開明 後母 楊卓娜 ︰對三個女一視同仁

開明 後母 楊卓娜 ︰對三個女一視同仁

每年的母親節,對 楊卓娜 來說都有雙重意義,2009年5月11日母親節翌日,楊卓娜的囡囡楊舒然(豹豹)出生,為一家五口帶來難忘的母親節。那麼快便一家五口?卓娜下嫁「廣告燈箱大王」楊志翹後,更成了兩個女兒舒婷和舒雅的 後母 ,丈夫因早年喪妻,遺下兩名女兒,後來卓娜成了她們的手工藝老師,繼而認識丈夫,舒婷和舒雅既是父母的女兒,更是父母的紅娘。舒婷覺得媽咪雖並非親生,但一樣好偉大,從未為人母仍能接受另一半有兩個女兒。「媽咪一直視我為己出,唔會只對親生好,我同二妹都覺得好warm,有番媽咪愛錫。」一下子成為三女之母,卓娜湊BB的同時亦面對大女的青少年反叛期,她覺得青少年問題比湊BB更困難,青少年有自己思想,會質疑父母,她要邊湊邊學,見招拆招。「最重要係喺三個小朋友身上,我都得到好多愛。」

 

撰文: Ling
攝影: Sing Ho、部分相片由受訪者提供
髮型: [email protected] Hair
服裝: Angelle Chang

卓娜對三個女一視同仁,令三個女培養出濃厚感情,一家融洽。
卓娜對三個女一視同仁,令三個女培養出濃厚感情,一家融洽。

夫妻需有私人空間

在剛播畢的劇集《全職沒女》當中,楊卓娜飾演張兆輝的前妻Lina,縱使有錢有地位,但丈夫忙於工作忽略自己感受,決意離婚去追求另一段能滿足心靈的感情,其實這個角色也是不少女性的寫照。「當你生活安定,就想心靈上得到更多慰藉,慢慢就不安於現狀,開始覺得空虛,希望有更理想嘅人出現,我相信好多女人都出現過呢種現象。」

卓娜在《全職沒女》飾演的Lina說話尖酸刻薄,迫前夫離婚讓她追求下一段感情,卓娜曾擔心會否在這齣喜劇中演得太討厭,幸好觀眾的反應正面,睇得開心。
自《愛回家》霞姐一角開始,卓娜 愈來愈多演出機會。

現實中的婚姻,卓娜十分滿足現狀,生活安穩之餘,亦有空間追求自己的興趣。在湊女以外,卓娜喜歡閱讀、做手作,近期就愛上園藝,在小花圃種花種菜,療癒身心;相反老公的興趣大多是戶外運動,如踏單車、潛水。「佢有佢去玩,我就留喺屋企做我想做嘅嘢,我哋會畀空間對方。」維繫婚姻最重要是緊密溝通,有心靈交流,物質只是其次。「我一有唔開心都係同佢傾,佢會細心開解我,互相明白係好重要。我唔會擺物質第一位,有得食有得住就得,或者買樓公一份、婆一份,不過依家樓價咁貴,租到間屋已經好好,再建立自己家庭,大家齊心、安穩就夠。」當然兩人偶有意見不合之時,卓娜不會與丈夫硬碰硬,他責罵時自己保持緘默,時間一過便會沖淡不快。

卓娜指細女豹豹最黐爸爸, 因為爸爸最玩得, 反而嫌媽咪嘮叨, 有時都會呷醋呢!

青少年比BB難湊

卓娜一入門成了三女之母,更是三女的新手媽媽,要湊不同年齡的小朋友。卓娜認為BB 不難湊,青少年才是最難,性格硬頸、不信任父母、易受同輩影響,只要教導上稍有差池,就好易讓小朋友誤上歪路。「我都係邊湊邊學,見招拆招。大女試過有段時期唔相信父母,產生咗好多爭執,例如佢拍拖,我哋唔想佢咁早開始,人選亦唔適合,爸爸呢方面好嚴厲,好驚個女學壞,成日唔畀佢同男仔出街,傾又傾過,打罵都試過。」

