暖男 張達倫 愛妻號

從《愛.回家》的律師嚴謹,搖身一變成《全職沒女》的藍調歌手Fantastic,再到《不懂撒嬌的女人》暖男Oscar, 張達倫 (Max)希望四年嚴謹之後,能跳出框框帶給觀眾其他感覺,難得接到Fantastic 一角夠玩味。「我好鍾意Fantastic,佢好離地,直頭傻㗎,有時做演員最好玩就係試唔同嘅嘢;而《撒嬌》我係專登剃走頭髮『的水』,唔係好似嚴謹成日gel 晒頭好工整好靚仔。」

被網民大讚「咀角都有戲」的達倫,現實中也是一名暖男,對懷孕愛妻陳鳳玲(Kimmy)照顧得貼貼服服,今次他首次帶同Kimmy 接受專訪,兩人經常對望甜笑,「閃盲」旁人。今年10月兩人將迎接B 仔出世,預產期比達倫的生日僅早一天。達倫認為生日、父母親節等節慶,應該與父母慶祝,「我生日每年都希望同媽咪食飯慶祝,嗰日最辛苦其實係媽咪,唔係我㗎!」

●撰文:Ling
●攝影:Issac Poon(部分相片由受訪者提供)
●化妝:King [email protected] MAKEUP
●髮型:Arthur [email protected] COLPO
●服裝:Wagamamaplayground
●場地: 中環石板街酒店Gradini Ristorante E Bar Italiano (tel: 2308 3088)

最對的時間重遇 愛屋及烏

張達倫 與Kimmy早於大專時期認識,Kimmy是達倫哥哥讀酒店課程的同學,當時兩人都各自有男女朋友,沒有撻着。縱使相識多年,一直有聯繫,但各自有生活,Kimmy曾與一名外國人結婚,育有一個囡囡,現已13歲。離婚後與達倫在一個聚會中重遇,方發覺雙方就是Mr. and Mrs. Right,拍拖兩年決定拉埋天窗,影婚紗相都帶同繼女一齊去,愛屋及烏。雖然達倫與繼女並非一齊住,但仍時刻關心對方,每逢周末見面,他讚繼女的性格樂天,思想正面。「我哋關係十分之好,我同佢好似朋友,我都大唔透。喺呢個時代唔可以再用長輩同後輩之分,小朋友唔會想同你溝通,佢哋已經成日對住部電話,你再敦起個款佢哋睬你都傻啦,所以我同佢會保持朋友關係。」Kimmy指囡囡也很喜歡繼父,出街食飯都會叫繼父一齊,又留意他所演的劇集,「佢話Fantastic個樣搞咩呀?依家可能興青靚白淨型,睇唔慣。」達倫笑言他這類「鬚根型」就快絕種,希望阿仔將來都有鬚根。

兩個月一索得男 快過黎諾懿

去年11月達倫與Kimmy拉埋天窗,婚後睇中醫調理身子積極造人,結果兩個月就一索得男,現陀B五個多月。「都冇咩秘訣,醫生有講咩日子大機會啲,但返工咁邊有精神呀?瞓多陣好過啦,所以跟唔足,就算跟足都好大壓力。我覺得係個天整定,我哋試第一個月,驗咗冇喎,原來真係咁難㗎?再試多個月就好好彩,個天畀我哋,所以最緊要放鬆啲。」

被好兄弟黎諾懿拍片「挑機」催生仔的達倫,與好兄弟同樣一索得男,更快過諾懿造人半年,他的囝囝叫「小春雞」,自己個仔秋天出世,可以叫「大秋雞」!「佢都好開心嘅,仲話我咁快搞得掂,大家個BB同年。」兩人已計劃將來帶兩個仔一齊出去玩,互相照應,彼此的友誼延伸到下一代。「兩家人會有好多gathering,我老婆同諾懿老婆Nicole都好friend,所以一齊出嚟肯定好開心,大家交換湊仔經!」成為新手爸爸兩個月的諾懿提醒達倫,現要盡量爭取時間睡眠,BB出世後就無覺好瞓了。「佢講到好驚咁,搞到我依家真係有得瞓好瞓。」

兩家人 湊成「好」字

未知道BB仔或女之時,Kimmy的繼女好希望媽咪生女,因習慣了一屋女孩,又可多個妹妹一齊玩,當她知道是弟弟之後有點失落,Kimmy說:「佢未試過同咁細嘅男仔相處,平時同開表姐表妹玩,啲親戚都係女人。」

達倫笑言生仔生女都好開心,但他坦言生仔會令兩邊家族感覺圓滿一點。「我阿哥啱啱生咗個女,老婆幾個家姐全部都係生女,加埋我繼女,所以今次係仔就覺得成件事好圓滿,唔使再生都得啦。」真的一個夠晒數?「唔知呀,睇吓生咗呢個點先啦,生多個對阿仔嚟講有個照應,好多人都叫我生多個嘅,隨緣啦。」

