張頴康 麥雅緻 迎接B仔「小花生」

張頴康 麥雅緻 迎接B仔「小花生」

TVB藝員夫婦張頴康、麥雅緻(Angie)自2012年結婚後, 人前人後非常恩愛,3歲囡囡張雅喬(乳名小豆)更像個活潑小跳豆,一家三口深受歡迎。他們的新成員「小花生」剛剛出世,一仔一女湊成「好」字。阿康笑稱取乳名「小花生」,只因為喜歡一粒粒的食物,「我哋屋企鍾意啲嘢一粒粒,所以有小豆之後,就要有粒小花生。」
阿康已請假一個月陪家人,除了幫手湊 B 之外,更重要穩定老婆的情緒,是名副其實的廿四孝老公。問到兩人的恩愛之道,阿康解釋或與兩人「相依為命」有關,他自小缺乏家人愛錫,Angie 的家人亦長居外地,早已認定對方為家人。「 我哋咁啱都鍾意家庭生活,所以我哋凝聚力好強。其實父母生一個小朋友已經好辛苦,生多個係自己玩自己,咁辛苦嘅嘢都要做多次,係因為小朋友畀到你嘅快樂,無其他人可以畀到你。」

撰文:Ling
攝影:Clay Lam(部分相片由受訪者提供)

張頴康 麥雅緻 今日剖腹誕B

今日張頴康在FB報喜,囝囝小花生出世了,母子平安!小豆榮升做家姐,一定好開心啦!恭喜晒!張頴康在FB寫到:「小花生出咗世喇!辛苦哂老婆喇!老婆,我愛你!」甜到漏啊!

肥肥白白的「小花生」出世喇!
阿康和Angie一家在臨盆前接受本刊訪問,Angie話今次陀B仔比較重和辛苦,所以臨生前都幾緊張,全靠老公和小豆貼身照顧。

張頴康:小豆喜歡做姐姐 培養責任感

兩人今次決定生多個,是希望為家庭帶來更多歡樂,為小豆添個妹妹陪伴 成長,並非為追仔。Angie 強調生仔生女無所謂,沒有壓力,反而第一胎真的想 要女,結果如願以償誕下小豆。阿康則來自多仔的家族背景,所以比較想生女,「今次我係想生多個女陪小豆,兩姊妹一齊玩。同埋我屋企全部都係仔,如果第一胎真係仔,第二胎就真係想追女喇。好好彩我哋第一胎已經有個女小豆,所以今胎就無壓力,我哋已經好滿足。」

阿康相信他們教仔教女一定有不同,對著兒子會扭轉女兒奴的心態,希望「小花生」成為一個堅強、負責任的男生。
問到小豆得知將有弟弟,心情如何?小豆興奮說:「佢鍾意車,可以一齊玩!我哋仲會玩公仔、煮飯仔,好好玩㗎!」阿康和Angie見到小豆樂於 接受弟弟,也鬆了一口氣,他們異口同聲道:「起初擔心過小豆會呷醋,因為佢慣咗得 到我哋獨一無二嘅愛,所以一有咗就話畀佢知,初期佢都擔心爸爸媽媽會唔理 佢,我哋就由故事書入手,好似講做姐姐嘅責任同權利,有咩佢可以做,BB 唔可以做,慢慢佢開始接受。」經過大半年的孕期後,小豆愛上了「姐姐」 這個稱呼,覺得做姐姐是一件特別任務,多了一份責任感。

一家三口近日到沖繩旅行,Angie當時挺著八個月大肚,全程輕鬆觀光,不過他們也有心理準備,萬一BB提早出世,惟有Born in Japan吧。
阿康和小豆非常喜歡沖繩,相信將來首次的一家四口旅行都會重臨沖繩。

3歲就識照顧媽咪

小豆不單止學習做姐姐,更反過來照顧媽咪,提點媽咪不要從高處拿物件、叫媽咪乖乖坐低休息,Angie甜笑道: 「爸爸要出去的話,會叮囑小豆照顧我,小豆都好聽話,我一話好攰,佢即刻拎張凳畀我坐;我想去個櫃度拎嘢,佢見我隻手伸高啲,又會話『媽咪你咁樣好危險㗎喎。』好細心提點我。」
小豆特別提醒爸爸返工也要小心,「爸爸都唔可以爬高,跌咗落地就會唔見咗,我同媽咪會擔心。」阿康指小豆 未有死亡的觀念,但知道甚麼是危險,有意外就會「失蹤」,以後不再見到,「所以佢依家成日叫我哋小心,好識顧人感受,好生性。」

一家三口對BB的胎教以閒談為主,分享每日趣事,又叮囑BB不要心急出世,小豆更每日和弟弟打招呼,「姐姐喺度呀,唔使驚㗎,我會保護你!」

第二胎陀得辛苦

雖然有了上一次的懷孕經驗,但Angie陀今胎比上次辛苦,始終年長了一點,而且個肚感覺好墜,驚有早產的風險。「因為個肚比上次大,陀得比較低,個感覺好重好墜,好驚會早產。不過唔係BB個size大咗,同上次差唔多,應該係因為身體有記憶,個肚大得快啲。」

