正生學生變導師 脫胎換骨

從長洲乘街渡來到位於大嶼山芝麻灣的正生書院。夏日炎炎，王Sir王泳輝正帶領着正生書院的學生跑步。揮汗如雨，卻揮不走所有的歧路和改變帶來的回憶。王泳輝生於1980年，在西環木屋區長大，是家中大仔，有一妹一弟，家境正常。九歲讀本區一間名牌小學三年級時，因用可樂樽打鄰班同學，被趕出校。「我當時還一心諗住留校，拿了從媽媽手上辛苦得到的五百元，報讀學校的電腦班，我求校長不要趕我出校，但我好記得，校長即時俾番啲錢我，跟我講：『我要你走，你唔走，你細妹都唔使旨意入到嚟讀！』我回應：『好，我走，但你記住俾我細妹同細佬讀喎！』」王泳輝結果插班到灣仔一間專收新移民的學校，那間小學的草叢裏埋藏着不少木棍和水喉通，同學隨時準備「開片」。「九歲，我加入了黑社會。唔係有人踢我入，係我自己入，因為有個同我好老死嘅同學，佢俾人蝦得好慘，第二日竟然好威風，佢搵咗個大佬嚟打人，響學校門口接佢，我覺得呢個世界，保護自己， 係咁架啦！我就跟咗同學個大佬，加入黑社會，順便掂埋毒品。」九歲的他想改變，結果如願以償，只不過變得更壞。

十九歲加入正生書院
他說自己那時性格暴躁，吸食白粉後變本加厲。「有次跟朋友準備睇戲，一架客貨車衝紅燈，幾乎將我撞倒，我哋三個人，即刻拖咗個南亞裔司機落嚟打佢一身，點知佢好強壯，打極佢都有能力起番身，我就響報紙檔拎起張摺櫈，打咗佢好多下，佢企番起身，我把摺櫈反轉，用骨位打咗佢十零下，佢至企唔番起身。我逃跑時當場被警察捉住，對方昏迷咗四日，縫咗三十幾針。我無得保釋，因為警方驚佢隨時死。我申請保釋時，裁判官話，你睇吓被害人張相，我睇完呆咗，對方傷得好嚴重，我好內疚，到咗今日，我都好內疚。」王泳輝被判社會服務令，最後因吸毒完成不了，輾轉被送到短期戒毒中心，並遇到一個從正生書院畢業的職員，內心非常震撼。「我從未見一個同我背景一樣的人，係咁正面。我從來唔知，原來我都有機會變得好好。我好似走進另一個世界：原來人可以咁美麗。我好想試吓改變！」為了證明自己的決心，他把自己的一頭長髮剪短了，理成了一個「陸軍裝」，走進正生書院。

一件小事震撼心靈
事後回想，王泳輝認為，令他改變的，不是大道理，而是一些小事。「有一次，我同校長參加分享會，經過旺角，有人派傳單。我很怕接傳單，他們夾硬塞進俾你，以前總會撩起我的無名怒火，我會一手推開他，再不罷休，甚至會打人。現在我不能打人，我應該點做呢？」他靈機一觸，悄然躲在校長背後，看校長將會怎麼做，只見陳兆焯校長微笑着說：「不用了。」他感到很震撼，竟然如此簡單，可以用這種方式對待別人。

王泳輝說，人的改變，總是一點一滴。「老師每一個動作，都在體現一種價值觀，都在影響別人。我們強調要在生活裏感受這一切。」問王泳輝在正生書院的具體工作，他答：「我主要工作，就是跟同學生活在一起，其次才是教拍片、教野戰、教中國茶道。」這三樣東西好像每樣都不同，但他說其實這些都能讓人學到注意細節，令人變得「纖細」。「即使是野戰、打擂台，最需要的也不是力氣，而是『纖細』，我會讓學生拍學校新聞片，拍一些生活點滴，在每月的家長日播放，最近我們播放的專輯是學生參加散打比賽，個個打到鼻腫面青。我們的信息是，以前是打架，現在是站在台上按照規則擊敗對手，是攞分，不是攞命。」王泳輝任職正生書院導師六年後，與太太結婚，結婚地點是正生，證婚人是校長，而負責攝錄婚禮是正生學生。王泳輝在正生經歷很多，他亦希望自己能見證學生的轉變，說將來會把學生的影片剪輯成電影，甚至希望參加影展，讓更多人知道他們重獲新生的故事。

撰文：張帝莊
攝影：謝民光