天水圍淋坑山行山路線｜30分鐘登上天水圍後山、睇日落放風箏

淋坑山BB級行山

30分鐘登上天水圍後山淋坑山

我經常問魚子媽：「幾時帶我去行BB山呀！」; 魚子媽：「天水圍你又話嫌遠」我：「唔遠唔遠，周末一齊去啦！」於是我們又展開了久違了的BB級行山之旅啦！

淋坑山路線

我們相約16:00 於天水圍西鐵站A出口等，之後便走到下面巴士總站，乘K76至總站天恒商場。魚子媽：「這個巴士總站係新起㗎，以前要行去對面先搭到車嘅！」

原來由地鐵站坐至總站也不用10分鐘，SY:「乜咁快就到? 我都仲未同子子研究完陀螺。」

就在天恒與天澤商場中間的一條直路，前方有一條小橋，原來就在橋的對岸便已經看到我們今次的目的地，天水圍後山。

魚子媽：「其實佢叫淋坑山，不過佢好矮，全高都係得81米。」

我：「奇怪，點解明明座山係我哋條橋前面，但係⋯⋯無得直行嘅？」

魚子媽：「我哋轉左一直行，就會見到紅綠燈⋯⋯(吓？明明係對面，就要兜咁大截路？) 其實轉右都一樣得，因為大馬路兩邊都有個缺口， 好多街坊都係咁出入⋯⋯」不過馬路如虎口，交通規則要遵守！

輾轉兜了一大段路，我們便走到馬路的另一邊，左手邊路旁會發現一個入口， 一大幅丟空的爛地，亦有哥哥在玩航拍機。

穿過爛地走上雜草叢間，上山的路就是在這裡開始，看一看錶時為16:40。

魚子媽說：「其實這個山每朝都有好多叔叔姨姨嚟晨運，所以好簡單，好易行。」雖然部份路段比較斜，但又有一級一級的石階，實在一點也不困難。

不過我家有位比較起我更少運動的大嬸，一邊行一邊喘氣地說：「好難行，我仲以為平路，好斜好斜。」

我：「街坊老友記朝朝係度晨運，你好似仲水皮過佢哋喎！」說時遲那時快，魚子媽：「你睇一睇後面，我哋行咗一半啦！後面就係我哋頭先落車嗰度囉！」(嘩！正喎，咁快就行咗一半。)

再上約2分鐘，子子便大叫：「呢度就係Check Point 1啦！」 我：「Yeah！ Yeah！」 SY：「真係好快喎！咁有冇 Check Point 2呀？」

魚子媽用手指指一指前方，原來 Check Point 2 就在前方約5分鐘的路程。我說：「嘩！BB級數嘅山真係啱晒我，話咁快就行到上山頂。」

不計巴士總站到山腳的路段，由爛地開始計起，30分鐘便可登山至最開揚的一個75m標高柱。

人在山嶺上，可以360°飽覽天水圍之餘，還有深圳灣大橋，后海灣及流浮山。

魚子媽準備了風箏，魚子爸是放風箏高手，兩三下手勢，大大隻海棉寶寶便已經高掛天空上。

杯緣子專家都有為SY預備風箏，可惜是一隻$20的扭蛋風箏，大家用盡九牛二虎之力，最後還是靠魚子爸的技藝，勉強能隨風飄揚。

魚子媽說：「終於完成我行山放風箏嘅心願啦」， 而我家主子當然心願就是幫緣子拍照⋯⋯其實正所謂：「日本有「我老婆日日都扮死」，香港都有「我老婆日日都影緣子」是也！」

山頂其實一早己有不少龍友在等待日落，亦有小情侶在享受黃昏，而散步聊天的人士也不少，小小的山頭， 一點也不寂寞。

黃昏6時，橋方位置正正就是日落西山的情點， 山上人人也目不轉瞪的為太陽伯伯留倩影，除了我們的兩位小朋友。

他們很高興的大笑大叫，其實我不明白他們說甚麼笑甚麼，只見他們連望到野花又笑一大餐， 可能心情開朗得變傻了！哈哈！

無憂無慮就是最好。一覽無遺望著鹹蛋黃漸漸下沉，真的很治癒！我要再約魚子媽下次再去另一個BB山頭先得。

大仁生活facebook