魔術師 李行齊 變出自信新一代

魔術師 李行齊 變出自信新一代

有「傑青魔王」之譽的著名魔術師 李行齊 (小齊、Avon Lee),近年開辦魔術學校致力培育小小魔術師,更於每年暑假舉行大型magic show,打造親子魔術嘉年華。不過,今年小齊要停辦一屆,以迎接他的第二個小生命出世,李太Gina 預產期七月,為三歲大仔李衍銆(MagMag)增添一個細佬。

締造「1分鐘內完成6組巨型瞬間轉移魔法」之健力士世界紀錄的小齊,21歲才接觸魔術,不斷努力之下成才,衝出國際,證明有心唔怕遲,不一定要贏在起跑線,所以小齊不強求兒子MagMag 做接班人,只會利用魔術與他玩耍,並帶他睇show 開心一番。小齊發現自己感染了兒子對魔術的興趣,特別對舞台上表演魔術時播放的音樂最有反應,如果兒子將來有志做魔術師,願意把全部經驗傾囊相授,提升他的自信、思考、表達及應變能力等等,「至少唔使行咁多冤枉路。」

●撰文:Ling
●攝影:UncleMing(部分相片由受訪者提供)

身為「傑青」的小齊,常走訪監獄探訪年輕人,分享自己走來不易的成功故事,勉勵年輕人重新做人,亦希望囝囝以此為鑑,將來不要行差踏錯,做個好人。

21歲才踏上「成魔之路」

「起跑線」並非愈前愈易成功, 李行齊 就是一個好例子。現任職警察的小齊,21歲看報紙認識到魔術師的生活,覺得有趣就聯同朋友一齊學,發掘到新的人生路向。「聽完老師講解之後,原來一個簡單魔術可以做到神奇效果,帶畀觀眾歡樂,於是我更有興趣投放多啲時間練習。」太太Gina與小齊自中學時代拍拖,見證小齊學第一個魔術,直至他學成踏上國際舞台,名成利就,Gina的支持絕對功不可沒。問到小齊有否用魔法氹老婆,Gina笑他從沒做過,因為她早已看穿所有神秘面紗,不會感到驚喜。「由佢學第一個魔術我已經睇住,等於我都一齊學,只係我唔係表演嗰個。」

小齊指魔術是藝術一種,以前好多人認為玩魔術低下,現慢慢改變觀念,希望政府會加強支援魔術培訓,培育更多新一代港產魔術師。
小齊靠後天努力成為出色的魔術師,走遍世界各地表演。

魔術氹仔 最愛海綿波

魔術氹老婆無用,氹囝囝就好有用! 3歲囝囝MagMag自小知道爸爸懂得神奇魔法,家中不同物品都是爸爸的「玩具」,每次睇爸爸表演都好興奮!近期MagMag最愛玩海綿波,將一個波放在手上,握緊再放開會變出好多波波!「我哋可以一齊玩,佢又變得到,有時個波喺我手,我變走咗問佢喺邊,佢話喺patpat度!我就喺個pat pat度變番出來,佢會睇得好開心。」

MagMag最鍾意玩海綿波波魔術,可以變出大量波波好好玩。

小朋友對音樂好敏感,MagMag也不例外,對爸爸的舞台音樂最有反應,睇show坐第一行都不怕聲大,返屋企再叫父母重播,Gina說:「好多小朋友睇show會怕大聲,佢完全無,可能聽慣咗,一聽到啲表演音樂就會跳舞,佢仲記得邊首打邊首,識得叫番我哋播。」

為對兒子保持一點神秘感,小齊會返回魔術學校練習,甚少在家中讓兒子看見,寧願把時間與兒子玩車仔和其他活動。「我練習唔可以畀佢騷擾我,佢會成日扭扭抱,我寧願快啲自己練完再陪佢。」

小齊成功創下「1分鐘內完成6組巨型瞬間轉移魔法」之健力士世界紀錄。

5歲小孩 啱學魔術

性格屬思考型的MagMag,不像其他小朋友「電力無窮」,去街玩一小時就眼瞓;老師播歌竟然會問聲音從何來,其他小朋友早就聞歌起舞,愛思考的性格或有助他學習魔術。小齊試過帶兒子返魔術學校,但他暫時未能專注,小齊說:「佢會走去玩水機、去白板扮寫、打開櫃桶睇魔術道具。」媽媽帶他看爸爸的魔術show,他也看得入神,每見到爸爸出場,他會大叫「爸爸」!「我同朋友一齊帶小朋友去睇,有啲睇睇吓好驚,中途走咗。」還有小齊的魔術動物助手鸚鵡,MagMag也視牠為好朋友呢!

