自認對仔女冇晒符 陳豪:我冇老婆教得咁叻!

自認對仔女冇晒符 陳豪:我冇老婆教得咁叻!

大台視帝陳豪演活過很多角色,無論是皇帝、老師、富二代,還是潮流教主,每每都得心應手,每個角色都深得觀眾的心。現實生活中,陳豪除了是一個情深的好丈夫,還是三名孩子的爸爸,不過對於「爸爸」這個角色,可能是他從演以來最大的挑戰,難怪陳豪也坦言:「對住仔女我真係冇晒符!」
撰文:Kayla|攝影:Roy、Simpson

部分圖片來源:Instagram

夫妻恩愛 是一家之本

陳豪跟太太陳茵媺(Aimee)於2010年因拍攝電視劇而刷出愛火花,拍拖2年便認定對方是一生一世,雙雙步入教堂,三年抱三,一家五口樂也融融。無論在鏡頭前後,陳豪與Aimee都非常恩愛,是圈中的模範夫妻,每次見他們在社交網站分享合照,都會惹來網友們艷羨的目光。

坦白講,陳豪和Aimee假如不恩愛的話,也不會出現「三年抱三」的情況,不少圈中人都曾笑指要向陳豪請教「生仔秘技」。

孩子出生後,很多爸媽都會把生活重心放在小朋友身上,漸漸就會忽略身邊人的感受。陳豪和Aimee深深認為父母對孩子的影響深遠,認為其實父母相愛,作為子女當然也能感受愛:「我相信屋企係唔係充滿愛,會直接反映小朋友將來有幾多愛。坦白講,今時今日學習唔係唔重要,不過屋企的愛絕對比學業重要。」

「小朋友被愛包圍,先會令佢哋對學習有興趣,而父母對佢哋的關心,會影響佢哋將會嘅性格係咪充滿陽光、快樂同透明度。我同Aimee好著重,除咗我哋兩公婆之間要有愛,都要確保屋企嘅環境係充滿愛咁畀佢哋成長。」

三子女性格各有不同

三年抱三,對於陳豪來說除了是個甜蜜的負擔,也算是人生的一大挑戰,正因為三名孩子的性格各有不同,也因為他們的年紀相若,不時會出現爭吵的情況,令陳豪不懂招架。幸好陳豪家有賢內助Aimee,當然可以放心拼搏事業,為這個家帶來更多新希望。

「大哥就比較文靜,鍾意畫畫、下棋,二哥就比較有耐性,鍾意面對挑戰,而囡囡天生比較強悍,非常貪靚,好有表演慾,基本上三個係完全唔同性格。有時佢哋好鬼Friend,有時又會爭玩具,甚至會有少少動手動腳,但好彩佢哋三個都係聽話,都知道佢哋個心底其實係愛錫大家。就好似有時同佢哋去街,佢哋都一定會確保個個都有得去,唔可以漏底任何一個。」

「我同Aimee見大哥同二哥兩兄弟經常都會嘈吓交,所以我哋由好細個開始,就將大哥同二哥放埋喺同一間房生活,唔理佢哋係嘈交又好,兄弟之間妥唔妥都好,要佢哋一齊去長大,明白咩叫血脈相連,就已經好夠。」

兄弟姊妹之間爭風呷醋是常有的事,要做到不偏心,陳豪就大讚Aimee有妙法:「我哋屋企有一個好好嘅獎勵計劃,當小朋友先發性做咗好事,例如自己去洗手間、自己食飯、著鞋著襪待,就可以得到一粒波波。小朋友都有屬於自己嘅玻璃瓶,只要瓶入面啲波波滿晒,就可以單獨咁同爸爸媽媽享受去玩嘅時間,例如去會摩天輪、旋轉木馬、去海洋公園玩等等。」

自認對住仔女「冇晒符」

短短在四年之間,陳豪和Aimee由二人家庭,變成一家五口,作為家庭支柱家陳豪當然要努力工作。不過工作歸工作,照顧孩子不只是媽媽的責任,爸爸亦應擔當重要角色,陪伴孩子成長。因此只要一放假,陳豪就會變身成「湊仔公」,成為「超人爸爸」。

「小朋友嘅光陰其實好短,作為家長除咗要陪佢哋玩之外,仲要教佢哋好多嘢。其實只要同佢哋一齊,做乜都冇所謂,陪佢哋做功課又開心,出街我又開心,食餐飯都會好享受,因為我係鍾意同小朋友一齊,只要佢哋喺我身邊,無論做咩都係咁開心。」

在訪問的過程中,陳豪不停讚Aimee「好識教」,又笑言自己「冇佢咁叻」,這些說話聽在記者耳中,充滿陳豪對Aimee那一份打從心裏的欣賞和感激。

「教養方面,Aimee比較嚴謹,反而我就比較寬鬆,有時做爸爸畀小朋友嗲多幾句,就會乜都應承佢哋。我真係冇Aimee咁叻,佢可以令到小朋友先發性做好多嘢,而我就係一個傳統少少嘅爸爸,有時小朋友唔肯做,我都會幫佢哋做,但Aimee就話唔得,自己的事一定要自己做,所以我哋先會有個獎勵制度。」

訓練孩子獨立 要有一套

大哥Aiden今年5歲,二哥Nathan今年4歲,而囡囡Camilla則是2歲,在這個年齡階段的小朋友,需要爸媽的悉心照顧和注意力,「獨立」這個字似乎跟他們沾不上邊,不過陳豪解釋,早在Aiden出生時,已經跟Aimee討論好管教的模式:

「世界上有好多嘢係需要孩子自己去學習,學習自己食飯、自己去洗手間,而家香港依個環境,見到好多小朋友都有工人姐姐的照顧,如果我哋幫小朋友做,提供好多幸福畀佢哋,其實係扼殺咗佢哋成長嘅機會。」

「就好似有人會主張要餵小朋友食流質食物,原因就係驚佢哋會哽親,就忽略咗每樣食物都有唔同硬度,對孩子的腦部發展好有幫助,因為可以畀佢哋知原來依種食物係脆的,嗰種食物係硬的。」

「作為家長希望小朋友可以成長、多點學習,所以就要多鼓勵佢哋作新嘗試,千萬唔好怕失敗,要佢哋知道世界上仲有好多嘢值得佢哋去學習。就好似輸同贏咁,唔可以淨係要佢哋贏,要教埋佢哋輸,學習面對失敗。」

更多精選內容