澳門 新濠影滙 睇國際級大師魔術表演

想同小朋友出外玩下度下假,但又冇乜時間,咁嚟個兩日一夜澳門親子遊就最啱喇!澳門雖然地方細細,但搭車方便,又多嘢啱小朋友玩,最近 新濠影滙 為慶祝一週年,魔幻間有個大型3D幻象魔術表演,好啱一家大細,爸爸媽媽搵個週末帶小朋友去澳門啦!

 

撰文及攝影:Heidi Lau

新濠影滙 魔幻間一週年的慶祝節目,首度結合3D幻象與大型魔術表演,請來國際級魔術大師法蘭茲‧哈拉瑞(Franz Harary)設計、策劃及主持,帶來耳目一新的感官刺激。

入場睇表演前,會經過一個小小鏡子屋,基本上都係一直向前行,好快就入到去。

整個魔術表演共90分鐘,分別於三個魔術劇院上演。入場第一個睇嘅表演並唔係三個魔術劇院之一,同埋只係得企位,不過都係睇一陣,好快就會入第一個劇院。

有個中間有椅子的大齒輪,魔術師Travis Winkler會全程用英文講,內容大概話會安排一個人坐落去,然後變走佢,唔識聽都唔緊要,睇就得。

安排個人坐落去,然後密封個位,之後就上鎖,然後不停轉個齒輪,打開之後人就唔見咗啦!睇完就準備入第一個劇院,呢個時候工作人員會派定副3D眼鏡俾大家,但到第三個劇院先會用,可以放落袋先,費事跌咗呀嘛。

入劇院前會經過一個等待位,工作人員會安排入場,有分紅色及黃色兩邊,相信係大家睇第一、二場嘅魔術表演會有先後分別。

第一場睇係先古堡劇院嘅啤牌魔術,由FISM世界魔術大會錦標賽北區冠軍兼IBM年度最佳近距離魔術師Shin Lim表演,表演期間佢仲會邀請兩位觀眾上台,近距離睇佢點樣將啤牌變來變去,佢個啤牌魔術表演動作與動作之間都唔算太快,留心啲睇,或者會睇到破綻,不過佢手法都好高明,記者就睇唔到啦!

第二場就去到魅影劇院,由來自美國榮獲世界魔術師大獎並於FISM世界魔術大會錦標賽奪魁的Arthur Trace表演,佢表演就比較生鬼,表情動作亦表較豐富,亦都邀請觀眾上台,不過就係同佢合作一齊表演魔術。

睇完兩場魔術表演,終於到戲肉,就係Franz Harary嘅3D幻象魔術表演,個場地好大,集合前兩場嘅觀眾,台上有個超大屏幕,而呢場歡迎大家影相,仲叫大家分享去社交平台添!

呢場魔術表演會用上好多大型道具,又車又轉盤等等,場面好震撼。表演中途,當然會邀請觀眾上去玩下啦!

其中一個用到火嘅魔術表演,助手將Franz Harary困住喺個箱度、鎖住佢,然後成個道具點火,之後當然冇事出返嚟啦!真火加埋熒幕嘅火效果,成個場面幾震憾!

睇到中途,就會提你戴上先前派嘅3D眼鏡,又會表演魔術同有人跳舞。

3D幻象魔術表演做到11月15日咋!想睇就要快啲訂票喇!

你會帶仔女去嗎?

更多精選內容