三姊妹雖然年紀相差幾遠,嗜好及生活圈子各有不同,但她們一致喜歡聽英文歌,在音樂上有很多交流。

這邊廂正面對大女的反叛期,另邊廂要照顧初生的細女,相對於青少年,卓娜覺得湊BB 只有辛苦,而非困難。「BB 時期只係一口舊飯,我話行東佢就行東,行西就行西,我最多係困身啲。小朋友愈大遇到嘅問題愈多,佢哋開始有自己思想,唔會聽你支笛,你要學識點樣同小朋友溝通。」

大家姐已投身社會,現職一名秘書;豹豹就話希望將來做一名時裝設計師。

對付學業反叛︰命令做練習

舒婷笑言青少年時期比較反叛,不希望媽咪太注意自己,尤其在學業方面,媽咪比較嚴厲。「啲練習多到……做到人都癲,我知媽咪為我哋好,買好多練習畀我哋溫書,一來想我哋成績好啲,二來要環保,買咗唔做好嘥。」卓娜解釋自己並非虎媽,而是另類懲罰,她不要求女兒考好高分,只要求她們做好本份,所以舒婷愈反叛愈要她做練習。「叫親佢做硬係唔做,咁就懲罰性,『一份你唔做,咁做兩份啦!』就算依家都係㗎,佢唔交齊啲嘢畀我,我要佢畀double,再唔交就triple。」舒婷回想做練習的日子好可怕,更覺得父母又惡又煩,長大後才明白父母是一片好心。「畢咗業出嚟做嘢之後,比較番自己和同年紀的人,睇到大家喺待人接物上有分別,可能佢哋被父母縱壞咗,我就知道父母當初咁做係有原因。」

豹豹小時候很乖巧易湊,卓娜覺得湊BB不困難,只是比較困身。
卓娜重視女兒的品德和禮儀,例如餐桌禮儀一定要做得好,不能失禮於人前。

播道書院有愛心

訪問當日,二女舒雅正備戰中學文憑試(DSE),每天也努力溫習,近來更溫到晚晚一、兩點。在三個女的學業方面,就讀名校嘉諾撒聖家書院的舒雅成績不俗,最不用父母操心,或許是她不想父母過問太多,經常說「我搞得掂!」卓娜讚二女最自發讀書,也從不投訴讀書辛苦。「佢全部都係自己搞掂,從來都冇補習,我提議過考DSE 前讀吓『雞精班』,佢都話唔使。」

卓娜主張教女從錯誤中學習,例如有次一位大哥哥問借錢,豹豹把身上12元零用錢全借給大哥哥,雖然錢銀不多,但卓娜要教導女兒有借有還,問大哥哥還錢之餘, 更不能隨便借錢, 豹豹現懂得金錢概念,盡量把零用錢儲蓄起來。
卓娜主張教女從錯誤中學習,例如有次一位大哥哥問借錢,豹豹把身上12元零用錢全借給大哥哥,雖然錢銀不多,但卓娜要教導女兒有借有還,問大哥哥還錢之餘, 更不能隨便借錢, 豹豹現懂得金錢概念,盡量把零用錢儲蓄起來。

隨着二女快將中學畢業,卓娜可以專注於8歲細女豹豹,現讀將軍澳播道書院小二,她指出學校不主張抄寫及死記硬背,最重要明白課堂內容,配以適量功課,並重視平時分。「以前讀書只計測驗考試分,一次定生死,依家呢間學校會攤分好多項,有課堂表現、功課表現、老師印象分等等,計分好全面,對小朋友整體發展比較好。」

心思細密的豹豹最鍾意下棋,很多類型的棋都識玩。

播道書院重視生命教育,期望學生做到三點:做個好鄰舍、好學人及僕人領袖,並建立良好品格,追求學習表現及發掘才能。卓娜十分認同學校的教學理念,更稱讚校長有愛心。「佢對教育無保留,當小朋友係自己屋企人。校長老師對小朋友成長好緊要,因為小朋友每日有大部分時間喺學校,希望佢哋讀得開開心心。」

