Bob 林盛斌︰一屋女人係波士!

Bob 林盛斌︰一屋女人係波士!

為復活節合家歡電影《波士BB》配音的Bob,密密接job豬籠入水,更開設製作公司做老闆,但返回家中要「做o靚」,真正「波士」是一屋六個女人,包括太太、三個女和兩個工人姐姐。「我老婆係最大波士,跟住三個老闆係我三個女,有時仲要聽埋兩個工人講嘢。」俗語話爸爸是女兒奴,Bob笑言自己是女人奴!「我努力出去拼搏工作,都係為咗屋企女人有個舒適環境同生活,唔使太多顧慮。」

Bob出外拼搏,太太Pearl做好賢內助角色,負責照顧三個女霏霏、熹熹和機機,已分別近9歲、5歲半和2歲半,並經常為囡囡拍片影相,send給工作中的老公,幫老公叉足電!Bob坦言自己負責玩,教養工作全賴太太,他們正努力追多個仔,不過無論追唔追到, Pearl話生夠四個一定會封肚,四個已經好完美。

 

 

撰文: Ling
攝影: Jacy(部分相片由受訪者提供及facebook專頁)

麻甩BB詭計多

即將於復活節上畫的電影《波士BB》,找來Bob為主角波士BB配音,Bob曾為一些小角色如企鵝仔配音,今次升呢做主角。「今次角色外表係BB,內心係個好man嘅大人,好開心有機會配呢個角色,個故仔好得意,好正!」早前Bob亮相《Sunday Kiss》的facebook live,已獲大批網友大讚Bob與戲中BB餅印一樣,似足卡通版阿Bob!

1 拷貝

Bob在工作上做波士,返回家中老婆才是大波士,管理家庭,自己只是做o靚,要聽晒屋企班女人話。

2 拷貝

Bob透露今次配音最困難是BB個嘴好細,要特別留意嘴形配音及咬字方面。「好多謝配音領班去教我點配得好啲,同埋我要聽番外國原聲,原聲配得好好,好彩自己聲線嘅厚度、感覺同原聲相近,亦唔使扮BB聲,所以唔算太難配。」

波士BB與Bob除了外表相似,聲音麻甩,Bob覺得自己性格與他一樣詭計多端、招招積積,「甚至有啲對白都似我日常生活會講嘅嘢。」

3 拷貝
Bob為復活節合家歡電影《波士BB》配音,非常盞鬼,更與戲中的麻甩BB餅印一樣。

大女有司儀天分

聲線與爸爸同樣帶點沙啞的霏霏,曾看過爸爸配音的電影後,提出想學配音,Bob希望有朝一日,一家人可為一套電影配音不同角色,相信會好好玩。不過,配音工作要等將來機會,Bob在家中先與三個女大玩角色扮演遊戲,「我做過好多次巫婆、王子,有時客串做公主、家姐,仲有怪獸、警察、消防員……我咩都做勻㗎喇,所有角色扮演難我唔到嘅!」

三個女之中,Bob發現霏霏對演藝最感興趣,尤其似他愛做司儀,「佢喺學校或出面啲團體都獲邀請做司儀,可能人哋知佢爸爸係邊個,咁我都睇過佢幾次現場做司儀,OK喎,佢識搞氣氛,例如人哋講嘢唔好笑,佢會哈哈哈扮好笑,唔喺稿入面㗎喎。」

熹熹和機機對鏡頭亦敏感,Bob閒時喜歡為她們拍下短片留念,一舉手機她們就會整古做怪;之前又帶過一家人拍廣告,囡囡都交足戲。Bob覺得三個女都有演藝天分,或許將來有機會入行,「希望咁多位老闆多多關照啦!」

4 拷貝
對於生唔生多個,Bob有徵詢網民意見︰「三個已經好飽,仲追唔追好呢?」獲大多網民支持,但Pearl話其實好少見到老公,好少機會啦。
5 拷貝
Bob話生一仔一女湊個「好」字,三個女豈不是一個「姦」字?

做「貼地家長」盡力就好

Bob是DJ出身,經常踏上司儀舞台,對咬字及中文表達能力尤其看重,所以囡囡由細到大,Bob都有訓練她們的中文表達能力。「無論咬字、夠唔夠字正腔圓、語氣表達、說話長度、幾時抖氣等等,我都有教佢哋,尤其係咬字,好似一盞燈個燈、坐張凳個凳,冇懶音講得好好。」

Bob除了對囡囡的中文程度較嚴謹之外,便沒有其他要求,與太太從沒有催谷囡囡的學業,最多參加一些以玩為主的興趣班,例如兒童體操、溜冰、鋼琴等,大前提一定要囡囡喜歡才參加。「好似學琴係大家姐話想學,先搵個老師教;佢又話想學功夫,咪搵啲班俾佢上,佢玩完一輪發覺唔啱自己,覺得游水啱啲,咪轉去玩游水,我哋從來唔會迫佢。」

6 拷貝
戲中重點講到兄弟情,Bob一定會帶囡囡入場睇戲,愛惜三姊妹的手足之情。

霏霏現就讀大角嘴一間津貼學校,下年度熹熹會跟隨入讀,Bob選擇做「貼地家長」,無諗過每月花過萬元學費讀私校、國際學校,甚至拉攏人事讀名校。「爸爸媽媽都係咁長大㗎啦,喺屋企樓下轉彎嗰間學校讀。只要佢哋完成功課,考試盡力,分數正常合格,我哋已經覺得好好。」

