facebook專頁有超過23萬粉絲的Celine,差不多每日都會上載生活照或短片分享快樂點滴。

【小創夢家】童星 Celine 平淡過後再演戲

育兒

廣告

今年七月將滿八歲的童星 Celine ,自出道爆紅後經歷低谷,近兩年一家人轉趨低調,讓 小創夢家做回平凡小學生。現就讀津貼學校二年級的她,一如常人返學放學做功課,假日才偶爾出席活動及做小model。習慣了鎂光燈下的 Celine ,不愁沒有活動,近年愛上了溜冰和芭蕾舞,可以穿上靚靚舞衣發洩精力, Celine媽指囡囡樂天、愛笑貪玩的性格,從沒有改變過。

Celine的表演天份毋庸置疑,父母聽過很多圈內人及專家意見後,要是囡囡有演藝才華,就不應埋沒,名DJ梁繼璋更贈言:「子非魚,又焉知魚之樂?」只有Celine自己才最清楚是否快樂。最近TVB再次找她參演新劇,她的積極投入已告訴大家,自己仍享受演藝活動。

為陳豪爸爸守秘密

今次新劇《來自喵喵星的你》由《鬼同你OT》原班人馬開拍,新加入了Celine做陳豪和胡定欣的女兒。去年11月,監製徐正康叫Celine去試鏡,當時有隻Celine時常在樓下探望的流浪貓被的士車死,不開心了一陣子,得悉新劇關於貓貓後非常雀躍!

Celine 與視帝陳豪和兩位視后胡定欣、田蕊妮做對手戲,比上次《愛我請留言》有壓力,當時5歲的她只需做回自己,自由發揮,但今次導演對七歲的她提高了要求,幸好 陳豪爸爸用心教導,更向她講人生哲理,令她好快入戲。 每次拍攝Celine媽均有陪同,事前兩母女會一起傾談劇本,沒有刻意背誦,到場後再由眾演員教導,她大讚陳豪非常有紳士風度、對小朋友溫 柔,Celine都大叫「好鍾意佢」,兩人更收藏了小小的秘密,「唔講得㗎!秘密!」關於甚麼?透露少少也不行?「秘密!」陳豪講秘密,沒有選錯人。

一講到沖咖啡,Celine就話講得,陳豪爸爸有示範沖咖啡,她驚訝「啲水會自己郁㗎!」不過Celine齋睇唔飲,聞到陣味就嫌苦,拒絕爸爸「唔要呀!」陳豪咖啡只加奶不落糖,味道好濃郁,並非個個頂得順。

不應埋沒演藝才華

為免影響Celine的學業,她的戲份只會假日拍攝,TVB在處理童星的拍攝時間表非常嚴謹,需要學校校長簽發「在學證明書」,之後上報教育局及勞工處,拍劇只能視為課餘活動。Celine爸承認,囡囡在幼稚園時期的model工作頗多,但自上小學後已大大減少,只是Celine有知名度,所拍下的廣告仍在不同媒體出現,令大眾覺得她仍密密工作,擔心她失去應有的童年。

決定讓她繼續走在幕前,Celine爸媽覺得只要不影響學業,只要她喜歡就無所謂,Celine爸說:「有專家同我哋講,如果將一個鍾意演藝嘅小朋友收埋,即係親手將佢嘅才華毀滅,咁樣先係對Celine最壞同唔公平嘅決定,所以我哋冇刻意收埋佢,有任何工作都會先問佢意願。」
Celine熱愛表演,在冰場一樣有得發揮,穿上靚靚戰衣擺出各種優美姿態。
Celine媽指囡囡開始進入甩牙階段,或許是她的轉捩點,「佢大個咗有自己想法,可能甩牙後佢覺得自己醜樣咗,跟住消失於人群中……」同樣身為爸爸的DJ梁繼璋,與Celine接觸過後與他們分享道,「佢真係好開心,佢好enjoy表演,既然佢視之為興趣,就由佢enjoy落去,到佢有一日覺得悶想放棄,咪由佢囉。」

渴望當「冰上小公主」

其實要滿足表演慾,並非只有演藝工作,近兩年Celine愛上了溜冰和芭蕾舞,一樣可以閃耀舞台,說不定將來Celine選擇當溜冰運動員或芭蕾舞者!拍攝當日Celine穿上了「Elsa色」溜冰戰衣,原本戰衣是比賽用,但因病缺席,今次補償番,Celine媽說:「上次我冇話佢知要比賽㗎,希望佢可以輕鬆啲,今日佢問番我點解件衫咁靚,我先講番之前比賽用,佢問點解冇去嘅?」

Celine一學溜冰就上癮,享受當「冰上小公主」,在冰面自由滑翔,她最喜歡跳躍、轉圈,但不喜歡後溜,「成日叫佢試吓後溜就嗌,可能未掌握到技術。」

得到學校支持

一家人經歷過低潮後,Celine爸媽希望囡囡成長快樂,能堅毅面對逆境,人生有高低起跌才能成長。溜冰訓練正可學習跌倒起身,再滑翔,藉以鍛鍊人生,Celine媽說:「溜冰改變咗佢好多,平衡力好咗唔驚跌,跌倒都唔會喊,多咗份毅力,EQ亦高咗,有時細佬發脾氣佢會話:你慢慢嚟,唔好急。連帶芭蕾舞都受惠,老師讚佢進步咗好多。」
學校老師對Celine的評價亦高,縱使她不是成績卓越的學生,但她安守本份,盡量利用小息時間完成功課。而她樂天的性格,亦感染了老師和同學,Celine媽感謝學校一直支持囡囡,去做她喜歡的事情,從沒有「詐型」她做小model和拍戲。「校長、老師話佢好純真,唔似一般童星帶點高傲,佢返到學校都係做普通學生,同學都好鍾意佢。」


年初Celine一家推出親子書《快樂巧孩子.楊鎧凝》,剖白了一家人的高低起跌,一篇《給女兒的信》中,Celine媽自言為了女兒,早已放下一切不快,期望Celine能珍惜機會,繼續做喜歡的事,成為最好的happy girl。
 
●撰文:Ling
●攝影:Clay Lam (部分相片由受訪者提供)
●場地:又一城歡天雪地 (tel: 2844 3588)

你認同嗎?

更多精選內容