童星 雪兒 瑞典白色聖誕

撰文：Ling
攝影：相片由受訪者及有關機構提供
鳴謝：將軍澳中心

黃雪兒Profile

姓名︰黃雪兒Nicole
年齡︰6歲半
學校︰德雅小學一年級
曾拍攝作品︰TVB《幕後玩家》、《愛回家之八時入席》、《老表你好HEA！》、《警犬巴打》等
電影︰《紀念日》、《寒戰2》、《賭城風雲3》、《小男人周記3》等
廣告︰維多C、維特健靈、ICAC、星晨旅遊、運輸署、新濠天地等

背對白快過背默

雪兒在《幕後玩家》飾演黃宗澤（Bosco）與龔嘉欣的女兒心心（秦應心），劇中她與龔嘉欣母女情深，還要表演唱歌、有喊戲，令人留下印象。「真媽咪」Jennifer 指女兒獲TVB 邀請casting， 要考唱幾首歌及表演〈太陽花〉， 她們隨即開YouTube 練歌。「casting 當日佢同導演對答，導演讚佢6歲對答得好好，之後唱歌佢一路唱一路擺動作，就揀咗佢喇。」

拍攝期間，雪兒的6歲生日撞正拍攝日，龔嘉欣即買生日蛋糕與成班演員陪她慶祝，令雪兒有個難忘生日。連平日最不喜歡默書的她，竟然喜歡記對白，媽咪讀一句，她讀一句，連帶語文水平也提高，至於點投放感情有導演和各演員教路，令她獲益良多。

最愛龔嘉欣黃翠如

同劇演員當中，雪兒最喜歡當然是劇中媽咪龔嘉欣，每場戲都見到她，「嘉欣姐姐對我好好，會買嘢俾我食，成日同我玩。」雪兒亦鍾意黃翠如，覺得翠如BB好靚女，好好人，希望大個都似佢咁靚。「爹爹」Bosco都好玩得，與張繼聰一齊整蠱「心心」，又一齊唱歌，不過後來「爹爹」拋妻棄女，見面時間比較少。

當爹爹與媽咪為小三鬧交時，心心在房門口爆喊一幕，Jennifer與導演叫她想一些不開心的事情，雪兒諗一陣就喊得出，Jennifer說︰「之前拍電影《紀念日》就諗妹妹搶佢玩具，覺得唔開心；依家大咗佢就諗我鬧佢，驚我唔要佢。」Jennifer笑女兒是個喊包，見人喊佢又喊，「大結局Bosco臨死一幕，導演無要求佢喊，但佢見到個個都喊，爹爹又咁慘，自己都忍唔住喊埋一份。」

一歲半踏上童星之路

將近七歲的雪兒，已拍攝共過百部廣告、電影、電視劇及報章雜誌作品，是最受歡迎童星之一。雪兒一歲半時，媽咪Jennifer發覺囡囡有表演慾，便小試牛刀在一個網上小model比賽投寄相片，第一次就得到冠軍，為某健康品牌擔任小小代言人拍攝硬照，雪兒顯得好興奮，媽咪之後見到有相關比賽都為女兒報名，並吸引到模特兒公司睇中，從此踏上童星之路。

雪兒可愛的外表，3歲開始被《Sunday Kiss》睇中成為御用小model，做過多次封面人物，猶如看着她成長。近年她也被電影公司及TVB睇中，拍過電影《紀念日》、劇集《老表你好HEA！》、《愛回家之八時入席》、《警犬巴打》等等。不過雪兒升上小一之後會減產，必須學業為重，暫未接拍新戲，想睇雪兒的粉絲，恐怕有點失望了。

媽咪Jennifer負責為女兒接job，一定先問准女兒有冇興趣，有時間有興趣才做，不擔心被外界批評當女兒搖錢樹。「就唔到時間就唔接o架喇，盡量學 業就先，考試測驗期都唔會接，多數星期六日或平日得閒先做。其實我哋唔係為錢去不停搵嘢俾佢做，咁啱有佢鍾意嘅嘢，先俾佢當興趣班去做，抱住俾佢玩嘅心 態。」

培養大膽敢言的性格

雪兒經常在大小媒體曝光，就讀的德雅小學沒有詐型，返回學校還是普通學生一個，一來大部分老師都不看電視，二來雪兒返學架上眼鏡，師生都不太認得她，即便有同學問起︰「尋晚喺電視見到你！」雪兒只會淡然回應︰「係呀。」媽咪時常提點她，做人不能驕傲，不能「晒命」。

雪兒因拍攝多接觸不同人士，性格不怕陌生、敢言、勇於表達自己，間接令她的中英文成績較佳，亦沒有因為工作影響了學業，總成績在中上。報考德雅面試時亦有着數，面試時被要求講故事，平時見慣大場面的她沒有怯場，流暢地講完；上堂亦會主動舉手答老師，清楚表達到自己，都是從工作帶回學校的得着。

德雅是傳統天主教私立學校，重視品德培育，下午特設「功課堂」，鼓勵學生在堂上完成功課，返屋企享受親子時間，Jennifer笑言囡囡做功課做得好快，幾乎每日在學校完成，家長毋須勞氣教導。

瑞典睇極光坐馬車

12月初雪兒獲商場邀請到瑞典參加「國際聖誕老人運動會2016」，為香港兩位聖誕老人打氣，面對難得的學習機會，雪兒獲學校批准放假八日參加，派定功課自行學習。老師更理解雪兒從極地返港後疲憊不堪，開明地說功課可以慢慢做，俾足夠時間她休息及追回進度。

八日的旅程中，雪兒跟大隊去了瑞典首都斯德哥爾摩、第二大城市哥德堡和聖誕老人故鄉耶利瓦勒（Gällivare），得到了多個人生第一次︰第一次去嚴寒地方、第一次睇北極光、第一次餵鹿、第一次坐馬車……雪兒超級興奮，一直渴望睇雪的她可以玩雪玩餐飽。Jennifer與雪兒兩母女一齊去，分享最難忘的片段，「今次睇到最原始、最傳統嘅聖誕老人，真係大開眼界！我哋仲好好彩睇到北極光，坐嘅馬車亦唔係平時睇跑馬嘅size，係超大隻！」

問到雪兒今年的聖誕願意，她說「未諗到」，最緊要玩得開心，而新一年媽咪對囡囡的願望與往年一樣，希望囡囡健康快樂成長就夠了。

瑞典白色之旅