建造業安全周嘉年華 免費玩盡攤位、充氣攀石牆、玩具挖掘機

建造業安全周嘉年華 免費玩盡攤位、充氣攀石牆、玩具挖掘機

好多朋友都成日問周末同小朋友去邊度玩,我Parent婷又有好推介,就係 建造業安全周嘉年華 喇!發展局同建造業議會已經第七度合辦「建造業安全周」,上年勁受歡迎嘅「建造業安全周嘉年華」,將會係今個星期日移師到觀塘海濱同大家見面,等大家可以喺一個輕鬆環境了解多啲建造業安全嘅知識。咁有意義,係咪好啱帶埋小朋友去玩呢!

(Present by 發展局及建造業議會)

建造業安全周嘉年華 再次回歸

「建造業安全周」有唔同類型嘅活動,好似研討會同工地參觀等,但我覺得「建造業安全周嘉年華2018」就最啱帶小朋友去,上年我都同小朋友去過,大人小朋友都一樣玩得咁開心,所以今年都唔可以錯過!今年嘉年華會喺今個星期日(5月27日)下午1點至6點,喺觀塘海濱「VESSEL 發現號」舉行,地點都方便,重有免費穿梭巴士來回觀塘港鐵站及德福廣場,加上係免費入場就更加吸引啦!

建造業安全周嘉年華2018
建造業安全周嘉年華2018

透過遊戲讓大家了解安全重要性

呢個活動其實係想畀大家了解建造業安全嘅重要性,提升建造業工友同家人嘅安全意識,希望做到「零意外」嘅工作環境。場內有充氣攀石牆、玩具挖掘機同攤位遊戲。充氣攀石牆畀小朋友體驗「高空工作」;小朋友仲可以化身成「駕駛員」,利用操控杆控制挖掘機。至於攤位遊戲就包括密閉空間工作、棚架注意事項、吊運安全作業同個人防護裝備等等,畀大家可以全方位認識建造業相關知識,同工地安全嘅重要性。

會場內設有充氣攀石牆,小朋友會在佩戴安全帶後進行遊戲。
會場內設有充氣攀石牆,小朋友會在佩戴安全帶後進行遊戲。
小朋友可化身駕駛員,利用操控杆控制挖掘機,將波波球挖起並放進籃子內。

儲印章免費換禮物

活動仲有展覽區展示合規格嘅工作台同棚架,又有專人同大家講解,家長帶小朋友去就可以畀佢哋喺輕鬆嘅環境下學習到唔同嘅嘢。參加者參加攤位遊戲同參觀展覽區後仲可以得到印仔,儲齊指定數量印章仲可免費換禮物。現場仲有免費小食、花式足球、雜技表演同3D拍照區。咁多活動,玩足成個下晝實冇問題,你都快啲mark低日子,帶小朋友去玩喇!

小朋友可化身駕駛員,利用操控杆控制挖掘機,將波波球挖起並放進籃子內。

建造業安全周嘉年華2018
日期:5月27日(星期日)
時間:下午1時至6時
地點:觀塘海濱「VESSEL 發現號」

更多精選內容