趕走暑氣 激玩10大水上活動
1. 水上單車
要數最多特別水上活動玩同最適合小朋友玩，非西沙水上活動中心莫屬。先講水上單車，有超大架的三輪車及艇形的水上單車，單車本身有浮力，即使你唔識踩單車都無問題，大膽的小朋友可以自己踩都得。
2. 水上彈床
另外，平時帶小朋友去充氣嘉年華跳彈床，佢哋已經好興奮，如果張彈床喺水上面浮下浮下，跳喺上面彈下彈下，嗰種跳躍飄浮感簡值一絕！
3. 浮墊
一張薄薄嘅墊竟然可以浮喺水面？呢張浮墊可以承載1,200磅，幾個肥仔喺上面都問題，一大班人齊齊瞓喺上面碌都唔會沉，識就角度影相，扮輕功水上飄絕無難度！
除咗以上3種水上活動外，呢度仲有碰碰船、獨木板同電動浮板可以玩，兩樣都啱小朋友自己玩。
西沙水上活動中心
地址：南丫島模達灣7號
電話：2792 8307
備註： 另設2小時任玩套餐，會員每位$138，非會員每位$155。
4. 直立板
獨木舟、划艇就聽得多，咁咩係直立板呢？所謂直立板即是站著划木筏，是近幾年新興的水上活動之一。玩直立板最講求平衡力，而且需要運用身體不同部位的肌肉，能提升肌耐力，是一項大小朋友(8歲以上)都啱玩嘅活動。未識玩直立板？唔緊要，藍天體育會有提供直立板初級課程 ($500/2小時)，如果你已經識玩，租用初級板價錢為 $120/1小時、$200/2小時、$280/3小時。
藍天體育會最近還引入了巨型直立板(Monster Sup)，是一塊堅硬挺身的吹氣板，有別於一般直立板，玩巨型直立板需至少4人參與 (最多10人)，而且靠的不是個人技術，而是團隊的合作，因為各人的重量及技術不一，必須互相協調，才能控制巨型直立板的平衡。另外一提，嚟緊8月29日仲有「第一屆香港國際直立板錦標大賽2015」，現正接受報名，獎金高達一萬元，有玩開直立板嘅朋友可以挑戰一下！
5. 直立板生態旅遊
嫌齋玩直立板悶？可以參加直立板生態旅遊，有半日(鹽田/橋咀島)或全日(甕缸/樑船灣)可選擇，半日價錢為$650/3小時；全日價錢則是$850/6小時。
6. 直立板瑜伽
潮流興玩瑜伽，但喺水上玩瑜珈你又試過未？戶外瑜珈又叫純氧瑜伽，練習者在恬靜的環境裡，感受陽光、海水和新鮮空氣，能釋放壓力，舒展身心。
**參與直立板活動需懂游泳25米，巨型直立板則需懂游泳50米。
7. 透明獨木舟
唔少人都有玩過獨木舟，但呢隻全透明獨木舟好特別，初次坐上去感覺好唔穩陣，但其實佢同普通獨木舟一樣，操作技巧都冇分別，若果海水夠清，分分鐘仲可以欣賞到海底世界添！
藍天體育會
地址：西貢新安村60號地下
電話：2792 4938
8.Flyboard
近年最多人討論的水上活動，一定係Flyboard！因為玩佢就好似變身做ironman咁噴射上天，猶如施展「輕功水上飄」一樣。
唔好以為Flyboard好難玩，其實佢唔需要太多技巧，最注重係平衡感，教練會安排初學者着住噴射鞋，在水中學習海豚式暢游，跟住開啟噴射器直射上天，慢慢掌握平衡後，就可以進一步轉圈或玩花式。
除咗Flyboard，其實仲有Jetblade同Jetpack，不過佢哋係唔同的噴射器，Jetblade的左右腳踏可分開操控，能夠做到自轉360 º、720 º、後空翻、前空翻等花式。
至於Jetpack整個裝置大型得多，設有座位，座位後是兩個水力噴射口，不過因為佢係以左右兩旁的把手控制方向，所以比較客易控制。
Flyboard Hong Kong
電話：2641 2333
9.Kiteboard
Kiteboard中文名叫風箏滑水，是其中一種新興的滑水運動。Kiteboard其實與花式滑水相似，使用的板亦幾乎相同，最大分別是動力源自風箏。
只要把風箏放上天，控制風箏動力，再把得到的動力傳送至腳下的板，就可以滑行，速度隨時達到70km/h以上。滑水者可以控制風箏和用板壓水得到額外的力量，做出各種花式，例如華麗的旋轉以及跳躍至幾十尺高空等。
如果想體驗一下Kiteboard，只要就湊夠4人即可成團，每位$500，已包括所有器材租用費；體驗後想更進一步學習，可以參加初學者課程，價錢為$1,600/4小時，二人同行$2,500/4小時。
HK Kiteboard Club
電話：9470 2916
10. 浮潛
講到潛水未必人人敢試，尤其係唔熟水性的人就更加會耍手擰頭，其實要潛落水睇水底風景，又唔使要孭著重裝備先得嘅，玩浮潛一樣得，而且小朋友8歲就可以玩。
如果著咗浮水衣，浮潛其實唔需要好多體力，而且呼吸管會供給充足氧氣，唔識換氣都冇問題。依家喺groupon仲做緊優惠，$268包西貢海岸公園浮潛體驗連來回船票，2人$516；4人$996。
我哋之前都推介咗本地8大浮潛勝地，有興趣玩浮潛可以睇睇。(按此)
蛙人館
地址：尖沙咀加連威老道63號2樓
電話：3173 2665
撰文：Heidi Lau
相片來源：新傳媒資料室、相關機構網站及facebook
