前天氣女郎 黃婉曼 懷孕飲食迷思

前天氣女郎 黃婉曼 懷孕飲食迷思

前TVB天氣女郎 黃婉曼 (Icy)憑「同大家跳出香港」這金句,帶挈她得到其他工作機會,2010年她跳出新聞界,先後到NOW做主持、寫專欄、做自由工作者,近年她更踏進麵包世界,赴日本藍帶學藝三個月,學成歸來大搞麵包學校做「校監」。2014年,Icy下嫁會計師兼馬主馮柏基,躍升馬主夫人,在短短數年間,Icy在多方面跳來跳去,生活充實又幸福,她認為人生要接受不同挑戰,才活得精彩。

今年Icy再多一個身份,今日開刀誕下B女Kyra榮升媽媽,出世6磅半,母女平安,老公一直陪入產房,仲幫手剪臍帶。馮柏基笑言剪臍帶時好緊張!在整個懷孕過程,恰巧 Icy 的麵包學校開張,令她忙得不可交加,身為「麵包控」的她揚言,麵包學校是她另一個 BB,希望把健康的手工麵包發揚光大,因她知道好多人受濕疹困擾,自己亦患上妊娠糖尿,在飲食上要非常小心,所以Icy為自己、為下一代,都堅持宣揚健康飲食。一齊睇返佢早前接受Sunday Kiss的專訪!

撰文:Ling
攝影:Jacy Yip(部分相片由受訪者提供)

兩次重感冒兼發燒

Icy和老公婚後已希望生兒育女,但沒有刻意計劃,崇尚自然,所以當得悉懷孕一刻感覺很奇妙,但同時面對剛起步的麵包生意,令她有點不知所措。「兩件事一齊嚟係加倍挑戰,我始終要喺廚房工作,好驚陀得唔好。」婚後兩年多終於有孕,Icy陀得好小心,但繁重的工作令Icy的抵抗力下降,懷孕初期便患上重感冒,孕婦不宜吃西藥,Icy靠多飲水及休息令自己慢慢康復。

黃婉曼已為B女改了一個充滿陽光氣息的英文名,希望她為身邊的人帶來正能量。

懷孕約四個月,她又再染上感冒,原本她希望靠自己意志康復,但三四日後病情變得嚴重兼發高燒近40度,可大可小,需由中醫診治並服食溫和的藥,之後她有再問西醫意見。「醫生話孕婦有啲藥都可以食,最緊要問准醫生,寧願快啲控制病情唔好拖,我拖咗三四日搞到發燒,對BB都唔好。」

Icy報天氣跳脫生動,更憑一句 「同大家跳出香港」大受歡迎。

當準媽媽發病時,最緊張往往是腹中BB的健康,自己變得其次,Icy也不例外,發燒時有感BB沒有動靜,令她非常驚慌,即去產檢檢查一下。「我瞓咗喺度半個鐘聽BB心跳聲,呢半個鐘係我瞓得最舒服嘅時間,我好安心,好似BB安撫緊我咁,返到屋企覺得個病都好咗好多。」

B女大有機會是 獅子座,Icy希望她成為一個開心、正面、堅強的人,「佢應該會 堅強過我。」

陀女皮膚靚

或許陀囡囡比較乖巧,懂得安撫媽媽,Icy亦覺得自己情緒上沒有大起大落,反而因為有BB令自己充滿喜悅。她透露陀女還有其他好處,連皮膚都有改善,人見人讚。「可能大家荷爾蒙一樣,我都唔肯定。不過陀仔嘅朋友話BB踢得好犀利,我個女就踢得好溫柔,女仔對父母係窩心啲。」生女的媽媽最大樂趣 一定是購物,面對色彩繽紛的BB衫就愛不釋手,Icy已準備好幫囡囡扮靚。「連我啲朋友都忍唔住買衫畀BB,因為啲衫仔太靚,去到外國旅行都會買,我已經收到來自台灣、日本、加拿大、英國嘅衫仔同物品,BB真係好幸福。」

2014年底,Icy下嫁會計師兼馬主馮柏基,成為馬主夫人。

Icy的孕期已進入大直路,現忙於最後搜羅BB物品,她選擇品牌靠聽用家朋友的口碑,盡量揀選天然物料製造的產品,「好似我洗BB衫會用冇化學成分嘅嘢,因為BB身體好脆弱,買BB用品一定要以安全為主,唔使花巧。」

二人在意大利影婚照時遇上下雨天,反而影到別具一格的婚照。
Icy與老公齊齊拉頭馬。

患妊娠糖尿 疑食粥太多

人緣不俗的Icy身邊有很多朋友已為人父母,即使自己無時間看育嬰書、聽講座吸收知識,仍有很多朋友在多方面教路,包括索媽徐淑敏(Suki)和陳爽,二人分別生了三個和兩個,Icy說:「Suki係一個好開心嘅媽媽,佢都叫我最緊要開心,順其自然就得喇。佢仲有大把時間,生多個都得。」

