機場維修區睇日落+下白泥天空之鏡  全港5大日落好去處|附交通資訊

機場維修區睇日落+下白泥天空之鏡 全港5大日落好去處|附交通資訊

機場維修區是不少年輕人經常來打卡和野餐的地方,其實它都是影日落好去處!今次就介紹全港5個睇日落勝地,包括下白泥、南朗山、蛇嶺及九龍炮台山,列齊有用交通資訊,快啲同小朋友一齊去打卡,享受日落美境啦!

原文刊於:新假期|編輯:TLY

全港5大日落靚景

1.下白泥

相信香港人對下白泥都唔陌生,呢度係新界最西面嘅地方之一,所以出咗名可以睇到靚日落!有體力嘅話,仲可以由屯門良田坳行入去,路程大約2小時,沿途風景都好靚!周末日落下白泥睇完日落,記得留低等埋Magic Moment!不過下白泥靚就靚喇,交通就比較唔方便,目前只得一架33號小巴來往元朗同下白泥。日落之後,排隊等小巴嘅人龍絕對會嚇親你,而且20分鐘先一班車,記者試過足足等咗兩個鐘先上到車呀!嗚嗚!

 

下白泥係新界最西面嘅地方,出名可以睇到靚日落!
下白泥係新界最西面嘅地方,出名可以睇到靚日落!

下白泥

交通:★☆☆☆☆
難度:★☆☆☆☆
靚景指數:★★★★☆

交通資訊:元朗搭 33 號專線小巴入

回到目錄

2.機場維修區

呢度係另一個少有可以睇到太陽從海平面消失嘅地方,完全冇高樓大廈遮掩,只要天氣符合預期,就可以影到靚靚日落!除咗日落之外,仲可以近距離睇到飛機升降。記者當日由東涌踩單車去到機場維修區,都只係大約1小時,不過只有大約一半路程有單車徑,接近飛機維修區嘅路段都要踩馬路或者行人路,記住要注意安全。如果唔想踩單車,亦可以喺東涌搭S52巴士,班次都算密。呢度嘅草地亦可以影到好多靚相!

機場維修區係另一個少有可以睇到太陽從海平面消失嘅地方。圖片來源:西文Simon
機場維修區係另一個少有可以睇到太陽從海平面消失嘅地方。圖片授權:西文Simon
圖片來源:西文Simon
圖片授權:西文Simon

機場維修區
交通:★★★☆☆
難度:★☆☆☆☆
靚景指數:★★★★★

交通資訊:東涌市中心或逸東邨乘 S52 號巴士總站/逸東邨逸東商場有租借單車服務(價錢視乎款式而定,7:30PM還車)

回到目錄

3.南朗山

海洋公園就去得多喇!附近嘅南朗山你又去過未?以黃竹坑巴士總站起點,15分鐘就可以去到南朗山休憩公園,再行45分鐘就可以到達山頂停機坪。近至深灣、海洋公園,遠至南丫瓜、鴨脷排、香港仔避風塘嘅景色都可以盡收眼底!

在南朗山近至深灣、海洋公園,遠至南丫瓜、鴨脷排、香港仔避風塘嘅景色都可以盡收眼底!
在南朗山近至深灣、海洋公園,遠至南丫瓜、鴨脷排、香港仔避風塘嘅景色都可以盡收眼底!

南朗山

交通:★★★☆☆
難度:★★☆☆☆
靚景指數:★★★★☆

交通資訊:乘南港島綫至香葉道的黃竹坑站出口A,隨後步行至黃竹坑巴士總站再到南朗山道休憩花園,沿路直上直升機坪。或是到銅鑼灣乘搭72A、75、107 巴士於黃竹坑巴士總站下車,再沿路徑上山。

回到目錄

4.蛇嶺

近年先開放嘅蛇嶺,以往一直都係邊境禁區,所以識得嚟嘅人並唔多,由馬草壟軍營小巴站行到山頂,都只係需要45分鐘,呢個毫無阻擋嘅小山丘,絕對係睇日落嘅好地方!

蛇嶺以往一直都係邊境禁區,所以識得嚟嘅人並唔多。圖片來源:流浪攝
蛇嶺以往一直都係邊境禁區,所以識得嚟嘅人並唔多。圖片授權:流浪攝
除咗日落之外,呢度嘅夜景亦都好吸引!圖片來源:流浪攝
除咗日落之外,呢度嘅夜景亦都好吸引!圖片授權:流浪攝

蛇嶺

交通:★☆☆☆☆
難度:★★☆☆☆
靚景指數:★★★★☆

交通資訊:上水出發坐276B巴士於落馬洲轉車站下車;如在天慈邨出發可坐B1號巴士到下灣村。
回到目錄

5.九龍炮台山

呢個炮台山並唔係講緊港島線港鐵站嗰個炮台山,而係油塘附近嘅炮台山,又稱魔鬼山。由油塘港鐵站一出,往鯉魚門邨方向,經衛奕信徑第三段就可以到達炮台山,呢度絕對係睇維港景色嘅九龍區代表!

油塘附近嘅炮台山,又稱魔鬼山
油塘附近嘅炮台山,又稱魔鬼山!圖片授權:流浪攝

九龍炮台山

交通:★★★★☆
難度:★★☆☆☆
靚景指數:★★★★★
交通資訊:油塘地鐵站A1出口,到鯉魚門廣場往鯉魚門道。

常見問題:

1.機場維修區交通方法?

答:東涌市中心或逸東邨乘 S52 號巴士總站/逸東邨逸東商場有租借單車服務(價錢視乎款式而定,7:30PM還車)。

2.屯門良田坳行去下白泥要多長時間?

答:大約2小時。

回到目錄

你會帶仔女去嗎?

更多精選內容