關詠荷：我不是虎媽
撰文：Ling ｜攝影：Mano Wong（部分相片由受訪者提供）｜場地：奧比斯
關詠荷為家庭放棄事業
難得關詠荷與本刊做親子專訪，當然把握機會查詢一下，她聞言被指「 虎媽 」即大笑：「成日話我呀？我好苦呀真係，哈哈！梗係冇七個碩士啦，學校唔只七個呀！搬屋都係咁啱啫。」關詠荷曾揚言：「老公是我的驕傲！」關詠荷與張家輝於90年代初在亞視拍劇擦出愛火，2003年拉埋天窗，3年後誕下女兒張童（Brittaney）後淡出幕前，為家庭放棄事業，專心做家輝背後的女人，亦令家輝的演藝事業登上高峰，兩度奪得金像影帝，但對家輝來說，太太和女兒才是他的驕傲。
只會做好自己工作
家輝奪得影帝時揚言：「太太是一生中最大收穫！」90年代兩人在亞視結識，關詠荷過檔無綫後憑劇集《苗翠花》和《陀槍師姐》爆紅，更奪得首屆視后，奠定一線花旦地位，與家輝的事業有一段距離，關詠荷指兩人從不比較邊個紅，只會做好自己工作。
關詠荷和囡囡無視爸爸「六肌」
事業的高峰只是時間問題，家輝轉戰影圈後如日方中，2006年囡囡出世後更旺其事業，兩年後憑電影《証人》榮膺七料影帝，2013年再憑「筋肉人」造型演電影《激戰》，再下一城奪金像影帝。Esther讚老公工作認真，亦可能因當上爸爸及戲路所影響，性格變得成熟，不像以前般大男孩，不過Esther對家輝的肌肉毫不留戀：「呢六舊從來都唔屬於佢架啦。」不單止老婆無興趣，連囡囡也無視「六」，Esther笑說：「佢冇留意呢，佢兩個連一齊做運動都少，我同阿女做多啲，好似打波、空中瑜伽，佢都鍾意玩空中瑜伽，小朋友揸住條繩就好開心，可以做好多動作扭吓、郁吓幾好玩。」
爸爸較惡媽媽好easy
Esther與家輝的相處之道是互相尊重、互相關心、互相有空間，對現年10歲囡囡的教育亦有共識，重點要培育其創作力、禮貌和道德。表面上媽媽較嚴厲，但在囡囡心目中，媽媽是easy一點，「easy啲即係覺得我冇咁惡，其實我係惡啲，會罰佢，但唔知點解佢覺得爸爸惡啲，係佢comment㗎。」
家輝雖是慈父一名，從沒有鬧女，但也有嚴肅的時候；相反Esther與囡囡見面時間較多，囡囡知道怎樣應付媽媽。「可能佢覺得我成日重複問題，成日講某幾樣嘢，佢聽慣咗就覺得我好easy；但爸爸會突然抽一樣嘢督住佢，佢就覺得好緊張，可能咁就覺得爸爸惡啲。」
最難坐定做功課
家輝忙於拍戲，返到屋企亦盡量抽時間陪囡囡傾偈、陪玩、shopping，但他並非玩樂大隊長，Esther笑說：「我個女自己先係玩樂大隊長！佢自己會搵嘢玩，我哋就陪佢玩，好似佢想畫公仔，我哋咪陪佢畫；或者佢想打波，就同佢一齊玩吓遊戲。」Esther形容囡囡的性格喜好與其他小朋友無異，一樣不喜歡做功課，坐不定，最喜歡玩。「佢冇特別標青嘅talent，但佢性格活潑，佢知道自己依家做到嘅嘢多咗、能力高咗，敢於嘗試更多嘢。細個佢唔夠力，好多嘢都唔敢試，睇到佢一路長大，佢勇敢咗。」
囡囡棄溜冰轉打羽毛球