 

距離10月預產期仍有一段時間,達倫與Kimmy的心情已經既開心又緊張,達倫話未開始上堂學湊仔,現階段只是邊睇邊學,剛誕下囡囡的哥哥和諾懿是他的學習榜樣。「我望住阿哥點抱女,應該抱邊個位;諾懿又示範一次教我點換片,要注意啲乜,好似一開條片BB以為好放鬆,咩都射出嚟,佢教我同BB鬆一鬆先,等佢屙咗先再換。」

爭取「包包」做新抱仔

《愛.回家》一班演員像家人般親密,達倫、諾懿與同劇的徐榮最老友,閒時一齊踢波,連徐榮外母都很熟稔,屋企食飯都叫埋達倫一齊,現在三個男人圍埋就傾湊仔經。「我哋三個好投緣,真係兄弟咩都講,唔會留有餘地,大家心照。我同阿榮又住得近,成日踢波,有時佢會叫埋我上佢屋企食飯,佢哋屋企gathering落樓下酒樓食飯,佢外母都會叫埋我。」徐榮的可愛囡囡徐心怡(包包)都有客串過《愛.回家》,氹得成班演員好歡喜,達倫和諾懿打趣謂,「大秋雞」要和「小春雞」爭包包做新抱仔,上映「春秋之爭」!達倫笑說:「佢真係好得意,對眼好似識講嘢,你望住佢就覺得好冧,佢一笑直情軟晒。」

做針灸 肥肚不肥身

Kimmy懷孕後仍然明艷照人,步伐輕盈十分上鏡,她透露現約重了六磅,肥肚不肥身主要靠針灸。「食嘢方面冇乜轉變,只係戒凍飲同生冷嘢,但就有做孕婦瑜伽同針灸,幫助媽咪只會肥肚,依家BB生長得幾好,我就反而瘦咗。」照超聲波後發現BB size適中,手腳偏長,似足父母較高個子。

現正拍攝新劇《大帥哥》的達倫,特別多謝張衛健令整個拍攝檔期較鬆動,集中於晚上拍攝,日間他有時間陪老婆產檢。「我哋盡量安排產檢喺朝早,因為我多數夜晚開工到凌晨,朝早就陪到老婆。」Kimmy甜笑點頭,滿意老公的貼身照顧,幾乎每次產檢皆陪伴左右。「我每星期都出去睇中醫,有時佢開到朝早七點返嚟,瞓一個鐘又起身陪我。」達倫回應道:「我做到就會做。」

達倫揚言老婆生得之日一定會陪入產房,見證囝囝出世一刻。「老婆陀住個B咁辛苦,我冇嘢幫到手,如果連陪產都唔去支持,唔可以當自己係爸爸囉。」但一想到剪臍帶,他有點卻步,「我都會試吓,但我有啲驚囉,個感覺好似剪手指咁……生完再同大家講有冇剪到呀。」Kimmy仍未決定順產或開刀,原本想開刀,但醫生建議她順產,Kimmy會於最後兩個月作決定。

「霞姐」自薦幫手湊

BB出世後主力Kimmy湊,達倫要努力拍劇搵奶粉錢,而Kimmy將會做在職媽媽,繼續會所康樂的工作,達倫說:「我返工時間太唔穩定,有時間一定會湊,所有時間淨係畀工作同湊BB。」

兩人已聘請工人姐姐幫手家務,Kimmy強調不會依賴工人姐姐湊BB,只會做家務為主,「我會親自湊,想BB跟我唔係跟姐姐。」不過,Kimmy對請陪月比較抗拒,達倫在《Sunday Kiss》的facebook live當中,亦公開諮詢讀者的意見。「好多朋友好似張繼聰叫我一定要請陪月,姚瑩瑩都話一定要請,但我老婆好抗拒,唔想屋企咁多人,叫我媽咪幫吓手就夠。」

Kimmy解釋不想多個陌生人,叫她做這樣那樣好煩擾,「煮嘢食已經有工人姐姐幫手,我又買晒陪月天書,搵咗坐月餐單,我覺得都夠,唔鍾意人哋叫我做乜做物,鍾意自己一手一腳plan。」她打算做母乳媽媽,會經常起身餵奶,覺得就算有陪月都幫助不大,「係塞乳嘅時候會幫你通番。」達倫對此仍心大心細,但最重要還是老婆覺得舒服,由她作決定。

其實不請陪月,可以考慮找「霞姐」幫手湊!同樣家有繼女的熒幕情侶「霞姐」楊卓娜,竟向「嚴謹」自薦幫手湊仔!「佢話好鍾意細路仔,好鍾意望住細路仔個感覺,同埋依家細女開始冇咁黐佢,有少少失落,所以想過嚟黐我哋金糠,睇吓我畀唔畀機會佢啦,哈哈!」

你有獨家湊BB心得嗎?

更多精選內容