女兒放假回港 張兆輝變緊張大師:隔籬係男人要調位

女兒放假回港 張兆輝變緊張大師:隔籬係男人要調位

子女在海外讀書,為人父母的一定十分擔心,無論是去或返都會變緊張大師。藝人張兆輝的子女都在英國讀書,14歲女兒張卓姿趁復活節假期回港,張兆輝立刻變廿四孝爸爸到機場接機。

撰文:Anson|圖片來源:張兆輝

14歲女兒獨自回港,身為爸爸的張兆輝又怎能放得下心。張兆輝於透露接機的前一晚,因擔心女兒安危,整晚都瞓唔着,他說:「佢咁細個一個人坐十幾個鐘頭飛機,梗係擔心啦!我之前仲叫佢check in前睇吓隔籬個位係咪男人坐,如果係就要調位,哥哥雖然唔返香港,不過佢都喺英國約克接了妺妹出倫敦送到去機場。」

張兆輝

當張兆輝見到女兒從禁區位行出來時,他即上前為女兒推行李,並父愛滿瀉地說:「我的寶貝豬⋯⋯」女兒果然是爸爸的前世情人!

張兆輝

嚴父張兆輝 不捨女兒長大

已過半百之年的張兆輝,演活無數角色,返回家中,仍然學習做個好老竇。張兆輝育有一子一女,18歲的兒子卓鏗在英國讀書生活美滿,將來做個有承擔的男子漢。 家中餘下兩個女人相伴,輝哥無時無刻都想黐實14歲細女卓姿,不過張兆輝亦已做定心理準備,學會放手。「喺我心目中佢依然好細,或者佢覺得自己好大啦,佢始終係女仔,我哋都想保護佢多啲、愛錫佢多啲,佢應該要長大嘅時候,自然會長大,應該要離開嘅時候,自然會離開,希望佢大個咗會得到幸福。」

張兆輝
張兆輝透露阿仔鍾意食炒飯、勤做gym,可能有助快高長大。

承傳上一代家教

養育仔女十多年,輝哥謙稱自己育兒心得不多,不過一講又滔滔不絕,「全靠我爸爸媽媽以前教落,我哋六七十年代,小朋友都係百厭唔聽話,個個屋企都比較嚴厲,會灌輸一啲基本規矩俾我哋,到我長大出來社會捱世界,就覺得好彩細個學咗應該要學嘅規矩,如果唔係就會俾人話冇家教。」 到張兆輝做人爸爸,也決心做好家教,承傳父母的一套價值觀,灌輸給仔女,「如果唔灌輸俾佢哋就冇嘢學,我將細個學過嘅嘢,或者經歷過嘅嘢,講番俾佢哋聽。當然唔可以好似以前咁嚴厲,但都算嚴㗎喇,小朋友6歲前都要命令式,大個咗就要有商有量。」有些基本規矩,他覺得仔女一定要遵守,不得異議,「例如出去同家人食飯、去飲茶,佢哋可能會覺得悶,但我一定要佢哋跟我去,以前我哋覺得好正啦,唔係成日有茶飲㗎嘛。」

張兆輝
張兆輝夫婦的相處之道是,無論幾嬲對方都好,也不能說「離婚」二字,講得多好易變成真,一個破碎家庭好影響仔女成長。少想對方缺點,多加欣賞優點,有助改善夫妻關係。

爹哋鬧人好暴躁

張兆輝想做一個嚴父,但囡囡卓姿未驚過,還可理性分析父母鬧人之別,「爹哋其實唔係太嚴厲,有朋友個爹哋仲嚴厲。」爹哋還是媽咪嚴些?「我講事實呀,唔好鬧我!爹哋第一次會話『嗱,你下次唔好咁做喇。』第二次就會鬧!媽咪第一次就唔算鬧,但就話你『做乜做唔好呀?下次唔好呀!』講嘢暴躁啲,爹哋就第二次先暴躁。」

