陳倩揚

被飛出《東張西望》陳倩揚自創天然品牌

育兒

廣告

無綫長壽節目《東張西望》明年一月大換血,主持多年的陳倩揚(Skye)與黎芷珊、麥雅緻 及林映輝等舊人會被調走,倩揚感慨道:「要推想要揣測的很多前輩早已一一說出,一朝天子一朝臣,你懂的。」聖誕後她將會收拾心情,迎接新的挑戰,希望來年向司儀界多加發展。

倩揚工作以外,是一個多才多藝的媽咪,從不讓自己停下來專心湊仔,積極扮靚、鑽研BB食譜、做生意,最近她更創辦了自家天然品牌,把興趣轉化成事業,包括自家製潤唇膏、蚊膏、保濕水等等,今個聖誕她親手做了大批貨品送禮,物輕情意重。

潤唇膏實用成本低

一向對手作有興趣的倩揚,自去年懷第二胎期間,有感孕婦不能使用化學物品,就萌生製作適合孕婦及BB的天然用品,以護膚品為主,「初初整俾自己用,又同其他媽咪朋友一齊學,之後整埋俾小朋友同送禮,反應都好好,就開始喺我屋企開workshop,
人哋打邊爐前開枱打牌,我哋就開枱整潤唇膏。上年聖誕都整過一批潤唇膏送俾人,之後個個都想我開班教,所以今年聖誕前都有開班教朋友同fans。」

冬日乾燥送潤唇膏好適合,200元的材料已可製作最少10支,「好容易㗎咋,材料仲可以整埋蚊膏、鼻敏感膏,小朋友冬天鼻痕痕流鼻水,呢啲天然鼻敏感膏就好啱。」出街買禮物價錢偏高,又未必合對方心意,手作護膚品卻只花少少時間,既便宜又有心意。「好似我一次過整50支送俾人,人哋學識咗又整50支送出去,真係一傳十、十傳百,將快樂傳開去。」

哥哥愛聞細佬隻腳

倩揚今年組成了圓滿的四口之家,為隆重其事,早已布置好家居,兩兄弟負責裝飾聖誕樹,倩揚最開心兩兄弟相處融洽,期待他們長大後變得更好玩!「夜晚返到屋企見到佢哋攬埋一,或者哥哥放學返嚟,第一時間捉住細佬隻腳又錫又聞!其實佢都係學我,因為我對住細佬都好肉緊,成日啜佢隻腳。」

多個人多個煩惱,倩揚覺得此話只適用於出世頭幾個月,「最辛苦都係眼瞓啫,其他嘢唔算辛苦,依家開始有收成,佢開始學行、食緊粥仔。細佬好鍾意哥哥,成日模仿哥哥嘅動靜,同哥哥一樣鍾意觀察,出街見到雀仔就好興奮。」

一屋男人輪流湊

倩揚被一屋男人包圍,笑言自己可以話晒事,辛苦得來都好開心,「通常第一個先處理哥哥,因為哥哥情緒轉變較大,好需要我嘅照顧,細佬暫時都係生理上需要,好似食飯、換片、瞓覺,到兩個瞓晒覺就到老公,又話呢度唔舒服、好,要幫佢按摩,煮嘢俾佢食,都好有挑戰性。」
想生多個女平衡一下嗎?倩揚沒有抗拒,但要問准老公先,「呢啲老細(老公)話事㗎!」陳老細笑說:「再諗吓,等佢兩個再大啲先啦。」倩揚都不希望分薄照顧兩子的時間,「我哋唔捨得再分少啲時間俾佢兩個,其實細佬已經冇哥哥咁多時間,所以我想對細佬彌補多啲,哥哥一返學,我就全程投入喺細佬身上。佢依家都好黐我㗎,我一拎手袋佢就望住我呀呀呀!」

遺傳爸爸數學狂

哥哥羲廷現就讀幼稚園K2,正摸索自己的喜好,暫時看得出他特別喜歡數學,可能男仔及遺傳自做科研的博士爸爸,倩揚說:「佢上數學興趣班覺得好好玩,返到屋企亦好enjoy去做,自己不停做練習。原本冇諗過咁早俾佢學,點知佢真係咁有興趣,每次出街食飯都要計數,自己出題目叫我做,甚至叫我出題俾佢做,連畫畫都鍾意寫字,包括數字。」
羲廷現時上的興趣班頗多,有游水、唱歌、彈琴等,重點每一項也學得開心,每次都好期待去上堂,倩揚堅持每報一個班都先與兒子溝通,確認他有興趣才報讀,「好似數學係佢話要去,仲要一星期一堂唔夠,想去夠兩次,佢好鍾意個教學方法,有時砌Lego、玩扭計骰或教concept。」

升小面試無壓力

羲廷即將面對人生一個關口,要開始準備小一,倩揚聽過不少媽咪指孩子升小一後,每日只有15分鐘玩樂時間,令她感到汗顏。「唔係呀嘛,15分鐘玩得啲咩呀?個媽咪仲話調整緊啲興趣班,希望加到半個鐘,我話吓!邊度夠呀!個媽咪仲覺得已經多咗一倍喇!我非常唔建議小朋友冇得玩!」
倩揚未正式開始揀學校,但心裏已有盤算,不會局限某類型學校,盡量讓兒子多參加面試熱身,「從interview當中可以多加認識學校,到時先再幫佢仔細啲揀,邊類學校先最適合佢。」要小朋友面對多次面試,會加重他們的壓力吧,「壓力係在於你俾唔俾個小朋友,呢個concept好緊要,因為小朋友應該未明白,對呢個世界未認識得咁深,有啲家長臨入去前係咁操,小朋友梗係有壓力啦。當小朋友問去做咩㗎?點解會咁嘅?你就話我哋去參觀學校啫,同老師傾吓偈,睇吓你鍾唔鍾意呢度。你唔俾壓力佢,佢就唔會覺得有壓力,其實小朋友直覺好重要,去到K3已經有能力話俾你聽鍾唔鍾意呢間學校,可以幫到父母揀。」

支持返半日學

無論最後揀哪間小學,都會變成全日制上學,倩揚希望取消TSA(全港性系統評估)之餘,更可以回復半天上學。「小學生仲係一個鍾意自由奔放嘅階段,一日要玩幾個鐘、瞓晏覺、睇電視、學一啲自己鍾意嘅嘢,童年應該係咁㗎嘛!其實返半日都夠啦,我哋以前都係咁,12點幾放學返嚟食飯,瞓個晏覺3點幾起身,可以做功課同落街玩,到夜晚食完飯仲可以同屋企人坐低睇電視、睇戲、睇書,有好多親子時間,仲記得以前我夜晚會同爹哋去打羽毛球。」係囉,其實小學生生活就應如此!

湊仔三寶
陳倩揚教兩個仔教得頭頭是道,兩個仔都乖巧伶俐,兄弟友好,倩揚透露了自己有獨門「湊仔三寶」,分別在教養、學習及兄弟關係方面幫助良多,尤其是哥哥現階段必須建立價值觀及記錄學習過程。想知倩揚有邊三寶?即刻睇片偷師!

●撰文:Ling
●攝影: Clay Lam (部分相片由受訪者提供)

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。

你有獨家湊BB心得嗎?

更多精選內容