Esther確實有安排很多興趣班讓囡囡嘗試，唱歌、跳舞、閱讀、溜冰、打波樣樣皆有，經常有報刊影到她帶囡囡上興趣班，就指她 虎媽 把囡囡的時間表排到密麻麻，她對此反駁道：「湊小朋友梗係要提供活動俾佢，唔通日日坐喺屋企對住四幅牆、對住電視機咩？」
不過在科技發達下，禁到睇電視亦不能禁電腦和手機，根本阻止不了小朋友接觸電子世界，「所以就要安排多啲活動俾佢郁動、思考，但最緊要睇佢有冇興趣，同點樣激發興趣。佢細個我俾好多機會佢嘗試，唔參與過就唔知自己有冇興趣，參與過先會慢慢發掘到。」 Brittaney一度愛上溜冰，但熱戀過後放棄了。「佢開頭覺得啲衫好靚，喺冰上好似飛翔咁，但之後佢話如果要做得好，係好辛苦，因為高班要喺冰上飛，又要拉筋跳舞，佢覺得好唔想做。」今年暑假她主動參加羽毛球班，兩年前試打過，兜兜轉轉還是覺得羽毛球最好玩。
譏諷媽媽冇讀書
與其他家長一樣，Esther正面對小朋友不願坐定定做功課的問題，她正教導囡囡要學識管理時間表，安排好每日做功課、補習及玩樂時間，但絕對沒有安排七個碩士生補習。「中英數基本嘢就有補，佢讀國際學校，覺得英文易過中文。但呢個小朋友係坐唔定，叫佢坐定定做功課就覺得好悶，所以我冇坐喺佢旁邊教功課，等老師幫佢。依家我要佢學習管理時間，做好自己應做嘅嘢。」
Esther小時候不喜歡讀書，現在叫囡囡讀好書，反讓她有話柄，「有時我叫個女讀書，佢就會話『你都無讀書啦！』我好嬲㗎，要解釋番唔讀書嘅唔好處，但俾我再揀，我都覺得讀書真係好辛苦，所以我見佢做功課辛苦，做得好我都會俾獎勵。」
慈善探作訪身教
要教好一個小朋友，父母身教最重要，能家校相互影響更有效。早前Esther以「奧比斯兒童大使」的身份，前往尼泊爾作震後探訪，最觸動她是當地一個小妹妹患有先天性白內障，醫好一隻眼後，其母拒絕讓女兒醫治另一隻眼，因為覺得一隻眼已足夠，返港後她告訴囡囡，亦感到難以置信。「我同佢解釋番因為當地人生活太艱苦，所以個媽媽先咁做，之後個女攬住我話媽咪，我哋好幸福好幸運。」
更難得是學校對尼泊爾地震亦出心出力，能家校合作啟發小朋友的善心，「屋企影響佢係一部分，但學校、同輩對佢嘅影響更大，尼泊爾地震後，學校第一時間出封email，家長可以捐啲咩物資，當地需要啲咩，學校又呼籲有咩食物可以捐出，拎返學校收集。」Esther不知道囡囡被啟發到幾多，只覺得應做就做，「呢個係我個人願望，我唔知自己影響有幾多，應該OK嘅。其實你自己做咗幾多，佢又吸收到幾多，係唔知㗎，只不過我覺得應該做、想做，就去做。」
我的志願：想做演員
不過，10歲的Brittaney最近告訴了爸爸「我的志願」，明言將來想做演員，家輝勸她首要讀好書，「如果你揀好想做邊類型actor，你要諗清楚，之後我哋做一啲專業訓練。」當小朋友提出了想做的事情，Esther認為父母不應立即say no，
反之鼓勵說：「你一定要做好！」令小朋友有動力、有目標去做。「唔需要教佢做戲，佢要做自己就會做到。好似佢細個鍾意搽指甲油，我話我自己唔搽嘅，你想搽我可以買俾你，但你要自己搽。佢就上網睇，學畫pattern，依家佢可以搽到10隻指甲，仲搽得好靚。你想support佢可以support，但你唔support，佢一樣會做到㗎！」