7 拷貝
霏霏和熹熹因遺傳媽媽有近視及散光,細細個要戴眼鏡,媽媽都感到心痛,要限制她們玩電話的時間,以免進一步惡化。

教女做個普通人

Bob忙於賺錢養家,照顧三個女的重任落在太太Pearl身上,Pearl教女心得是凡事從女兒的角度去想,並教她們做個普通人,能做一個普通人已經合格。「比普通人做得更好就喜出望外啦,就算佢只係做到普通人,我都唔會氣餒。」

Pearl覺得三個女各方面已做得很好。做人有愛心、有禮貌、 懂得尊師重道,性格仲幾精叻,她逐一點評道:「大家姐似蠱惑仔,夠聰明,做嘢好快但唔精,二家姐似將軍,有大將之風,佢可以做得好好,視乎佢做唔做,佢係比較懶;細細妹則算係智者,喺軍隊佢就係軍師,佢係精人出口笨人出手嘅精人。」

10 拷貝
大女慢慢由大波士變二波士再變細波士,因為要聽妹妹話,「所以細細妹先係最大波士,兩個家姐好似工人咁,好多嘢都就個妹,原來孻女比較反叛係有原因。」

三個女人一個墟,三個聰明女相處時偶有爭風呷醋,但Pearl自小告訴她們是同一父母所出,同樣是父母的禮物。「呢個世上只有你哋幾姊妹係同一爸爸媽媽,就算好朋友都係唔同父母,所以無論你哋點嗌交都好,最後你哋都要愛錫對方。」

細細妹機機貌似周迅,好有氣質。

養六個女人要過億

N年前「風之后」李麗珊話生一個要400萬,現在連通脹計算就不止此數目,Bob要養三個,更積極製造第四個B,還租住加多利山大屋,Bob的開支十分巨大,坦言要再努力搵錢養家。「仔都話求其俾啲嘢佢食、俾啲嘢佢玩,但女唔得,女仔啲嘢精緻啲,又貴啲、巴閉啲,你諗吓一個女朋友使你幾多錢?我依家屋企有三個女朋友,加埋我老婆,仲有兩個工人,佢兩個都要氹㗎喎,唔止千幾萬,億幾先啱呀!」

8 拷貝
Bob承諾妻女努力戒煙,惟暫時仍未做到,「我一定有一日做得到!」

Bob是出名的工作狂,密密接job做司儀、拍廣告,更開騷做棟篤笑、開製作公司做波士,一切全為家中四條Queen。「希望屋企人有個舒適生活,唔需要太多顧慮,可以做自己想做嘅事。我自己使嘅錢唔多,物質需要亦唔多,好多時只係為日後老咗同太太積穀防饑。依家幾個女嘅生活費、學費、興趣班、玩樂費、旅行費等等,都係我嘅使費,所以我要好努力一蚊一蚊搵返嚟。」Bob早兩年曾因過勞入院,現在經中醫調理後,身體狀況改善不少,惟工作之餘,要多爭取時間休息。

9 拷貝
Bob以前因工作拼搏沒有帶妻女旅行,如今有見成績,終能抽時間一個人帶四條女、揹四個袋去旅行……記得睇住條腰呀!

拒絕送樓做嫁妝

養大三個女可以帶來三個仔,有六個人愛錫自己夠幸福,Bob憶起有次與細細妹機機玩結婚遊戲,都泛起一絲感動。「希望啲仔對佢哋好好啦,起碼似佢哋爸爸咁靚仔先啦,唔使好有錢,戶口求其有幾千萬,有十層樓揸手就OK㗎喇!」講笑啫,揀女婿講心唔講金,「唔使一定要有樓啦,只要對我個女好就得,你對佢好就自然會努力工作,提供一個好嘅生活質素俾佢,到佢哋建立家庭生小朋友,即係我個孫啦,你都會好好照顧佢哋。」簡單而言,做Bob女婿的條件只要是負責任的男人,有擔當,願意好好照顧他的女兒就合格。

13 拷貝
縱使Bob工作繁忙,但父女關係從沒半點疏離,每次回家三個女都跑向門口迎接爸爸,十分窩心,Bob說︰「爸爸確實幾靚仔,女仔係比較鍾意靚嘢,所以鍾意攬我,好正常啫。」

有報道指Bob買樓送女做嫁妝,Bob斷言絕不會發生,自己又不是富豪,最多送龍鳳鐲。「我唔係大劉可以送紅寶石之星、用兩億送鑽石俾個女呀!我唔係孤寒個女,我係唔想佢哋攤大手板,爸爸就會送層樓,你要自己努力搵錢買。如果佢哋真係需要借錢,爸爸亦有能力嘅話係可以,但記住有借有還,只係低息啲,要寫借據,因為啲錢係爸爸搵返嚟㗎。」

14 拷貝
Bob是囡囡的娛樂大隊長,每日盡量早些少返屋企食飯,食完飯一齊玩角色扮演、玩香港小姐選舉、唱歌,或者……拍片向囡囡洗腦「爸爸最靚仔的訊息」!講起拍片,以前常見Bob赤膊上身,下身只穿孖煙囪,隨着囡囡長大及太太的提點,Bob已經着返條褲。

你有獨家湊BB心得嗎?

更多精選內容