親子好去處 黃金海岸酒店 嘉年華會主題親子客房
撰文：呀劍萬帥
親子好去處 黃金海岸酒店 嘉年華會主題親子客房
今次去到黃金海岸酒店，來到VIK櫃檯辦理 Check-in手續，咩叫做”VIK”，原來係”Very Important Kids” 哈哈~
職員俾呀芊一張簡單的入住表格，只需填寫姓名、出生日期及些個人興趣便可以，非常簡單。
當然我也要在另一邊登記Credit Card及簽個名辦理主式的入住手續，雖然只係俾小朋友模彷Check-in，但今次實在係一個好好的體驗，呀芊由Check-in到上房都係一手一腳自己完成。
職員將匙咭遞給呀芊，佢就推住個喼帶住我去搭Lift，看看房間號碼再找找在哪裏。”520″ 很特別的房間號碼，表示”520″就是「我愛你」喔!
一走入房間，真係咩童年回憶都番哂嚟! 房間設計實在太靚太靚太靚啦 (重要的說話要講3次)
成間房真係好似去咗個嘉年華會咁，整張床都用了「掉彩虹」呢個攤位遊戲做主題，床板上的巨型 “PRIZE” 字，
加上床板上的一大堆毛公仔獎品，像真度極高！
另外小童睡床設計採用咗「旋轉木馬」為主題。
在裡面瞓就好似去咗童畫世界一樣。
整個房間充滿「冬甩」同「CUPcake」咕𠱸，人人見到都好想攬住佢。
房間兩面牆身都貼上五光十色及摩天輪影像，說真的…只是身處房間裡已經瀰漫開心氣氛及幸福感。
然後芊芊抬頭一望就發現有個「巨型爆谷」掛在天花板上，感覺像快要倒瀉好攪笑。
除咗爆谷你仲會估到有咩代表性Icon可以出現? 無錯啦…就係「巨型綿花糖」及「巨型三色雪糕」啦！
而且嘉年華必定會見到的三角旗仔都掛滿天花。
整蠱做怪的呀芊拎起咕𠱸來擺出唔同Pose影相。
見到張「掉彩虹」設計的被舖，又點忍得手試玩一下，我即刻拎個五毫出嚟俾呀芊玩，我就可以執吓行李休息一陣。
呀芊玩玩下真係俾佢掉中咗個藍色大獎，不過獎就冇啦，就當係練習一下，遲D落場玩真的。
紮哂馬掉出去
又俾佢再中多一次紅色四獎
來到洗手間，同樣充滿「嘉年華會」味道。
門的設計就好似一張入場券咁，最吸睛係呢個大大的 “TICKETS” 字眼。
就連塊鏡都有設計。
這兩個垂吊式燈膽我特別鍾意。
坐廁都設有兒童廁板，相當細心周到。
雖然呢個小型爆谷機只係裝飾，不過用嚟打打咭也不錯。講個小貼士俾大家知，旁邊的珍寶珠係可以任食唔嬲喔！
仲有個小玩具電流棒可以俾小朋友在房間玩玩。
房間會按小朋友人數，每人有一張小遊戲咭給小朋友玩，有尋找錯處、迷宮及填字遊戲，答中所有問題可以到鯊魚冒險島換領玩具一盒。
在房間玩過、影過、Hea過後，我哋就落到餐廳準品嚐今次主題客房預備的特式下午茶。酒店職員實在太明白小朋友的需要，早就預備好兒童餐具、填色圖及顏色筆，還有…
這個小圓袋係乜東東? 原來裡面放著的是乾冰塊，只要用手啪斷佢就會釋放氣冒，個小圓袋就會慢慢脹大。
實在係一個好好的小玩意，就這樣兩個小朋友玩一玩，坐下來填一填色，爸媽都可以安安落落坐低休息一下，等着我們的下午茶來到。
這個嘉年華會主題親子客房，除咗最基本包括自助早餐外，仲有呢個主題特色下午茶，上次叮叮主題Tea Set有兩架電車圍住D Cake行已經覺得好勁，今次仲…
睇嚟要唱番首「我當你是浮誇吧」先得！成個下午茶有以下咁多樣嘢：
2 x Mango & Crabmeat Wheat Sandwich 芒果蟹肉麥包圓多士治
2 x Sm Salmon w Caviar on Baguette 黑魚子煙三文魚玫瑰法包
1 x Fish Shape Biscuit in Cone 魚仔餅雪糕筒
2 x Mini Beet Burger 迷你牛肉漢堡包
2 x American Corn Dog 炸美式熱狗
1 x Chicken Popcorn 炸雞粒
1 x French Fries 炸薯條
2 x Apple Crumble Cheesecake 蘋果金寶芝士餅件
1 x St’berry Mousse Cake 士多啤梨慕絲 (熊仔形)
2 x Raspberry Tartlet 紅桑莓撻仔
2 x Macaron 馬卡龍
1 x Ice Cream Biscuit in Cone 雪糕筒
2 x Carnival Cupcake 嘉年華杯仔蛋糕
