張繼聰 囡囡張靖陪睇電視 緊張叫爸爸

自從張繼聰 囡囡張靖(Karina)出世之後,一有時間就陪囡囡玩。最近 張繼聰 係Instagram出post,錄低咗同囡囡一齊睇電視,電視播出張繼聰 同鄧麗欣主演嘅電影《失戀日》,播到 張繼聰 喺街頭打鬥兼被斬嗰一幕,囡囡肉緊到仲嗌咗聲「爸爸」添!

撰文:Sunday Kiss

圖片:謝安琪、 張繼聰 Instagram、新傳媒資料庫

張繼聰 係Instagram post咗條同囡囡一齊睇《失戀日》嘅影片,電視播放到 張繼聰 喺街頭打鬥兼被斬嗰一幕,囡囡肉緊到皺晒眉頭,仲忍唔住嗌「爸爸」添,超級投入!

自從張靖出世之後, 張繼聰 同謝安琪都錫佢錫到燶,除咗為囡囡喺迪士尼豪搞百日宴,謝安琪仲揚言要做全職奶媽,實行無了期停工湊女:「希望可以餵足一年人奶!真係擺低工作,以家庭為先,囡囡都係得幾個月,雖然囝囝10歲,但都係要傾偈嘅階段,只要睇住小朋友開心就乜都值得!」

Kay推job有錢都唔賺,而張繼聰就緊張到要玩人釘人政策,又話要減產畀多啲時間睇實個女,仲癲到已開始盤算個女讀書時點安排,張繼聰瞪大眼話:「佢將來嘅男友一定好大鑊,因為有我守住,我已經picture緊個女讀中學、大學,哥哥第一日接放學,第二日就係我!」睇嚟Karina都幾難逃出呢個黐身爹哋嘅魔掌!

Kay表示有做運動收身,包括舉重及舉啞鈴等,Kay坦言全因老公影響:「身邊有人鞭策,自己唔可以太遲起步!(想操馬甲線?)呢條線離我頗遠,哈哈!」

問到囝囝張瞻有冇呷妹妹醋?Kay擰頭話冇:「反而佢成日都錫妹妹,可能同妹妹年紀差好遠啦!我同妹妹換尿片時佢會主動幫手,餵人奶時又幫手冚住。」

張靖嘅父系基因太強,同爸爸阿聰以及哥哥張瞻十足餅印!

延伸閱讀:幸福小公主! 謝安琪 為囡囡唱兒歌講故事


你有獨家湊BB心得嗎?

更多精選內容