得意等於唔靚? 陸永老婆為囡囡平反

得意等於唔靚? 陸永老婆為囡囡平反

藝人陸永同老婆Reina結婚六年,育有一對可愛姐妹花陸一穎(Hannah)同陸一心(SimSim)。兩個囡囡深得網民歡心,陸太都經常同大家分享佢哋一家嘅日常趣事。最近,陸太就分享SimSim唔鍾意人用得意嚟形容佢,仲問媽媽點解唔話佢靚。估唔到分享引嚟網民批評,仲搞到Reina要出千字文解釋。

撰文:Sunday Kiss

圖片:missussix@Instagram

網民解讀 得意=唔靚?

事緣陸太早幾日分享囡囡SimSim唔鍾意人用「得意」去讚賞佢,例如有人讚佢畫幅畫好得意,佢就會話:「我唔鍾意你話我畫得得意,我想畫得靚!」,又好似有人讚佢得意,佢就會反問:「點解你唔話我靚呀?」。

陸永

之後就有網民留言話經常睇得出Reina成日好明顯咁讚Hannah,但就喺SimSim面前話佢唔夠靚。陸太見到留言隨即反擊,表明自己覺得兩個女都好靚,從來冇覺得SimSim唔夠靚。佢仲話自己每日都會情不自禁咁讚兩個囡,兩個囡囡已經俾佢讚到自信爆棚,所以先會接受唔到人話佢「得意」。

Reina仲貼返舊片話Simsim未夠三歲已經俾佢洗腦,不斷讚話:「SimSim靚靚呀!」。

千字文為囡囡平反

Reina隨後再發千字文解釋,問返SimSim點解唔鍾意人話佢得意,原來SimSim覺得「得意」係細個,「靚」先係大個,佢想做大人,所以想人話佢靚多啲。原來SimSim根本唔係玻璃心,一個只有四歲嘅小朋友嘅諗法其實好簡單,媽媽口中嘅「得意」亦唔係指「唔靚」,兩者並冇任何衝突。

陸永

對於有人話Reina淨係覺得Hannah靚SimSim唔靚,佢重新澄清自己好少拎兩姐妹嚟比較,佢覺得兩個囡囡兩款性格,兩個都係獨一無二嘅。

網民大讚識教囡

Reina亦教導囡囡,每個人都會用自己嘅眼睛睇嘢,企喺唔同嘅角度同立場,睇嘅嘢都會唔一樣。當人有唔同嘅意見,都唔係每次都有對與錯,仲叫囡囡唔需要因為有人話佢哋唔靚而唔開心,因為「靚」並唔係最重要。

陸永

Reina話兩個囡囡都知道外貌並唔係最重要,佢問SimSim:「如果媽媽依家話你唔靚你會唔會唔開心?」,囡囡仲大方咁答佢:「唔會!咁我要乖啲我就會靚啲囉⋯⋯我都係唔駛咁靚啦!」

陸永

網民大讚Reina識得從日常生活灌輸價值觀俾囡囡,好識得教囡!Reina日前仲分享工人姐姐放假,兩個囡囡唔單止冇一大清早嘈醒媽媽,仲識得自己拎麵包食,令Reina十分感動呀!照咁睇嚟,兩個小朋友都十分獨立,冇俾人寵壞,十分抵讚!

下一頁:楊潮凱報喜做爸爸:我要努力賺錢喇!

你有獨家湊BB心得嗎?

更多精選內容