「蜘蛛媽媽」 鄭麗莎  三胞胎隨時生得

「蜘蛛媽媽」 鄭麗莎 三胞胎隨時生得

曾揚言要生夠半打的「蜘蛛媽媽」、包山后 鄭麗莎 (Lisa),2014年誕下囝囝汪晉頤(晉晉),今年她向生仔目標邁進一大步,早前宣布一陀三胞胎,兩女一子,連同晉晉,兩年間已湊成兩對「好」字。30歲之齡已經生四個,想生六個絕對不成問題!

 

撰文:Ling
攝影:Clay Lam(部分相片由受訪者提供)
化妝︰WiL [email protected] MAKEUP
髮型︰Wilson [email protected] MAKEUP

懷孕踏入32周、挺着42吋巨肚的Lisa,已執好走佬袋準備隨時早產,三個BB分別重近4磅、3磅半及3磅,她希望可以陀到34周後,BB強壯一點連氧氣箱都不用入,立即湊返屋企展開六口家的生活。距離目標周數尚餘兩周,已密密見醫生產檢,醫生話一feel到有問題就要立即剖腹,「到時由邊度攞出嚟先就邊個做大孖喇!」

03_276K_family
現時腹中的兩女一男情況良好,唯一男胎已近4磅最重,亦是最奀皮,「成日feel到個仔郁來郁去。」

食排卵藥中三胞胎

已育有一子的Lisa,一直想追個「猴年BB」,覺得身心已準備好懷第二胎,諮詢過醫生意見後服食排卵藥,副作用是「多胞症」,果真中招!「得知有三個嘅時候好surprise,完全冇預計過,醫生建議過我減胎,因為三胞胎對媽媽同BB都有風險。」Lisa與家人商量過後,相信三個BB是緣份,亦有信心自己能夠撐得住,決定全數留下三個寶寶,「要減胎的話,作為媽媽嘅心態唔係幾好,好似要將佢嘅生命結束,要簽墮胎協議,聽到呢啲就好唔想囉。」 要陀好三胞胎,Lisa懷孕期間連最愛的運動也少做,暫停工作,專心留家休息,亦因為怕胎兒有任何閃失,想安靜養胎,直到懷孕中後期才向外宣布陀B「三喜臨門」。她透露今次陀得比上次辛苦,肚子亦大得多。「尤其是夜晚尿頻次數好多,尋晚都4、5次,加上BB們今次吸晒我啲營養,成日要提自己食嘢,但我個肚又頂住個胃,要少食多餐,半夜會起兩次身搵吓有咩食,食完瞓先覺得安樂。不過,整體嚟講唔算陀得勁辛苦,保持開心正面就OK。」

04_276K_family
Lisa與金融才俊丈夫Calvin皆受自己的家庭影響,渴望組織新一代大家庭,最好生夠六個,有信心會教好小朋友。

只重了7公斤

Lisa作為專業運動員,平日操開健身、攀石、拳擊、泰拳等,身形fit爆,體重徘徊58至59公斤,即使陀了三胞胎,每個重三磅多,但她的體重竟然只升至65公斤,非常奇怪!「醫生話三個BB夾埋10磅,情況良好,加埋胎水佢哋應該佔咗20磅,所以我啲營養係俾佢哋吸晒!」 媽咪們都好羨慕Lisa「長胎不長肉」,而且八個月大的「三胎肚」沒有特別巨大,「我連條腰都陀得直,可能我運動底,身體支撐到。」一般來說,懷上多胞胎的孕婦到30周就需卧床或坐輪椅,但她依然健步如飛,亦沒有腰骨痛、膝頭痛和水腫,毋須入院待產,只盡量留家休息,對好動的她也頗大挑戰,「我個人係完全坐唔定!依家最多都喺屋企行來行去、落街買嘢、同朋友喺附近食飯,有得出街個感覺舒服啲。之前仲有去公園散步,近期都少咗喇,淨係陪我大仔玩,算係比其他大肚婆郁得多。」

06_276K_family
Lisa揚言產後一定會盡快做運動,跑步、打拳、打跆拳等,非常期待,「我班死黨等緊我復出join番佢哋。」

目標34周出世

Lisa每星期都要見醫生產檢,但她的情況特殊,差不多每次都要排最後,就像等派成績表!而上星期的產檢報告指其子宮頸、BB大小和胎水都正常,如果任何一項「肥佬」就即安排開刀。「其實佢哋3磅左右已經算OK,因為三胞胎比較細粒,但我目標希望去到4磅,但醫生話數字唔係問題,最重要佢哋留喺我個肚耐啲會健康啲,希望可以等到34周之後生。所以28周時都打咗強肺針,令BB內臟、器官強壯啲,預防早產。」 上次大仔是順產出世,Lisa還覺得順產不算得甚麼,過程好快,身體迅速復元,今次則不得不開刀。「醫生話如果一feel到有唔妥入院,就會即時開刀,唔跟次序攞佢哋出嚟,所以都講唔實男定女係大孖細孖,邊個早幾分鐘出嚟就邊個大啦,總之會係近下面位置攞出嚟,左邊係女,右邊係仔,醫生由邊度攞出嚟先就邊個大喇!」

