【虎羽有云】與毛孩相處的四大禮儀

【虎羽有云】與毛孩相處的四大禮儀

同小朋友外出,總有機會遇上毛孩。有時候佢哋爸媽都會邀請小朋友去同毛孩互動,以下有幾個小貼士俾各位同毛孩們互動時愉快相處。

撰文、圖片:虎羽有云|編輯:Sundaykiss

一)讓小朋友觸碰毛孩前先問毛孩嘅主人

如果有人唔問你就摸你小朋友嘅身體,你都會覺得有問題吧?毛孩嘅主人亦一樣。而且每隻狗狗脾性唔一樣,唔一定鍾意同小朋友相處。先問準主人,除咗係應有禮儀亦係安全第一步呢!

圖片:虎羽有云

二)不要突如其來嘅觸摸

任何人失驚無神掂你,你都嚇一嚇吧。要教導小朋友掂毛孩前要先俾毛孩嗅一嗅小朋友嘅手仔,等佢明白小朋友唔係攻擊佢,雙方確認冇敵意就俾佢哋接觸吧!

圖片:虎羽有云

三)餵毛孩食嘢嘅手勢

唔止小朋友,其實連大人好多時餵狗狗食嘢嘅手勢都習慣用兩隻手指揸住粒零食俾佢食,咁係大錯特錯。你兩隻手指有機會仲大過粒零食,同埋毛孩們心急起上嚟,點樣可以同你玩IQ避障礙物咁避開咬唔倒你兩隻手指?

將食物擺喺你嘅掌心,咁狗狗就好難咬到你喇!

雖然小虎係隻食得好溫柔就哂力嘅哥哥,但因為魔王芊實在太唔怕狗實大把機會餵其他狗仔,所以最近我哋都開始教緊佢正確餵小虎食嘢嘅手勢了。

圖片:虎羽有云
圖片:虎羽有云

四)大人必須看顧

連小朋友都會打交搶嘢,就算毛孩幾錫小朋友,都有機會佛都有火㗎。而且大部分嘅嬰幼兒初期接觸動物,都唔識就力(但一定要教!唔好以為BB仲細你教佢佢唔識咩叫細細力,你唔教,佢就更加冇機會識。)整痛毛孩佢哋反抗係人之常情。大人真係要好好睇住呢。

圖片:虎羽有云

以上係Wilma媽嘅小心得,其實只要識得同毛孩相處嘅禮儀,小朋友同動物玩真係百利而無一害(已有好多報告/醫生證實杜絕小朋友接觸致敏原其實更易有濕疹同病呢!),亦係教小朋友善待生命嘅最好實踐同教育。

圖片:虎羽有云

更多精選內容