息影23年 柏安妮 心理學教女

闊別銀幕23年的 柏安妮 (Ann Bridgewater),一身素服、手持iPad並面帶笑容前來接受訪問,正切合她在平凡中找到喜愛工作的形象。Ann於1985年出道,為青春組合「開心少女組」一員,一齣代表作《為你鍾情》飾演張國榮的妹妹,瞬即登上女神之位,之後合作的粒粒皆星,有《咖哩辣椒》的周星馳、張學友、《俠盜高飛》的周潤發、《風塵三俠》的梁朝偉,正當事業最璀璨之時,Ann放棄短短八年的銀色旅途,投身專業行列,並與港大同學結婚誕下兩女,現分別15及12歲,專心做個平凡的職業女性。 一直對兒童教育有興趣的她,先後考取了職業治療師及臨床心理學家專業資格,一做十多年,幫到人,更幫到女兒,利用工作經驗去教女,重溝通、不問成績、嚴守家教,令青春期的女兒不但無反叛,更感激媽咪的嚴厲。

娛樂圈無安全感

Ann是中、英、馬來西亞混血兒,美艷動人,更是一名叻女,入行前為香港花式溜冰冠軍,後獲英國牛津大學錄取,因獲黃百鳴賞識而放棄升學,一嘗做明星的滋味。在千變萬化的娛樂圈,際遇要講運氣,對性格踏實的Ann來說,沒有安全感,「喺娛樂圈除咗靠實力,好多嘢都要靠運,同埋睇你想唔想出去見人、交際、識到邊個,我覺得唔係好適合我。」 八年的星途,Ann也自覺幸運,認識了許多愛錫她的人,但她覺得除了拍戲之外,仍想發掘其他興趣發展,在尋找新出路之前,必須重拾書本,故90年代初她到香港大學進修生物系,邊拍戲邊讀書,更認識了港大同學,其後相戀結婚,育有兩名女兒,正式展開新生活。

幫一個家庭 多一份滿足感

畢業後她做過無印良品香港品牌經理,之後為興趣再進修職業治療,從此為小朋友效勞,一做十幾年。 能找到真正喜歡的事業,又可以幫人,並非人人有如此福份。對Ann來說,每一個case都難忘獨特,「做過咁多個家庭,我個個都鍾意,好願意為佢哋做嘢,冇一個家庭我係唔想見,當深入認識每個家庭,就會睇到佢哋嘅好處同難處。難忘嘅都有,好似有小朋友嚟之前乜都唔肯食,嚟到做做吓佢食咗隻蕉,我已經開心到不得了!早幾日又有個小朋友,家長教咗好耐佢都唔識自己去廁所,我同佢傾咗一陣,佢返屋企終於去到。好多嘢我哋平時覺得好容易,對某啲人係好難,而我幫佢哋做到少少嘢,已經可以改善佢哋生活。」 做了多年職業治療後,Ann近幾年轉做臨床心理學家,希望多從內心去幫助有困難的小朋友,「以前多做0至6歲,依家會做到10幾歲,好似小朋友喺讀書、專注力、社交或心理上有問題,我都會幫佢。」

轉做臨床心理學家

職業治療與臨床心理學的最大分別,在於前者較重於教小朋友的日常生活,後者則關乎小朋友及家長的心理,比較全面具挑戰性。「職業治療師做多啲日常嘅嘢,小朋友嘅職業就係瞓覺、食嘢、返學、寫字,真係落手落腳教佢哋寫字、點樣換衫等等;臨床心理學固然之做心理嘢,如果小朋友唔開心,要同佢傾偈,睇吓佢家庭狀況,鼓勵家長點改善關係。」 其中一個最常見的學習問題「專注力不足」,是Ann的重點工作,主要做評估及幫家長正視問題。「好多專注力不足嘅小朋友好聰明,只係上堂遊魂,所以我就做好多評估,去證明個小朋友係聰明、智力冇問題,只係教佢嘅方式要多花心機,搵啲佢有興趣嘅嘢去教,咁對個小朋友轉變會好大,因為佢哋自細就俾人話懶同蠢,其實佢哋係聰明,所以佢哋好忟,做好多奇怪行為俾人鬧,形成惡性循環。」

兩女不似自己

談起兩個女兒,Ann感到窩心,她笑言女兒樣子不似自己,「樣同性格都似我老公多啲,大女比我靜,細女比我更活潑,所以我喺中間。」媽咪曾是花式溜冰健將,兩女遺傳了舞動基因,皆熱愛跳舞,細女有玩體操、武術。 息影後從不斷進修,到真正接觸無數家長小朋友,所得到的經驗,對自己教女也相得益彰,「進修期間一路提高對小朋友嘅知識同心理學,都幫到自己小朋友,例如點同佢哋傾偈、點樣教導、點分輕重。」在其他小朋友面前,Ann是一個仁慈的專家;在女兒面前,卻管得比較嚴,「我唔係嚴得好緊要,但我有規矩,個女要明白。佢哋覺得我嚴啲係好㗎,有時佢哋講其他同學發生咩事,就慶幸我係佢哋媽咪,唔俾佢哋做啲咁嘅嘢,好彩我嚴。」 兩女已踏入青春期,理應較多少女心事,Ann笑言幸好她們較成熟,明白事理,「唔多唔少總會有,佢哋試過喺學校同同學嗌交、俾人蝦,但佢哋處理得好好。」自建立家庭以來,Ann堅持擺最多時間在女兒身上,為了家庭她亦無意復出,「一有時間就俾晒佢哋,自己係冇晒私人時間。」

媽咪不是女神

處理過眾多有考試壓力的小朋友,Ann更堅持不做虎媽,甚至令女兒覺得媽咪太不着緊,「我唔緊張佢哋成績,仲俾佢哋話番我唔緊張,有次大女話佢考到幾多分,我話咁咪好囉!佢竟然話:『係你先話好㗎咋,其他人唔會話好囉!』我覺得佢哋盡咗力就得,尤其十幾歲嘅女仔,喺學校、朋輩已經受好多壓力,會同其他人比較分數。」 受媽咪影響下,細女都有意從事臨床心理學,「細女久唔久有跟我返工,大女都有,因為我哋有時會同小朋友、年青人開小組,佢哋都一齊參加。」媽咪曾是女神級明星,兩女間中都有上Google、YouTube重溫媽咪的舊作,但不覺得媽咪是大美人!「我對佢哋嚟講一啲都唔靚,哈哈!佢哋知我拍過戲,間中睇報紙雜誌會見到我,久唔久都有YouTube我,但都係睇短短一段仔。細女試過細個返學學上Google,佢話同學Google我,哈哈!佢哋都慣咗!」 媽咪入行八年後,才找到真正的興趣,

女兒會否想一試星途,再看出路?「如果佢哋想入行的話,好難唔俾佢哋嘗試,但點都要讀完書先。」

●撰文:Ling
●攝影:Paul Choi(部分相片由受訪者提供)
●場地: 數碼港Smart Space(tel: 3618 5875)

你有獨家湊BB心得嗎?

更多精選內容