屯門公園親親小動物 爬蟲館+特色滑梯+小山丘+彈床|親子戶外好去處

屯門公園親親小動物 爬蟲館+特色滑梯+小山丘+彈床|親子戶外好去處

屯門公園兒童遊樂場翻新過後,設施新淨、安全又好玩。戶外有齊跑跑跳跳嘅玩樂設施、室內有得親親小動物,最重要仲要係免費入場嘅,夠曬我哋同小朋友,放電兩三小時。Blogger「泥圍爸爸的育兒時光」近日帶著孩子到屯門公園玩,即睇分享!

撰文及圖片授權:泥圍爸爸的育兒時光 |編輯:TLY

屯門公園放電玩樂設施

最近去咗一個好唔錯嘅遊樂場,戶外兒童樂園部分,一入去有啲高高低低嘅小山丘、彈床、敲擊樂器及鼓。

屯門公園放電玩樂設施
屯門公園放電玩樂設施
高高低低嘅小山丘
高高低低嘅小山丘

屯門公園特色滑梯

沿途仲見到有噴水花花裝置,不過當日無開到。我哋同呀仔彈左一輪,再行入啲竟然有座目測兩層樓高嘅攀爬塔同滑梯,都係近年少見既設施。當然如果想安全啲嘅,場內仲有另外4條滑梯可以瀡,當中更有一條係我童年時代玩嘅「滾筒式滑梯」。

目測兩層樓高嘅攀爬塔
目測兩層樓高嘅攀爬塔
屯門公園特色滑梯
屯門公園特色滑梯

屯門公園鞦韆設施

不過,最最最吸引我注意嘅係鞦韆設施,記得以前既傳統鞦韆,安全意識 唔太高,但勝在夠好玩。呢度一樣搵到幾種唔同嘅鞦韆,包括:雙人親子型、座椅型(有安全帶,似Car Seat)同搖籃型,玩曬三種,真係樂而忘返。我諗唔止係小朋友,大人見到都覺得好好玩,因為可以「重拾昨天,樂趣一堆」,同童年玩嘅玩樂設施不相伯仲。

室內爬蟲館

玩完室外,原來仲有個室內爬蟲館。館內地方其實唔係好大,但入面養咗好多平時少見嘅爬蟲類,例如:手臂禁粗嘅氈蟒同球蟒、大過隻鑊嘅盾臂龜,仲有啲真係一路都未見過嘅蜥蜴同蠑螈,真心值得一睇,令大人細路都大開眼界。溫馨提示你,爬蟲館冷氣都幾凍,去室外玩完,記得同小朋友抹汗同洗洗手!

室內爬蟲館
室內爬蟲館
館內養咗好多平時少見嘅爬蟲類
館內養咗好多平時少見嘅爬蟲類
真心值得一睇,令大人細路都大開眼界
真心值得一睇,令大人細路都大開眼界

總括嚟講,室內同室外同樣好玩,係一個有誠意嘅玩樂設施!可以再去!

屯門公園

地址:屯門西鐵站旁(在屯門西鐵站B出口步行約十分鐘經公園便可到達遊樂場)(顯示地圖
如果係其他地區嚟既,可以參考康文署網頁(https://www.lcsd.gov.hk/tc/parks/tmp/access.html)。

開放時間如下:
兒童遊樂場:每日上午7時至下午11時(包括公眾假期)
爬蟲館:每日上午9時至下午6時(包括公眾假期)
每星期一上午7時至下午1時暫停開放,以便進行場地保養工作。

(如星期一為公眾假期,保養工作將順延至下一個工作天進行)

 

更多精選內容