懷孕初期Icy嘔得好勁,一日嘔三四次,開會中途嘔、肚餓又嘔。

預產期在八月初的Icy,將會選擇做順產媽媽,因她一向崇尚自然,可以順產的話都會順產,「但一切都會由醫生決定,最後要睇埋胎位等各種情況。」Icy自兩次重感冒後,至今沒有太大健康問題,唯獨是她患有輕微妊娠糖尿,在懷孕五個多月時發現,當時她感到非常驚訝,反覆思量自己的飲食習慣,她一向食量適中、少食煎炸物及甜品,究竟元兇是甚麼呢?「原來係粥!我屋企比較傳統食好多粥,朝早媽咪會煲魚粥,反而我唔食飯,我知道飯嘅糖份好高,醫生話粥嘅糖份仲高,血糖好快飆升。」

Icy已準備好做母乳媽媽,希望能堅持半年以上。

忌吃過多高糖水果

Icy又以為生果是健康食品,沒有注意份量,食很多車厘子、火龍果、提子等高糖生果,「依家就知道要節制,提子每次食幾粒就好,唔好成抽食晒,火龍果就食四分一。」進食還要看時間,晚間盡量避免食得太飽,可以少食多餐。Icy也乖乖戒掉生冷食物、蟹、咖啡、酒、茶,甚至外國芝士,「因為經過發酵,驚有菌。」

Icy的孕期已踏入最後階段,仍在購物上作最後衝刺,日前她到英國有機嬰兒用品店入貨,支持選用天然有機彩棉的產品。

她笑稱腹中BB好為食,令她比以前大食,頭三個月更加一肚餓就嘔,絕不能令自己空肚。「BB對食都好聰明,令我嘅口味分階段性,開頭我想食嘅嘢唔係太健康,鍾意食杯麵、薯片,我上網睇有啲孕婦都係咁;過兩星期又唔同咗,可能BB都覺得唔健康,我變咗鍾意食菜同生果,佢不斷令我調節。至於湯水就一直有飲,好似花膠湯、雞湯咁。」

在整個孕期中,Icy覺得首次聽BB心跳最難忘,之後每次產檢皆十分期待聽心跳。

創辦麵包學校

喜歡烹飪的Icy,閒時會為自己和家人煮幾味,不過懷孕期間她接觸最多的食物是麵包,因為她發現懷孕之時,恰巧其麵包學校開張,身為老闆娘的她要睇實公司,凡事親力親為試食多款麵包,以確保孕婦及小朋友也食得健康。

婚後不久,Icy便赴日本入讀法國藍帶廚藝學院的麵包課程,學成歸來開包學校,更請來法國藍帶前技術總監指導。

自與電視台約滿後,Icy希望學多一門手藝造福家人及朋友,有見全家皆喜歡食麵包飲咖啡,自己亦喜歡烹飪烘焙,常幻想自己能煮出一枱豐富早餐,就決定學做麵包,但學到一定程度後,本地已找不到深造課程,結果婚後決定遠赴日本,入讀法國藍帶廚藝學院的麵包課程。學成歸來後,Icy有感本地專業麵包師傅不足,於是開設麵包店並提供專業麵包製作課程,更請來法國藍帶前技術總監教授,希望培育新一代專業麵包師傅,第一批學員剛於今年七月畢業,令Icy產前放下心頭大石,「時間啱啱好,我可以安心去生女。」

Icy在懷孕期間忙於打理麵包學校,但她決定會繼續做在職媽媽,「我洗濕咗頭要努力經營落去,依家好多在職媽媽都兼顧得好好,我唔覺得係一個負擔。」
Icy肚大如籮,連剪腳甲都要老公代勞,她非常感謝老公在這段時間的關懷。

即將誕「獅子女」

不過,麵包大多含有致敏的麩質(Gluten),很多患濕疹的小朋友須避免進食,Icy表示店舖有提供Gluten free的麵包,有機麵粉從法國入口,採用天然酵母,雖然成本高,但她認為追求健康是股潮流,必須堅持。「我依家有少少妊娠糖尿,每餐都要測血糖,我食自己啲法包雖然都係澱粉質,但測出血糖係冇咁高。」身為準媽媽的Icy,已想像將來與小朋友一齊整造型麵包,可以訓練小手肌之餘,更是一個好玩的親子活動。

Icy希望將來為小朋友選擇校風自由的學校,她覺得知識可以後天培養,家庭教育、培養性格才是最重要,「有好嘅性格可以解決好多問題,唔可以單靠老師教導人生。」

BB 快將出世,Icy回想這九個月孕期是快樂不知時日過,即將成為「獅子女」的BB更成為她的「心靈雞湯」,每當她工作上遇到困難,都會感到BB與自己同行,她要為BB做好榜樣,不能軟弱。「獅子座嘅人比較堅強、不怕困難,我都希望BB係咁,所以我都樂觀面對所有難關,好似BB鼓勵番我咁。」

Icy已為BB改了一個充滿陽光氣息的英文名,希望她為身邊的人帶來正能量! Icy相信媽咪的心情會影響BB的性格,所以她每日保持心境開朗,轉眼間BB即將出世,她已計劃生多個,甚至多幾個。「今次都陀得好開心,可以快啲陀下一胎,我好鍾意小朋友,希望最少可以生三個,如果個天不斷畀我,我都好樂意接受。」

 

讀者留言

更多精選內容