錢小豪 龐景峰 重拾父子情

錢小豪 龐景峰 重拾父子情

因為一部電影,終於修補了 錢小豪 與大仔龐景峰(Andrew)的父子情。錢小豪與前妻郭秀雲早於兒子三歲時離婚,兒子隨母及繼父生活,後來索性改名跟繼父姓龐,可見景峰與錢小豪的關係疏離。景峰幼年仍有探望爸爸,直至14歲往外國升學後,與爸爸多年不見。小豪直言,對於大仔成長記憶有多年空白,就像斷片般。

「佢依家嗌我爹哋真係開心到打冷震,呢半年佢叫我爹哋多過之前20年加埋。」小豪藉著新片《生化藥屍》修補了斷片的父子關係,多得監製鄭敬基找景峰飾演自己的青年版,在大半年的攝製期令兩父子感情大躍進,小豪希望追趕與景峰失去的父子時光,多與景峰四處遊歷,留下多一點父子的回憶。

撰文:Ling
攝影:Killy Sung(部分相片由受訪者提供)
場地:Blue Place Café (Tel: 2817 1977)

視爸爸為英雄

景峰自小隨母生活,14歲開始去外國讀書、獨自生活,景峰坦言不單止爸爸,連媽咪和屋企人都好少見,一年最多返港三四個月,而他每次相約見面的第一人,不是媽咪,更非爸爸。「我一定會搵爺爺嫲嫲先,因為佢哋年紀大喇,同埋阿嫲好錫我,錫嘅程度好恐怖㗎!」父子相隔兩地多年,最長試過幾年不見,小豪坦言一直記掛兒子,「佢始終都係我個仔,太耐冇見連發夢都夢見佢。」

錢小豪在景峰3歲時與前妻離婚,自此很少見面,有幾年更因兒子到外國讀書沒有見面,小豪坦言試過日有所思夜有所夢,發夢都見到個仔,現希望趁自己還有時間,多與兒子旅行,追趕失落了的父子時光。
錢小豪在景峰3歲時與前妻離婚,自此很少見面,有幾年更因兒子到外國讀書沒有見面,小豪坦言試過日有所思夜有所夢,發夢都見到個仔,現希望趁自己還有時間,多與兒子旅行,追趕失落了的父子時光。

對家人十分孝順的景峰,從沒有因為父母離婚而冷待爸爸,心底裡依然敬重,小時候看到爸爸的演出更十分仰慕,視他為英雄榜樣。「細個睇到爸爸喺電視同電影上面,我對眼係發晒光,覺得爸爸好型,係英雄呀!」

身為《龍珠》迷的景峰自言細個白白淨冬菇頭,似足《龍珠》的孫悟飯。
景峰擅長跳舞和花式滑冰,小時候曾奪過不少獎項。
景峰透露媽咪正忙於四出旅遊潛水,未有機會安排一家人見面。

首度父子檔拍戲

景峰望著爸爸,仍像小朋友仰慕爸爸的眼神。長大後景峰決定加入娛樂圈,出過唱片,現時他最渴望做一個出色的演員,已拍過兩部電影,直到今次第三部就有機會與爸爸合作。「可以同爸爸一齊拍戲係一種樂趣,唔係人人都有機會,我真係好開心!」

小豪與景峰在過去廿多年好少見面,只是大時大節食飯,今年因為一 套電影大大拉近了他們的距離。

從爸爸身上學做一個演員,首先不是學演技,而是演戲的態度。小豪強調工作上最重要守時,能早到更佳,最好早兩小時到片場適應及熟讀劇本,並觀察幕後人員的工作,因為拍攝一套電影講求團隊精神,多與工作人員交流絕對有助演員發揮,景峰說:「爸爸天未光就敲門叫我起身,要我早兩個鐘學習幕後的重要性,同幕後人員建立關係。」

新片《生化藥屍》由錢小豪首次任電影出品人,鄭敬基監製,鄭主動提出找景峰(左)做小豪的年輕版,促成今次的父子檔合作。

培養了早兩小時到場的態度,景峰亦應用於之後的電影拍攝,令他獲益良多,「可以跟燈光組學砌燈,跟攝影師學砌路軌、調校攝錄機,做演員唔係只顧自己嘅演技。」小豪更點出一個容易被忽略的好處,「早起身飲杯茶清腸胃,一早去清晒就唔會拍拍吓戲肚痛。」

景峰遺傳了爸爸的武打潛質,立志做一個出色的武打演員,兩父子因此有更多交流,像朋友般相處。

立志做武打演員

對於兒子在戲中的表現,小豪覺得中規中矩,值60分,尚有好大的進步空間。「佢始終係新人,我希望佢盡快適應拍戲狀態,呢個要經驗累積番嚟。拍戲要有好多才華,套戲要你做畫家,你就要似畫家;套戲要你識潛水,你就要識潛水,唔係對住屋企塊鏡就學到,做演員好多嘢要學。」

拗手瓜,究竟鹿死誰手?

