拜年爸媽最怕 6大令人翻白眼的人和事

拜年爸媽最怕 6大令人翻白眼的人和事

媽媽由細到大嘅農曆新年,都要去各大親友家拜年,今年亦都唔例外。有啲親友,幾年都唔會見一次半次,唔知係咪少見,佢哋對你嘅大事小事都顯得特別「關心」,而我就特別怕遇到以下呢類親友!

1. 拜年爸媽最怕亂說話的人

親友甲: 「做乜唔叫人呀?唔叫人係無禮貌呀!您唔乖呀!唔乖嘅小朋友,無人愛啊!」

親友乙:「吓,呢件係您新年新衫呀?邊個買比你?咁肉酸嘅!」

親友丙:「你爸媽寧願同阿邊個邊個應酬,都唔得閒理你啦!」

~嘢可以亂食,說話唔可以亂講呀!一年唔見您幾次,就講埋呢啲說話!請唔好忽略我小朋友嘅感受~

2.愛比較的人

親友甲:「阿邊個個仔定個女,十個月大時識行啦!(嘩!)你個小朋友連爬都未識呀?會唔會有問題呀?」

親友乙:「仲有阿邊個個老公,今年升職加薪,做佢老婆真係幸福囉!」

親友丙:「喂,你今年考第幾呀?吓,阿戊年年都考頭三名喎,你比啲心機啦!」

~人比人比死人啊!難道你阿爸又係李家X咩?~

3.零衛生的人

親友甲好似當人哋屋企好似係鋪頭咁,見嘢就摸,摸完手都唔抹就想摸或餵小朋友食嘢!

食完賀年食品嘅親友乙,咀又未抹,又徒手撩牙,之後更想哄埋小朋友塊面度表示愛意!(喂!媽媽表示受不了啊!)

~媽唔係懶緊張,而係個人衛生係基本常識啊~

4.假關心的人

親友甲:「你人又靚,條件咁好,做乜無拖拍呀?係咪你眼角高咋?」

親友乙:「你哋仲逗利是呀?下年好派啦!其實你兩個打算幾時結婚啫?有計劃未呀?唔好拖咁耐囉?」

親友丙:「哎呀,你哋年紀都唔細啦,幾時生返個bb玩呀?有bb先熱鬧,先似返個家呀???」

親友丁:「幾時生多個呀?唔生???個仔/女好孤獨/好悶喎!」

~你嘅人生就好似係佢嘅事~

5.扮專家的人

親友甲乙丙丁xN:「我話比您知,湊小朋友唔係咁湊/沖奶粉唔係咁沖/小朋友唔係咁教/小朋友要打下先聽話呀…我以前咁咁咁湊,都湊到佢地大啦…然後,下刪100萬字!!!」

~每個小朋友都係獨一無二,只有父母先係最了解自己嘅小朋友,請別管我嘅管教方式~

6.亂俾嘢的人

請唔好亂俾嘢食我小朋友食呀!雖然未必真係俾咗小朋友食落肚,即使係玩吓,其實唔多唔小都破壞緊我哋嘅教育方式。(特別係明知小朋友唔應食太多糖果、汽水呀,有啲親戚就係鍾意同父母唱反調,偷偷地俾小朋友吃喝!)

請唔好亂俾嘢食我小朋友食呀!請唔好亂俾嘢食我小朋友食呀!請唔好亂俾嘢食我小朋友食呀!~

真人真事

以上大部份都係我真實遇過嘅情況,雖然我知道有些親友未必有心講呢啲說話/做啲行為,可能只係出於佢哋表達愛/關心嘅方式。但人生在世,大家可以聽完就算,唔洗太過在意嘅(因為認真便輸了!)。或者簡單回應一句:恭喜~我真係恭喜您啊!(註:當然如果某啲位家長認為會對小朋友造成影響嘅,亦可以用一個婉轉嘅方式去制止,別害怕難堪啊!)

哈哈~藉此我們一家都預祝大家新年快樂、身體健康啊!

*********************************

(以上資料更新至撰文當日)

聯絡電郵:[email protected]

最近開始玩IG,歡迎追縱:allaboutalfred

最近開始玩YouTube,歡迎追縱:allaboutalfred

追踪更多育兒生活分享,請按Alfred成長日記

下一頁︰媽媽日常之十個反白眼時刻

虎羽有云︰媽媽日常之十個反白眼時刻

你又點睇?

更多精選內容