二家姐與豹豹感情最好,是豹豹的學習榜樣,父母就常以二家姐做得好的例子去教導豹豹。

後母絕不偏心

《灰姑娘》的故事耳熟能詳,大多人以為後母比較奸,只會對親生女兒好,舒婷指自己絕非灰姑娘,後母待她如至親,給予滿滿的愛,絕不偏心。「媽咪去到邊都會帶埋我哋去,唔會因為我哋唔係親生,就淨係帶個細嘅出去,好多人都問後母係咪冇咁好,可能睇得《灰姑娘》太多,其實完全冇,媽咪好公平。」

卓娜身為後母絕不容易,更做到對三個女兒不偏心,令三個女都感到滿滿的愛。

卓娜視繼女如己出,丁點偏心也沒有,與她自己的背景亦有關,她與妹妹楊怡自小爸爸早逝,在單親家庭成長,後來繼父的出現填補了她們的遺憾, 卓娜也希望把愛傳給下一代。「我一開始係認識兩個小朋友先,同先生一齊嘅時候冇諗咁多嘢,我好鍾意呢兩個小朋友同熱鬧大家庭嘅感覺,反而男女之間嘅浪漫我唔係咁着重,最重要係喺呢兩個小朋友身上,我都得到好多愛。」

每年母親節一家人會順道和豹豹一齊慶祝生日,原本今年打算一齊去主題公園玩,但媽咪可能要拍劇需改期,令豹豹有點不開心,媽咪承諾一定唔會走數,還有最愛的麥當勞食!

三姊妹年齡相距頗大,分別21、17和8歲,但年齡毋阻三人融洽相處,兩個家姐對同父異母的妹妹亦毫無隔膜,特別是舒婷比較開朗,在維繫三姊妹的關係上成了重要角色。「妹妹比較內向,好多嘢都收收埋埋,我好多時要主動同佢傾偈先知佢諗咩。一家人嘅性格都唔同,要互相體諒。」卓娜覺得一家人最重要有愛,女兒感到愛就自自然然愛對方,毋須刻意提醒要相親相愛。「佢哋三姊妹都好愛對方,大家姐一有時間就帶兩個妹出去玩。佢哋年紀相差好遠,社交生活完全唔同,不過二家姐同細妹仲係學生,返學放學時間差唔多,一齊喺屋企時間耐啲,所以佢哋更加糖黐豆,細妹甚至視佢為榜樣。」

豹豹做功課有不明白的地方會問家姐,但卓娜叫家姐絕不能直接講出答案,一定要用引導方式讓她理解過程,寧願做錯,到改正時才解釋答案。
豹豹做功課有不明白的地方會問家姐,但卓娜叫家姐絕不能直接講出答案,一定要用引導方式讓她理解過程,寧願做錯,到改正時才解釋答案。

楊怡謙謙想生女

眼見三個小朋友漸漸長大,舒婷更已投身社會,現職一名秘書,工作穩定;而舒雅亦即將中學畢業,只餘下舒然仍要好好照顧,卓娜笑言開始有「甩難」感覺。「奶奶早兩日先喺(通訊)群組話老爺想我生多個,我話唔好喇啩!我唔想追多個仔,如果要生都係早幾年,唔係依家,生得嚟等佢大個,我先生都60幾歲,唔好喇。」那早幾年為何不行動?「我更加唔想,我嘅注意力喺晒細女身上,而且我鍾意女,慣咗成屋都係女,唔識同仔相處。」

卓娜的媽媽同樣催生仔,現在可以推說交畀妹妹楊怡生,卓娜透露楊怡和老公謙謙有自己計劃,沒有提供甚麼生B貼士,一切都要隨緣。「佢哋有自己諗法同計劃,佢手頭上仲有好多工作,不過離開TVB 後休息得好啲。我覺得生BB 係緣份,所以我唔會畀貼士佢喇,最多佢生完唔識湊我幫佢湊。」

至於想生仔先定生女先,卓娜笑指謙謙是圍村人希望生仔先,但受朋友感染下作出180度轉變,現希望先做女兒奴。「囡囡係前世情人吖嘛!其實生女真係好好,我係一個人辦你睇,如果仔佢今日仲會陪我做訪問?始終女係貼身啲,鍾意黐住父母多啲。」

楊怡和羅仲謙對生BB有計劃,希望第一胎生女。

更多精選內容