張兆輝
兩兄妹感情深厚。

被囡囡指暴躁,張兆輝立即解畫,「第一次係俾機會你,話俾你聽提醒你,已經比以前唔同㗎喇,以前你爺爺係冇第一二次,一嚟就鬧㗎喇!」多唔多懲罰仔女呀?父女異口同聲:「有罰!佢已經被罰得最少㗎喇,最多打屁股!」卓姿補多句氹番爸爸,「其實爹哋好溫柔嘅,媽咪都係。」

張兆輝
張兆輝讚囡囡今日訪問特別靚,特別帶了相機為囡囡拍照留念。

主力拍電影 全為家庭

張兆輝眼中永遠的小女孩,明白爸爸因工作需要少陪伴自己,亦十分理解,「佢做呢份工作,我就知佢會成日遲返,以前細個唔明佢份工作,有次佢出去做咗成日嘢,夜晚我就攬住媽咪,『爹哋幾時返呀?』但佢一走三個月呢,我反而唔會喊喎。」

張兆輝
張兆輝經常為家人影相拍片,
隨時拿出來回憶一番,「如果唔影低,佢細個的樣根本唔記得,又唔知道以前有好多得意趣事。」

為了陪伴仔女成長,輝哥在仔女頭十年也堅持留港工作,主力拍電影,拒拍劇集。「太太一個好難照顧晒佢哋,多個人多雙手,拍劇會冇晒私人時間,電影就有,同埋我有自己生意。依家諗番係啱㗎,美好回憶,就係呢十年。」張太感激丈夫的付出,能攜手見證仔女成長片段,「小朋友跟你只係頭12年,12、13歲你想黐都開始冇得黐,所以佢頭十年都冇離開過屋企超過一星期。」

張兆輝
張兆輝數年前在微博上載了兒子的童年照,多謝兒子令他成為父親,「 你的開朗,活潑,跳皮,乖巧令我生活更有色彩。」

大仔轉校 找到學習目標

父母多數寵愛小女兒,又驚囡囡學壞、蝕底,當正受保護動物,但張兆輝對大仔着緊一點,「內心對兩個係一樣,雖然以前我都有幫手湊外甥,但大仔係我第一個小朋友,樣樣嘢都會緊張啲, 照顧多啲。反而到個女,可能我熟手咗,已經跟得冇咁足。好多人話我實錫個女多啲,我成日都同佢哋講,大仔細個時我哋當佢小寶貝,依家大個咗先唔使照顧咁多,就去照顧細女,唔係照顧邊個多啲,我只係覺得對個仔要嚴啲,始終男仔會出來闖世界,將來要養家庭,照顧唔到老婆,邊個肯同你過世。」

張兆輝張兆輝

張兆輝
卓姿愛上親戚的狗仔,更萌起養狗念頭,父母講明養寵物要照顧一生,必須有責任心,叫她先想清楚再決定。

赴英求學 立志做機師

Edison立志做一名飛機師,正朝着目標努力進發,大部分科目奪A,尤其對數學、地理及歷史有興趣,張兆輝會盡力幫他完成夢想。「佢有抱負,而我又有能力,一定會盡力幫佢完成,我哋以前就冇辦法啫,佢有呢個諗法我都估唔到。」

張兆輝
就大仔有沒有女朋友一事,一家人即場展開討論,卓姿覺得哥哥有女友,「我覺得佢有女朋友,佢成日匿喺房。」張兆輝覺得阿女沒有真憑實據不能亂估,「你夠成日匿埋喺房同表姐WhatsApp。」鏡頭後的張太表明已問了兒子,「佢話呢兩年唔會拍拖住!」

正值少年1516時,在英國又無王管,好易行差踏錯,張兆輝反對兒子拍拖,早已開放溝通,「我哋都成日問佢有冇女朋友,有就帶番嚟俾我哋睇吓,媽咪最叻㗎啦,成日都話幫佢了解吓邊啲女仔好,邊啲唔好。」張太即笑說:「最緊要唔好上床,唔好錫嘴,唔好拖手。」阿女驚訝道:「唔係呀話?」張太強調男孩子最重要負責任,以免影響女孩一生,害己害人,「未ready就唔好做,每樣嘢都要有計劃。」

張兆輝
張兆輝讚囡囡算好乖,多年來從未駁嘴,最多不出聲、表情不高興。

更多精選內容