唔同，我諗嘢好簡單㗎咋，我比較開心正面，佢就好多顧慮、擔憂，諗嘢複雜過我好多，佢成日都話我諗嘢太簡單，我就話番佢太複雜。」Andrew笑說：「咁又拗一餐喇！」

大仔充當和事佬

無論有多憤怒，他們堅持不在孩子面前爆發，但小朋友都有感應，甚至不小心被他們聽到，文珣說：「我哋已經盡量入房先嘈，但就算關埋房門佢哋都知我哋做乜講乜，我哋鬧交會大聲咗㗎嘛。」

她指九歲的大仔開始明白事理，見到父母爭執，會充當和事佬的角色。「大仔會叫我一齊祈禱，再叫我哋分開冷靜一陣，之後一 齊傾番件事。呢啲係我教過佢，所以佢教番我轉頭。」他們發覺這個方法有效，退一步更能看清問題所在，尤其丈夫性格比較剛烈，更需要時間靜下來，文珣說：「我自己都調整得到，但男人需要多啲空間。」

相隔七年生第三胎

因為宗教信仰的幫助，兩人慢慢得到啟發，學懂如何寬恕，明白家庭中夫婦是核心，必須把雙方放在第一位，當雙方感情穩固才能給予小朋友快樂。近年兩人終於重修舊好，Andrew 更希望追多個女兒，令家庭更圓滿。不過，文珣起初對生多個表現不太積極，因為有兩個仔已經好滿足，自己又「騰雞」，生多個驚搞不定，決定交由上天安排。直至去年底文珣一次祈禱之後，即傳出好消息，Andrew形容為「計劃上的意外」，「生BB唔一定有㗎嘛，我哋係有計劃，但冇刻意做啲咩。」他們一直保持神秘，沒有宣布BB性別，不過早前文珣就在社交網站宣布陀女，追女成功！

文珣今次懷孕比之前都陀得辛苦，除了年紀問題之外，胎位亦較低，常感到腰骨痠軟，走路、坐下及穿褲子都有不適。她形容最辛苦是頭兩個月，完全沒有胃口：「以前最多聞到嘢食會唔舒服，但我仲會食嘢，但今次我係完全唔想食嘢，唔想郁唔想行，成個人好沮喪咁，影響埋情緒。」

丈夫超過100分照顧

至今九個月的孕期，文珣得到丈夫貼身照顧，一知道她無胃口，即使廚藝不精仍樂意下廚吸引她，文珣甜笑道：「初期我特別鍾意食cream source嘅意粉，仲要係某一間餐廳嘅意粉，即使係元朗咁遠老公都肯陪我去食。」文珣對丈夫的照顧給予超過100分，近日她手腳出現水腫，Andrew每晚為她按摩，他笑稱按摩按到手指起枕，文珣見到丈夫的付出也十分感動。

距離預產期十分接近，文珣已決定開刀生產，因頭兩胎也是開刀，她坦言之前因為好驚順產，所以與醫生商量後選擇開刀。「醫生話最緊要陀得開心，當我決定咗後就好似放低咗個重擔，陀得好輕鬆。」

至於兩個囝囝Cadence和Casper，已承諾會像大哥哥般幫手照顧BB。文珣解釋一直以來教仔首重兄弟關係，兩個男仔難免爭執多及互相競爭，她努力從中調解，培養他們的手足之情，所以他們十分期待細妹出世。「佢哋成日走嚟錫我個肚，同BB講快啲出嚟啦！」

重培養兄弟情 絕不偏愛

文珣和Andrew時常警惕自己不能偏心，以免影響孩子成長，尤其自我價值觀及人生觀。所以當BB出世後，他們更加不能忽視兩名兒子，要時刻留意他們的情緒變化。「我哋一定會做好平衡，唔可以偏晒一邊，好似細佬唔啱我哋會照話，唔會叫哥哥讓吓細佬。」

兩個囝囝皆是活潑的小朋友，最愛踢波，三父子經常出去切磋，Andrew 指大仔有運動細胞，手眼協調發展得好，4歲已經擅打羽毛球，亦喜歡打鼓，音樂感強似媽咪，閒時一齊彈琴jam歌！細仔運動方面亦不錯，但眼見哥哥瓣瓣掂，難免有種墮後感，Andrew與文珣見狀會大力讚賞細仔，令他感到受寵若驚呢。

文珣挺著大肚湊兩個仔疲累不堪，全賴Andrew多陪伴囝囝玩耍，囝囝亦好識做陪媽媽產檢，看著婦科醫生為媽媽掃肚皮時，他們感到很好奇，嚷著說想做醫生，文珣笑說：「不過佢哋成日變，始終仲細個，下次佢哋會有新update㗎喇！」

凍齡孕媽媽

42歲的鄺文珣仍散發著一股少女氣息，她的保養之道是保持心情愉快，因為情緒會影響皮膚質素，另著重保濕，尤其經常在冷氣房內皮膚好易乾燥，要多敷保濕mask。