平息「醫生八卦」風波 張嘉兒： 產檢 要人夾人緣
撰文：Ling
攝影：Clay Lam（部分相片由受訪者提供）
化妝及髮型：Phoebe Y
服裝：Mayarya
場地：comma party（tel：9735 6464）
十問九唔應 像自問自答
在片中嘉兒表示，有朋友介紹去中環某婦產科診所驗孕，但由於該醫生口碑好預約期滿，所以她在姑娘介紹下，去試同一診所的另一位醫生，結果發生了不快經歷。她覺得對方只八卦其拍劇經歷，如拍甚麼角色，會否拍通宵，「你嗰陣嘅心情唔係想佢問呢啲嘢，已經覺得佢好八卦，仲要問埋我家姐結咗婚未、有冇BB，好似侵犯我私隱咁，覺得唔舒服。」
當嘉兒提及她患有多囊卵巢症，擔心會否容易流產，對方只回應一句：「scan咗咪知囉。」再查詢孕婦飲食禁忌時，對方繼續十問九唔應，全程像她自問自答，令她感到憤怒，覺得只有對方問問題，自己想問的卻沒有答案。「我覺得以第一次去產檢，離開clinic完全無對懷孕有更多嘅了解，但醫生就應該了解多咗藝人嘅工作。」
「我不是大明星」
報道出街後，好多媽咪紛紛到《Sunday Kiss》facebook留言，認為醫生並非不專業，反而是十分細心了解孕婦的情況，不少媽咪也說曾被醫生問類似問題，是嘉兒過分敏感，有人更指她「當正自己係大明星。」嘉兒藉此訪問澄清說：「我絕對無當自己係大明星，只係想醫生唔只係問我工作，而係回答到我嘅需要。而我之後喺政府醫院同其他醫生都得到一個孕婦想知道嘅知識，比如咩時候再要check乜嘢，有乜嘢唔應該食，好似木瓜同苦瓜，仲有BB嘅情況。」
經過今次事件後，嘉兒認為看 產檢 醫生都要人夾人緣，之後已找到另一位婦科醫生，亦有在伊利沙伯醫院做 產檢 ，「醫生、護士、助產士都好專業，所有解釋得好清楚。」而她對此搞出誤會亦感到抱歉，「其實我唔係想challenge個醫生嘅專業，但佢問我問題，係feel到佢嘅口吻係咪八卦㗎嘛。我讀書係讀營養衛生，我明白醫生一定會問medical background、家族病史，但我問佢就唔答，呢樣先係我不滿嘅地方。不過睇醫生真係人夾人，我只係想搵個講多啲資料俾我聽嘅醫生。」
多囊卵巢症難懷孕
其中一個嘉兒最關心的 產檢 問題，是她患有多囊卵巢症，幾年前證實患上，「通常每個月會排卵一次，但多囊卵巢症因為受賀爾蒙影響，令卵子成熟得唔好，有時就無排出嚟，即無嚟月經，或者隔好耐先排出嚟，嚴重啲可能幾個月都無。」起初嘉兒以為是生活習慣問題，飲食、睡眠不定時或工作壓力，因為近幾年才月經不準，「我之前冇聽過呢個病，到我想有BB做產前檢查，話俾醫生聽我M唔準，佢先話我可能患有呢個病，scan咗之後原來真係。」
多囊卵巢症是常見的婦科疾病，約十人就有一人患上，嘉兒當初得悉患病後感到驚慌，因媽媽、姊姊及兩個妹妹都未曾患過，亦不知患病原因。「醫生建議我試吓自然懷孕一年，唔得就可能要打排卵針或食排卵藥，真係嚇一嚇。」原本嘉兒與劉姓丈夫Nathan想先過一年二人世界，嘉兒決定提早「造人」，幾個月就成功，現在BB已經八個多月大，發育一切正常，下月中出世。懷孕期間，嘉兒孕吐不算嚴重，只是較多「暈車浪」，一搭車就嘔，以前從未試過。最難頂是炎熱天氣下，多個月不得吃西瓜，過多兩星期就可以進食消暑一下，「由懷孕頭三個月已經好想食西瓜，好期待呀，依家個人又熱，又鍾意嗰種味道，又勁耐無食！」
多囊卵巢症知多啲
多囊卵巢症簡稱PCOS，是因賀爾蒙失調導致排卵不正常，約10人就有1人受影響，常見於青春期後期至生育期女性，嚴重者可引致不育。正常卵巢只會有1至4粒發展中的未成熟卵泡，但患者的任何一側卵巢內，會出現10個以上的卵泡，影響排卵及受孕，部分女性的經期長達數月，甚至閉經。多囊卵巢症的病因至今未明，部分研究指或與遺傳或肥胖有關，暫時未有根治方法，但可透過服食排卵藥、中醫調理等方法，提高懷孕機會。
徵狀
– 肥胖
– 月經紊亂、閉經
– 體毛過多，尤其面部、胸前、腹部、乳房、拇指及腳趾
– 面部出油多、冒痘、粉刺
陳茵媺細女多頭髮
第一胎的孕婦問題天天都多，嘉兒背後還有一班「媽咪級港姐」做她的智囊，包括陳茵媺（Aimee）、曹敏莉（Mandy）、朱凱婷（Heidi），向嘉兒提供多方面貼士。「Mandy教我飲湯水，send咗好多食譜俾我，話我知邊啲啱我飲；而Heidi個醫生同我係一樣，係佢介紹俾我；Aimee生咗三個，最清楚啲產品，邊啲好佢就介紹俾我，『你買呢個唔好買呢個！』好多貼士。」
陳茵媺與陳豪「三年抱三」，兩子一女，細女Camilla於今年四月出世，嘉兒透露對他們的頭髮最有印象，「第一次見佢個女已經好多頭髮，同埋佢大仔依家髮型長長哋蔭，好似韓仔好得意，我覺得三個都似Aimee多啲，佢自己都應該覺！Aimee話好開心三個小朋友年齡接近，可以一齊玩，一齊長大。」
改名或叫「劉華」
不論嘉兒生仔生女，將來都有機會與Aimee對親家，成班港姐的囝囝囡囡一齊玩，想起都開心！嘉兒笑指BB現在好反斗，密密踢肚，希望BB將來也是一個活潑、外向的人，「想佢鍾意戶外活動，active啲。」嘉兒將會在私院順產，希望復元較快，距離預產期剩下一個月，她的心情愈來愈緊張，感覺好真實，「依家佢隨時會出嚟，真係要準備好，走佬袋都執得七七八八，呢排發夢成日見到BB，可能日有所思夜有所夢，見到自己餵奶。」她打算嘗試餵母乳半年，希望自己堅持得到。至於名字方面，想BB出世後交由師傅建議，因師傅詞彙較豐富，再從中選個好名，「我哋唔係迷信，但我同老公都喺外國返嚟，識嘅字好基本。」其實交由長輩改名又得，而張爸爸亦有心水名字，「我爸爸鍾意『劉華』呢個名！佢話『華』啱男女用，但『劉華』會太似劉德華……唔知大家覺得好唔好啦，可以俾啲意見！」
Save
Save