景峰對演戲充滿濃厚興趣,覺得做演員好好玩,可以擴闊自己眼光,學習更多,他更希望繼承爸爸的武打戲路,立志做一個出色的武打演員,現正積極裝備自己,勤力跑步、做gym、打拳,生性怕水的他更決定考潛水牌。「可能將來有套戲要我潛水呢?我要預備定。之前見到劉德華拍廣告墮馬受傷,所以我都去咗學騎馬,做演員最好玩係可以學好多嘢,仲學到以前父母唔畀學嘅嘢,好似玩槍、飛車!」

景峰指自己與爸爸和叔叔錢嘉樂是三個大細路,鍾意打交睇動漫,大家好啱key!

期待父子潛水歷險

小豪聞言自己都有潛水牌,約定將來兩父子一齊旅遊潛水,景峰十分期待道:「我想同爹哋一齊拍啲歷險節目,即係潛水、爬山、征服雪山呢啲,難得呢個爹哋真係做到吖嘛!」小豪喝停他不要再談公事,不如來一次輕輕鬆鬆的父子旅行,「拍攝去玩喎⋯ 真係去玩先開心㗎嘛,為工作而去就唔好玩㗎喇。」景峰笑言要把握機會拍攝留念,「我好ready,你身體都OK,我哋玩到呢啲遊戲呀!」

近日兩父子四出為新片宣傳,寓工作於玩樂,享受難得的父子時光。

景峰正值壯年,事業心重,希望與爸爸有更多工作上的合作;小豪的想法卻相反,已在影圈打滾多年的他,只希望與兒子四出旅遊,增廣見聞,「見識多啲呢個世界係大家嘅寶庫,唔係去東京shopping,係去喜馬拉雅山、巴布亞新畿內亞睇風土人情,可以學到好多嘢。」景峰點頭和應,但仍然滿腦子工作⋯⋯

「我好想同爹哋拍一場精彩嘅武打對手戲,第日老咗可以睇番⋯⋯」小豪沒好氣道:「我打贏你又話我恰你,你打贏我就不孝,何必拍呢?」

景峰最期待與爸爸合演精彩武打戲,互相切磋。

與爸爸叔叔像大細路

經過大半年的相處後,小豪有感景峰真的長大了,不再是深印腦海中的BB樣,「我對阿仔最深嘅印象仲係3歲雛型前,之後斷斷續續有見吓面,一齊同佢爺爺嫲嫲飲茶,依家真係見到佢成長咗,又靚仔過我,工作態度好,對人又有禮貌,我了解佢多咗好多。」兩父子現在一碰面會分享工作點滴,小豪希望兒子會向他分享更多,「好似識女仔嗰啲嘢啦。」

小豪話聽到兒子不斷叫他「爹哋」,開心到打冷震。
景峰最渴望做忍者,出街會一時興起爬樹影相。

兩父子縱使多年不見,但一拍即合,大家有相同嗜好,有許多共 同話題,景峰笑言兩父子加上叔叔錢嘉樂都好玩得,又鍾意睇動漫,活像三個大細路。「我哋都攞咗細路仔嘅夢想做出一番事業,好似飛車、打交、動作,我哋三個喺呢方面溝通得好好,因為我哋都係大細路。」小豪外表較嚴肅,外界以為他是一名惡煞,景峰澄清爸爸是個百分百好人,「佢為人好好,仲會講好多爛gag!」

景峰指爸爸少教他武功,反而叔叔錢嘉樂有教他倒立和玩BB槍,又會拿爸爸的限量版超人公仔給他亂射。

同父異母的弟弟愛賽車

至於同父異母的弟弟錢穎德,景峰與他的年齡相差12年,坦言兩兄弟較少見面,但會盡量爭取機會連繫兄弟感情,但今個暑假未有機會,因為德德與前DJ媽咪丘倩鳴遠赴西班牙和英國旅行玩賽車,順道探望親友,小豪說:「所以呢段時間我咪同大仔一齊宣傳電影囉!」

小豪希望追趕與兒子失去的時光,多去旅行歷險見識。

現年14歲的德德最喜歡玩賽車,夢想是參加 F1 世界一級方程式賽車,小豪希望德德努力向目標進發。景峰笑言自己有玩過賽車,但興趣一般,「我啱啱拍戲先炒咗叔叔幾部車,對唔住叔叔!揸車係好玩,但我冇passion喺呢度,我寧願去做忍者,爬上樹做忍者好好玩㗎!」

小豪的細仔德德熱愛賽車,夢想是參加世界 一級方程式賽車。

你有獨家湊BB心得嗎?

更多精選內容