小甜點全部都很精緻，仲有小丑造型，中間的布甸啤啤同佢坐住嗰塊麥子酥餅超夾超好食。
個輕汽球係擺設嚟啫，旁邊個雪糕球先係我至愛，唔知大家童年有冇食過超巿一隻電糕蛋卷，個雪糕球就係EXACTLY同一味道，真係咩童年回憶都番哂嚟。
我問過師父，佢話原本真係有諗過個摩天輪識轉，不過最後都係怕會太危險，所以就放棄呢個概念。
我就覺得無所謂，最緊要D嘢好食！
大家都對雪糕情有獨種愛不惜手。
這個下午茶大人小朋友都真係食得好滿足。
之後我哋再番上房休息一下，準備要參加主題工作坊
到咗五點鐘，我哋就到鯊魚館參與工作坊。
跟剛才的特式下午茶一樣，呢個專題工作坊係這個嘉年華會主題客房包括在內的，可以話係一間主題 客房滿足哂三個願望。
工作坊總共教小朋友做了兩件手作作品，一個係沙樽擺設，另一個係木製旋轉木馬。
職員姐姐都好有耐性去陪佢哋慢慢做。
對於呀芊嚟講呢件作品比較難完成，不過職員姐姐會從旁協助，有一點好讚賞的，係姐姐會先俾芊芊自己試一試，真係見到佢攪唔掂，先會出手幫佢！
作品完成！吼叫…因為佢哋急不及待要去放電啦！
(圖中鯊魚只是陪襯)
呢個媽咪將剛才木製旋轉木馬拆出來的多餘部份，用嚟砌咗個煙花，真係利害！
連呀芊都攪掂哂！哥哥見呀妹未攪掂，專登等埋佢先出發，依家兩個可以同步去玩啦！
這個小型電動車是不包括在主題客房的，雖另外收費。
到咗夜晚食Buffet時間，好期待呀口水都流埋！經過我咁多次經驗，一定一定要到外面搵好嘢食。
凡惠顧自助晚餐的每一位客人，都會送一客開邊煎鮮龍蝦配蒜茸牛油汁。
張張相真係實地即叫即影，真材實料有圖有真相！全部都未經加工 (就算葱花、伴碟都冇！)
龍蝦粥真係啖啖龍蝦肉！
主廚出嚟親手示範咩叫即打龍蝦湯，我起初仲問「龍蝦湯要即打㗎咩？」，真係大鄉里，以為好似忌廉湯咁煮好就「筆」起飲得。
原來唔係咁簡單，仲要加一樣嘢…(想知就自己入嚟試啦)，然後再落攪拌機打勻，原來咁樣先會再Creamy and Soft D！
其他必食推介！有燒鵝、乳豬、燒菠蘿…
知唔知呢杯係咩？Cappuccino？錯哂…就係頭先碗即打龍蝦湯，師傅話可以當佢係咖啡拎起就咁嘆！
食飽後都仲未願上房，把握埋最後時間到鯊魚館再放電！直到打烊先至走。
臨上房仲喺度欣賞一下LIVE，真係好聽過超級巨星囉。
晚上的房間有另一番情調浪漫好多。
很完美的一日，大家沖個靚涼，嘻嘻哈合多一陣就準備瞓覺啦！
兩兄妹一齊瞓！好Sweet Sweet
兩個唔駛一陣就瞓着咗，我同媽咪終於有覺好瞓！
呀劍評分:10分
呀劍評語:全新推出的主題親子客房，小朋友看見房間內每一角落，都已經令佢哋住得超開心，再配合埋主題下午茶，真係打咭打到手軟，其實最新主題房間除咗「嘉年華會」仲有「極速快車」，大家快D計劃定復活節行程啦。
嘉年華會主題客房住宿計劃 (全新推出)簡介
踏入繽紛的嘉年華會，重拾歡樂的童年回憶。房間以摩天輪、旋轉木馬作背景，各種甜點小吃亦彷彿飄浮在半空，夢幻非常。主床以「擲彩虹」遊戲攤位為主題，床頭放有小動物公仔作獎品擺設。小朋友可在「購票處」與爸媽來一場角色扮演，隨後在掛上旋轉木馬帳篷的圓床進入甜蜜夢鄉。
此外，小朋友可根據線索完成客房內的解碼遊戲以獲得寶藏，更可參與主題藝術工作坊，及與家人品嚐由廚藝團隊悉心製作的特色主題下午茶，樂趣無窮。
地址
屯門青山公路青山灣段 1 號
鯊魚冒險島遊樂場
開放時間
10am至10pm(每節50分鐘)
收費
酒店住客: HK$100 / 50分鐘
非酒店住客: HK$150 / 50分鐘
* 以上收費為一位成人及一位小童
* 凡預訂於「酒店優惠」網頁內所列出的住宿計劃，可免費暢玩乙節
兒童小火車
開放時間9am至12nn 及 2pm至6pm(來回大約10分鐘)
收費
酒店住客每次$40/ 非酒店住客每次$60
至Kids遊樂園
開放時間9am至6pm
免費
*詳情請參閱主題客房計劃內容或遊覽以下網址:
https://www.sino-hotels.com/hk/gold-coast/tc/facilities/
使用設施前，需向職員預先登記
電話
2452 8888
網址
https://www.sino-hotels.com/hk/gold-coast/
(以上資料更新至文章當日)
Facebook專頁:呀劍萬帥 kimfamilytravel