Angie今次仍沒有請陪月,因為產後父母會返港照顧,而且爸爸是烹飪高手,可以照顧她的坐月飲食。

不過,Angie的陀B心情尚算輕鬆,有經驗應對各種情況,每次產檢亦有帶同小豆,從「電影」中看弟弟。「佢問點解BB喺電影入面嘅?因為間房會熄燈,好似睇戲咁。佢當然睇唔明啦,我哋要解釋番畀佢聽。」

Angie將會再次剖腹生產,她坦言自己因心理作用不能順產,「就算醫生做檢查我都好抗拒,會發晒癲嗌『唔得呀!』所以醫生同我都知道順產唔到,同埋 上次小豆個頭同身形都比較大,好早就揀咗開刀。」阿康笑言如果再生多個,自己要考醫生牌,「因為得我一個可以檢查,哈哈哈!」老婆立即喝止他︰「好核突呀!」

小豆自小喜歡閱讀,現在更愛上講故事,要父母扮學生聆聽。
Angie除了頭三個月有作嘔作悶之外,口味沒有大轉變,可能因為忙於湊小豆,自己都沒有為意。

讚爸爸拍劇好睇 呷醋感情戲

阿康對於上次只有一日假陪伴老婆,令她出現產後情緒不穩,仍深感歉疚。今次他已向公司攞了大假侍產,除了幫手照顧BB之外,更重要是安撫老婆的情緒,希望待BB百日後才復工。「原本有套劇九月開,我都推咗,等到十一月先再開工,希望BB出世後我可以陪佢多啲,BB有長輩幫手睇住,但老婆需要我陪伴。」
為了寶貝女,阿康一定要繼續拍戲,話說阿康早前有份主演的《燦爛的外母》,小豆間中有收看,至近日播畢後,小豆問爸爸:「點解依家電視見唔到你嘅?你做戲好好睇㗎!」這簡直是對阿康最窩心的讚美!Angie笑指有時與小豆看電視時,阿康不在家,小豆就以為劇中的爸爸是現場直播。「好似有場戲爸爸食緊飯,佢就問『點解爸爸依家喺呢度食飯嘅?』我就解釋番係之前拍攝嘅。」不過,小豆都有女孩子的觸覺,一見到爸爸有感情戲,就知道是假的,Angie說︰「佢應該有啲唔開心,所以自我安慰,講畀我聽爸爸係做戲,係假嘅!」

小豆讚爸爸做戲好睇,又提醒爸爸不要爬高爬低,非常窩心。

最愛公主 學習品德

性格活潑多言的小豆,訪問當日阿Belle(《美女與野獸》的公主)上身,著爸爸扮野獸,一齊唱歌跳舞非常入戲,Angie笑稱她喜歡所有公主,經常有不同公主上身,好多人問會否養成囡囡有公主病,她直指是兩回事,反而可以從公主的故事中,教導囡囡一些大道理。「佢從公主故事學習到品德,每個迪士尼卡通人物都有個性,好似《美女與野獸》教佢睇人唔好睇表面,要睇內涵,唔好見野獸唔靚就拒人於門外。每個公主故事都有個訊息,只要認真睇個故事,就知公主唔係教女孩子養成公主病咁。」

拍攝當日小豆與爸爸扮演《 Beauty and the Beast 》,小豆不斷向爸爸高呼「阿 Beast 」,非常惹笑!

小豆嗜好多多,除了愛扮公主之外,還愛跳芭蕾舞、砌LEGO、砌圖和閱讀,Angie指小豆自小看很多圖書,現在更喜歡扮老師講故事。「佢放學返嚟會叫我哋︰『小朋友坐呢度,老師依家講故事喇!』我同老公就即刻扮學生︰『張老師,今日講咩故事呀?』佢就會拎本圖書講,有時係幾個小故事拼埋講。」

小豆已學跳芭蕾舞一年,可以像公主般翩翩起舞。

Angie和阿康樂見小豆扮老師,因為從中得知學校每天的教育內容,知道她的校園生活愉快。正就讀比諾創意幼稚園K1的小豆,擅於表達自己,老師亦發現小豆喜歡畫畫,建議多發掘小豆的創作潛能。

從女兒奴變嚴厲爸爸

至於細仔將來的教育,阿康已有一些計劃,相信自己對男仔會嚴格一點,「淨係攬攬錫錫我都未必會同個仔做咁多,唔會畀佢嗲咁多,唔同個女,佢跑我會叫佢小心唔好亂跑,但個仔我會由佢喺安全情況下跌親,教佢多啲男仔嘢。」

小豆喜歡所有公主和迪士尼卡通人物,從每位卡通人物中也學到不同道德觀。
小豆1歲已經愛上做《魔雪奇緣》的Elsa。

隨著一家四口的生活來臨,阿康最感激太太的付出,但一家人不必講獎勵,自己多陪伴及愛錫家人已是最佳的報答,之後會計劃一家四口旅行。「等BB出世後穩定咗,老婆情緒無問題,身體又回復番,我一定會有補償去旅行。獎勵一定係一家人享受,唔係自己一個享受。」

父母未開始為小豆在學術上鋪路,仍要觀察她的發展,將來選擇傳統名校以至國際學校都有機會。

讀者留言

更多精選內容