生巨B 好湊啲？ 家庭專科醫生拆解風險
撰文：Sunday Kiss 圖片：陳倩揚Facebook專頁、新傳媒資料室
三胎都係標準Size
倩揚話，佢個肚雖然大，不過兩個囝囝，同而家陀住嘅囡囡，體重都係喺3.33kg左右，醫生話呢個體重係標準同正常架！
巨B其實難湊啲？
喺醫生嘅角度，其實巨B真係難湊啲㗎！好多媽媽都會喺懷孕期尾段谷肥BB，其實BB如果喺母體吸收豐富養份，但出世後消化系統的運作未及暢順，就會有機會令血糖過低，甚至出現抽筋等情況。所以巨B出世後，好多時要入箱觀察。朱醫生話，而家嘅婦科檢查，已經十分精準，所以醫生唔會鼓勵谷肥BB，一般BB體重喺3kg ，6磅左右，就最為理想。
陀巨B 增妊娠糖尿機會？
BB太大（超過4kg)，媽咪陀住佢，身體負荷亦都會大啲，而且亦都會增加妊娠糖尿嘅風險。好多孕婦以為過咗22周，驗過冇妊娠糖尿嘅問題，就可以放心谷B，但係當時驗到冇，之後都可能驗到有，所以只要Keep住BB喺一個標準嘅Size，就已經足夠。
順產開刀一樣高風險？
朱醫生話，BB size 太大，無論係順產定開刀，都一樣會令風險增加。首先講講順產，因為BB出咗產道就需要呼吸，如果Size太大，頭出咗嚟，但膊頭位太大卡住，就會影響呼吸，所以醫生如果遇到呢種情況，就算拉斷琵琶骨，都會先將BB拉出，以保BB性命。
至於開刀生產，由於子宮嘅空間其實係好窄，所以BB太大，醫生開刀嘅時候，每一層都要𠝹大啲同𠝹深啲，所以母體嘅傷口都會大啲。其次，就算係開刀生，BB都一樣要頭仔出嚟先，醫生伸手入一個咁窄嘅空間，將BB攞出嚟，難度亦都會高好多，亦都增加咗整傷BB嘅風險，對BB，對母體，都有一定嘅傷害。
谷大B 會叻啲？
坊間流傳，谷大BB，除咗出世之後好湊啲，BB都會叻啲。但朱醫生就話呢個只係一個美麗嘅誤會。其實小朋友嘅腦部，到8歲先怕發展成熟，所以胎兒仲喺母體嘅時候，就要靠母體去保護發展並未成熟的腦部。正如剛才所講，子宮嘅空間好有限，如果BB太大，就會令BB受到不必要嘅壓力。所以亦都唔存在唔夠磅，就會輸在起跑線嘅問題，等BB出咗世之後，仲有好多時間可以好好培育佢。