10_276K_family
晉晉性格好動坐不定,無時無刻都想發洩精力。

媽咪要休息

囝囝唔黐身 面對即將多了三個弟妹,大仔晉晉都有一點呷醋,間中不肯食飯、扭計、經常衝去攬實媽咪,但Lisa覺得晉晉應該未知何謂呷醋,打算生下弟妹後才正式教晉晉做大哥哥。「近排有啲朋友帶埋仔女嚟探我,有啲都係幾個月至一歲大,我見晉晉對其他小朋友都幾親民,鍾意同佢哋握手,低頭望實BB想錫佢哋咁,我諗佢都鍾意有其他BB陪佢一齊玩。」 懷孕前Lisa經常陪晉晉玩sit up、舉來舉去,但懷孕後精力下降,需經常休息,陪玩工作全交爸爸負責,「我依家唔敢同佢行得太近,因為佢好活躍、好反斗、好鍾意擒住我,想我同佢郁來郁去,所以近來都交晒俾爸爸同佢玩。BB真係好誠實,邊個同佢玩得多,就會黐邊個多啲,所以佢係少咗黐我,但我都唔理得咁多喇,唔會呷醋。」

13_276K_family
Lisa懷孕後減少與囝囝玩耍,交由爸爸做「玩樂大隊長」。

心儀一齊讀民生

雖然少陪玩,但Lisa對晉晉的學習很上心,為他報讀了playgroup發洩精力,亦安排他今年10月返N班,亦已有心儀學校——民生書院,希望囝囝可以一條龍升讀,並惠及三個弟妹。「民生嘅聲譽好好,環境又夠大,又喺我住呢一區,即使將來搬屋都想繼續讀。」無論如何,Lisa都希望仔女先接受本地教育,接受較嚴厲的規範,「先收緊再慢慢放鬆比較好,希望佢哋打好語文基礎,磨練一下先,將來再考慮國際學校或海外升學,爸爸都係外國讀書返嚟。」

14_276K_family
晉晉沖完涼露出「優質股」, 攤在床上好疏乎。

13歲夢想生6個

外表剛強的Lisa,內心母愛爆棚,打從13、14歲就夢想生六個,揀老公也要同意合作才下嫁,她更希望生多兩個達成目標,但家人紛紛說不:「包括我爹哋媽咪同奶奶,佢哋覺得好難湊,咁我都會聽佢哋意見,所以之後會順其自然,唔會再睇醫生做呢啲㗎喇,有就係意外啦!」 「生仔容易教仔難」,想孕育下一代要量力而為,有能力及有心教導才值得為人父母,Lisa對自己充滿信心,一定會好好教導這四個孩子。「我好有信心喎唔知點解,因為呢啲都係以身作則,我細個父母冇乜理我,但有做好榜樣俾我哋睇,到依家我哋一家人關係依然密切,我哋仔大女大仲好有父母心,我有呢種體會,將來都會同仔女分享。我同先生都有共識,覺得同屋企人嘅關係好重要,我哋有呢個concept支持,同埋以身作則做好身教,一家人就能夠維繫。」

12_276K_family
Lisa今次懷孕比上次辛苦,雖然沒有出現妊娠紋,但有爆根情況出現,又試過刷牙流牙血,洗面時一 又流鼻血,「止咗血冇嘢就當冇嘢啦。」

希望仔女輪流陪飲茶

Lisa上有兩個同為健身教練的哥哥,連任職投資的丈夫也玩開健身,堪稱運動之家。一家人經常結伴飲茶,樂也融融,Lisa也常幻想自己的下一代輪流與自己飲茶,立志要教好小朋友,為這個家帶來無限歡樂。「通常啲人都會諗負面嘢,幾個仔女亂咁跑死你呀!我都預咗嘅,呢個東奔西走,嗰個打爛嘢,另一個又亂咁畫,不過呢啲都係一個階段,好似晉晉之前BB都係一飯,慢慢識講嘢、爬來爬去、整爛嘢,依家就識拖住我行街等等,整體過程開心比唔開心嘅多好多。所以多咗三個小朋友都要正面睇,成長過程一定會附帶搞破壞、嘈喧巴閉等等,到長大成人輪流返嚟探我、同我飲茶,做埋阿婆阿嫲都幾過癮呀!」

 

Save

Save

你最關注甚麼健康話題?

更多精選內容