小齊與太太Gina由學生時代認識至今。

小齊認為,小朋友大約五歲才適合學魔術,認知能力較佳,能聽從指令學習走位等,「阿仔會喺台上學學吓問攞雪糕。」不過小齊覺得一切仍視乎個人能力,女仔亦比較早熟,或可以提早一點開始。

小齊覺得現時囝囝鍾意玩車多過玩魔術, 自己有時間多數陪囝囝「鍊車」。
MagMag將升讀維多利亞(何文田)國際幼兒園K1, 父母希望他學好兩文三語,提升溝通能力。

提升思考能力 要學守秘密

從前想學魔術並不容易,小朋友最多只能上幾堂當興趣班玩玩,難以從小發掘潛能。小齊有見及此,2015年開辦小朋友魔術正規課程,讓小朋友接受有系統的魔術學習,希望培養新一代小魔王。「早期我學魔術嗰時,導師會問我哋今日想學咩,吓?我唔知有咩學㗎喎,冇schedule學習。我記得第一日問導師,見到佢喺報紙有張相,啲十蚊紙飛起好勁,係點做㗎?導師好老實講畀我聽個gimmick係點,再表演畀我睇,原來係咁簡單!」

後來小齊覺得導師的教法是錯誤,他不應直接講出方法,應先讓學生思考做法,再開估才會入腦,就如學習算式,直接講出答案,就會失去學習計算的過程。「要先表演一次畀學生睇,然後叫學生諗好多假設、方向同原因,當學生嘅思考方向正確,再引導佢哋解開謎底。」

小齊開辦的魔術學校加入正規兒童課程,有系統地培養小朋友對魔術的興趣。

魔術世界天馬行空,只有透過不斷思考及實踐,才可創作更多新魔術,小齊說:「所以學魔術第一個步驟係思考,好似發白日夢咁,諗得愈多,魔術成真嘅機會愈高。」學魔術對小朋友的發展亦好處多多,上得舞台表演就要有膽量、有自信、識執生,能表達自己之餘亦要吸引到觀眾眼球,落到台下還要守得秘密!「有同學問你咁點呀?我唔識㗎,我淨係識表演但我唔識教人。仲有魔術師好多時會同觀眾互動,要學好溝通能力,說話語調都要注意,會影響觀眾嘅投入度;而有啲魔術就唔使講嘢,但要靠眼神同動作表演,學生透過魔術會學到多方面能力。」

小齊夫婦明年會復辦大型魔術表演,希望各位家長小朋友多多支持。
兩夫婦生多個主要想為MagMag添個伴, 仔女都開心。

學魔術切忌懶叻

小齊教過無數小朋友,亦製造過很多機會讓小朋友演出,部分小朋友的學習進度超乎他想像。「有啲魔術我諗住要教兩堂,有學生上一堂就可以搞掂晒,落堂仲表演埋畀媽咪睇,冇穿崩。」另一類小朋友則較自我,有小聰明,但聰明反被聰明累,學習有反效果,小齊笑言最喜歡教這類學生。「佢哋以為自己好醒,好似我做咗個魔術畀佢哋睇,叫佢哋諗吓點做,呢啲學生就會即刻講『我一早就知係咁樣咁樣啦!』佢哋以為好簡單,我叫佢哋出嚟試一試,係做唔到。我之後講解番佢哋就知錯,睇嘢唔好睇表面,要諗清楚啲,簡單嘅魔術背後其實好複雜,台上表演咁多嘢係經過長時間訓練。」

因為今年暑假要迎接細仔出世,一年一度的「 李行齊 國際魔法城堡」要停辦一屆,小齊承諾下年一定會搞得有聲有色,表演一些以往甚少在港演出的魔術。今年他們亦會為學生製造其他表演機會,「我希望學生可以踏上舞台,佢哋會因此努力練習,做到最好。」

小齊未肯定兒子對魔術是否有天份,會再觀察多一兩年,如果兒子有興趣,大約5歲可開始正規學習。

懷第一胎 險血管栓塞

距離七月中的預產期非常接近,小齊和Gina的心情好緊張,上次Gina產後身體復元慢,更有血管栓塞的風險,住院多兩星期,坐月亦坐夠兩個月,所以今次Gina不敢怠慢。「醫生話我啲血有啲凝固,行得唔係咁好,如果血管栓塞死亡風險好高,所以要留多兩星期醫院。」

陀第二胎始終有經驗,Gina今次少擔心,不會小小事就上網check一大輪,比較輕鬆,「上次食橙都驚肚痛。」小齊在旁笑老婆不單止輕鬆,進食簡直放肆!Gina笑說:「今次好鍾意食甜嘢,醫生曾懷疑我有妊娠糖尿,我戒甜戒咗半個月,飯都唔夠膽食,日日拮手指睇住,check咗冇事我就食番。」

Gina兩次懷孕都嘔得好勁,上次更險有血管栓塞, 住多兩星期醫院,希望今次生產順順利利。

Gina挺着巨肚湊仔亦比較吃力,因MagMag已不再「一飯」,不能玩弄於掌心,會發脾氣,需多陪伴玩耍;並教定MagMag接受弟弟,其中透過買禮物方式教兒子分享,將來相親相愛。「我哋買兩份禮物,一份畀佢,一份叫佢之後送畀細佬,以免第時爭來爭去,大家都有得玩。」小齊與Gina希望為MagMag添個伴一齊長大,學習溝通與分享,生仔生女一樣開心。

小齊不寄望小朋友做魔術師接班人,一切視乎兩個仔的興趣,如果他們有意走上「魔王之路」,他絕對願意把全部經驗傾囊相授。「佢哋有興趣的話,我可以教佢哋更多,令佢哋唔使行咁多冤枉路,快少少達到目標。」

魔術以外,一家人都喜歡到戶外走走,接觸大自然。
MagMag愛看爸爸的magic show,對舞台音樂更加敏感,返屋企都嚷着要聽。
小齊太太懷孕不便抱仔,他樂做湊仔公。

讀者留言

更多精選內容