陳敏之 : 陀B感覺好正!

撰文：Ling
攝影：Alison Kwan（部分相片由受訪者提供）
化妝：Jessica Chan
髮型：Eve [email protected]’s PRIVATE i SALON
造型: Wong Peggy
服裝︰Iris & Ink、Issey Miyake、Sergio Rossi、American Eagle Outfitters
場地：MioXpace (tel: 9711 9533)

期待每次胎動

現時陀B仔六個多月的敏之，最期待胎動的每一刻，頭三個月已經心急如焚，但第四個月仍然無聲氣，第五個月開始感覺「攪攪吓」，到六個月終於覺得他踢手踢腳，每郁一下都好感動！「我每次食飽佢就郁一郁，凌晨一、兩點郁得最犀利，BB好似條魚咁游水，真係好開心，好得意呀！」

37歲的敏之都希望生多個，試多一次這種幸福感覺，「如果我後生10年一定會生多個，因為我覺得一個BB好寂寞，如果年紀、身體承受得到最好生兩個，將來佢哋可以有商有量，互相照應，照顧埋我哋兩老。我睇吓生完第一胎會唔會好辛苦，如果OK我都想生兩個。」

長胎不長肉

女人懷孕後身體變化多，胃口大容易發胖、皮膚粗糙，但敏之依然四肢纖幼，長胎不長肉，皮光肉滑，她笑言沒有特別保養，只是遺傳了媽媽的優良基因。「我媽咪陀BB仲靚呀，佢陀細佬嗰陣都冇肥到，生完好快修身，個肚仲冇紋，我希望遺傳晒佢！」

她透露現重了約8磅，沒有刻意控制食量，但頭三個月常作嘔作悶冇胃口，反輕了4磅。三個月後身體立即回神，胃口大增，偏愛重口味，「我好記得一踏入三個月，一起身就冇晒嗰種悶悶不樂，當時我特別鍾意食牛肉，即刻想鋸扒，總之好鍾意食肉啦，後來發覺自己好似太開胃就控制番，揀啲真係有營養，分量
減少啲，等BB之後需要多啲營養嘅時候，我先再食多啲。」

怕妊娠糖尿唔敢食曲奇

愛吃曲奇愛到開店的敏之，自懷孕後不敢吃甜，因怕患上妊娠糖尿病，飲食要非常小心，對曲奇更加要忍口，「加上大肚口味轉咗，唔係太想食甜嘢。」敏之希望將來開發一條健康低糖新Line，製作一些超低糖曲奇，連高血壓、糖尿病人都啱食。

掙扎順產定開刀

陳敏之 曾在順產與開刀之間掙扎良久，更為此請教很多媽媽，最終自己缺乏勇氣順產 ，但原因並非怕痛。「我唔係怕痛嘅人，但以前拍戲試過斷骨又整親頸，我最擔心反而係順產過程，有人試過陣痛十幾個鐘都未生得，結果發現BB臍帶纏頸要立即 開刀，仲有好多難以估計嘅情況，其實都可以避免，所以為咗BB安全我選擇開刀，想有計劃咁生出嚟，雖然傷口可能要半年先好番同有疤痕，但依家醫學先進，開 刀技術都好好，對身體唔會有太大影響。」

搵Richard Eng教英文

敏之圈中人緣佳，好友眾多， 當中與契姐伍詠薇感情最深厚，「佢將會係BB嘅大姨媽！」伍姑娘的哥哥伍經衡（Richard Eng）是英文補習天王，也是敏之的契哥，不單止會幫敏之的BB改英文名，更做埋終身私人老師，學好英文無難度。「一定會叫佢教啦，或者安排一啲合適課程俾BB，佢都好好呀，話會幫我個仔諗，叫我放心。」

Richard接觸過眾多學生，熟悉本地課程，敏之視Richard為教育顧問，有聽取他對選校的意見，不過一切要等BB出世後才作詳細考慮。「要按BB性格同興趣去選校，我唔想一窩蜂咁跟風，人哋話邊間好就去揀，可能個小朋友根本唔適合。選校方面真係有好多聲音，但我都會信任Richard。」敏之與老公William皆是本地學校出身，將來囝囝走本地還是國際學校之路，仍是未知之數。敏之希望自己不會變成怪獸家長，但亦非無要求，「一定要有禮貌，見到有小朋友唔同人打招呼、俾嘢你唔講唔該，我都會出聲話佢。家長唔從小教佢感恩同禮貌，大個就唔識珍惜。」

與唯唯老婆一齊產檢

小朋友要健康成長，還需要快樂的群體生活，敏之的囝囝未出世已經有伴，她的老友梁烈唯老婆Tina也同期大肚，只相差個幾月，注定兩個BB青梅竹馬！「我哋一知道大家都大肚就成日WhatsApp、WeChat傾偈，keep住update大家個肚大細。好得意㗎，我個肚大佢個幾月，我身體有咩變化，佢都將會發生，所以佢就好正喇，我可以將啱啱發生過嘅嘢分享佢聽。一齊陀B真係好開心，冇咁悶呀！」

兩人現經常孖公仔去買BB物品，連產檢都用同一醫生，結伴做產檢，敏之說：「我哋成日都介紹好嘢俾大家，未陀B之前我已經介紹咗我婦科醫生俾佢，一路跟進到依家。」Tina為唯唯陀B女，敏之陀仔，之後仲可以一齊湊B、一齊讀書，將來對親家都仲得！