前政助莫宜端 學做假日親子農夫

無綫記者轉職政策研究

莫宜端的面孔仍不時在無綫《新聞檔案》中亮相，報道香港舊聞大事，Zandra笑說自己活躍90年代末至2000年初，並非老臣子，「都係方東昇啦，成日揀我啲片，搞到我好老咁。」兩人為同期同事，2004年Zandra覺得跑新聞已一段長時間，決定另謀發展，一向對政策研究有興趣的她，先後加入香港政策研究所及智經研究中心擔任相關工作，四年後獲政府賞識，任命勞工及福利局局長政治助理。「我想個人事業有成長，所以想多做政策研究嘅嘢，但政策研究到某個地步，覺得有份參與制定同睇住個政策點成就出來，係更有滿足感。」

南丫海難啟發兒子

Zandra為官期間升為人母，孩子都慢慢感受到時事的氛圍，大仔Sky三歲多時，看了一單新聞的反應令Zandra印象至深，「我未必每晚播新聞俾佢睇，如果有好慘絕人寰嘅新聞，小朋友會好多疑問、好驚，除非我坐喺身邊導讀。2012年南丫海難，我一路講俾佢聽有隻船沉咗，有父母同小朋友浸落水死咗，我個仔冇出聲，冇表示好驚，但跟住兩日佢好早紮醒，係咁問番我隻船係點撞沉？呢條問題喺兩日內問咗10次以上，我就知道佢仲好疑惑，嗰排政府部門喺社區中心set咗counter擺悼念冊，我就帶咗佢去，佢企咗大半個鐘畫畫去表達難過同悼念死者，之後佢就少咗問海難問題，會問啲way forward嘅嘢，例如隻船點撞到咁爛？點樣避免意外發生呢？唔再受情感影響。」

Zandra指要讓小朋友學時事，並非單單描述事件，當小朋友對某件事覺得困惑，會放在心上時，不妨藉機以講故事方式講解，或去討論做一些事情，讓小朋友對事件有更深認識。

離開政府非不滿特首

誕下一對仔女後，性格拼搏的Zandra選擇做在職媽咪，走在政府最前線，但有得必有失，很多仔女成長片段一一錯過，衡量過後決定離開政府重建家庭關係。她離開時正值梁振英上任一年，社會開始怨聲載道，同時出現政助離職潮，惹起外界揣測。「做任何嘢都有機會引起揣測，我唔係為提出揣測嘅人而生活，冇必要解釋俾佢哋聽，我解完你都唔信嘅，咁我都冇辦法。」
為人母親後對育兒產生了興趣，Zandra讀過蒙特梭利教師課程，並兼職到仔女就讀的蒙特梭利幼兒學校做實習老師。最近亦接受了前食物及衛生局副局長、現任港大醫學院院長梁卓偉邀請，出任港大醫學院助理教務長（對外關係），工作時間穩定，更有時間復出幕前開咪，為港台「社區參與廣播」節目《寶寶您好嗎？》及第二輯《寶寶您好叻！》擔任主持，訪問不同專家的育兒方法，讓家長多加認識孩子，自己也獲益良多。

有田耕如派中好學校

Zandra選擇給一對仔女接受蒙特梭利教育，最初因無綫新聞舊同事邱振明介紹，邱在美國考到蒙特梭利教師執照後，在港創辦了兒童無限學校，教美式蒙特梭利，Zandra聽罷家長班後決定報讀幼稚園課程，「蒙特梭利強調尊重孩子嘅自然發展，跟住先諗俾咩環境佢，唔係下下課程主導，因為小一要學好中英數，所以幼稚園要開始默書。」Sky幼稚園畢業後升上真道書院小一，銜接沒大問題，「佢係最唔慣小學有schedule，中文、社會、體育堂，但幼稚園唔係，老師擺晒所有科目嘅教具喺度，俾佢哋自己揀嗰日想做咩。」

她深信大自然就是最棒的老師，教孩子認識植物及食物時，萌起落田的念頭。「瘦田無人耕，耕開有人爭」，原來想租塊田一點也不易，她為了讓孩子專心耕作，找了一個簡樸的農莊排隊租田，豈料一等半年，當收到農主電話有田耕時，感覺猶如派到好學校！

以身作則鼓勵耕作

只要天公造美，一家人幾乎每星期都落田耕作，播種、耙泥、灑水、除草、收割，仔女都落力參與，Zandra解釋當中也經過一番教導，一年前他們只有三分鐘熱度，轉頭就走去踏單車，好似自己「攞苦嚟辛」。「最初小朋友唔會點樣幫手，只會搵最好玩嘅嘢，淋水會出現，但除草就走咗去，一講到要睇住植物生長，知道原來種一棵菜要幾星期先食到，佢哋就冇恒心，要同佢哋傾好做完15分鐘，或者幫我除完草先去玩啦，每次都咁同佢哋傾。」

傾得多有進步，去年屢次颱風吹襲時，Sky開始關心農作物，Zandra即把握機會教育，「咁好天我哋要返去好好打理喇。」自此Sky乖乖耕作，落雨前又幫手整理瓜棚，以免雨水沖走心血。

Zandra眼見有家長扭曲了親子耕作的真諦，一味叫孩子鋤地，自己則繑埋雙手，或只顧拍照製作portfolio，「你叫個小朋友去耕田，佢扒兩扒覺得 悶，見到你都冇做，小朋友就覺得呢個唔係一家人嘅活動，佢咪唔玩囉，家長一定要以身作則投入耕作，如果你係怕泥土、昆蟲，一定要克服自己嗰關先。」

耕田是慢活工作，欲速則不達，她亦建議家長別對孩子期望過高，能按要求做足每項工作，「尤其0至6歲嘅專注力有限，你一定要預咗大人做最多工夫，小朋友可 能只幫到少少，淋幾下水或者搵幾條蟲，但你都要欣賞佢嘅付出，慢慢佢就感受到父母嘅包容，一齊喺呢個地方enjoy親子樂。」

●撰文：Ling
●攝影：Clay Lam（部分相片由受訪者提供）
●場地：綠豆豆農莊（tel:9285 5222）