魚排

滘西灣魚排3萬尺釣魚+外島玻璃水沙灘浮潛 小童80蚊玩足一日

親子好去處

廣告

滘西灣魚排|炎炎夏日最好就是一家人出海釣吓魚,既可以考驗吓自己的釣魚技術,又可以培養吓子女的耐性。近日有Blogger搵到一個好地方,一個價錢可以係漁排釣魚之餘,仲可以去埋玻璃水沙灘遊玩,小童80蚊玩足一日,好抵啊!

圖文授權:鯨魚‧蝦子媽咪親子Blog|編輯:TLY

KSW滘西灣休閒垂釣樂園

KSW滘西灣休閒垂釣樂園係一個收費垂釣樂園,面積約3萬平方尺,分別有垂釣區、碼頭、觀賞及餵魚區等,還可以去鄰近島玻璃水沙灘嬉水浮潛,是一個玩足一日嘅親子好去處!首先,係西貢碼頭坐專屬船隻去漁排,船程約半個鐘。漁排免費提供釣魚具,但需自費買魚餌($20有4隻大蝦),故建議上船前去漁店購買!

滘西灣魚排|午膳即釣即煮

好好彩,我地都釣到幾條魚仔,差不多到午膳,所以就比錢係養魚網釣大魚加餸 (約$250至$450不等),保證釣到為止,釣到嘅魚比$50加工即煮即食,還可以點其他菜例如餐蛋麵$40/碗,炒粉麵飯$90/碟,海鮮菜式就海鮮價,價錢尚算合理。

滘西灣魚排|外島沙灘浮潛

食飽飽就搵漁排負責人載我地到外島沙灘,快艇船程5分鐘以內,玻璃水水質適合浮潛,間中可見到魚仔游來游去,小朋友仲玩到跳水。夠皮就上船到漁排沖身換衫,再坐船返去碼頭!

魚排有洗手間、沖身同更衣室,都係好基本的,但唔好太高期望。呢個地方真係玩足一整日,最緊要係漁排上有瓦遮頭,唔怕曬又冇蚊,小朋友係勁開心,大人都玩到謝皮收費仲要好相宜小童/$80位、 大人/$150位 ,可以再去嘅親子好去處!

呢個地方真係玩足一整日,最緊要係漁排上有瓦遮頭,唔怕曬又冇蚊,小朋友係勁開心
呢個地方真係玩足一整日,最緊要係漁排上有瓦遮頭,唔怕曬又冇蚊,小朋友係勁開心(圖片授權:蝦子媽咪親子log)

KSW滘西灣休閒垂釣樂園-魚排
日期:逢星期三休息,假日照常營業
時間:(平日)早上9時至下午5時;(六日及假日)早上9時至下午6時
價錢:成人$150;小童$80(小童2歲至10歲以下)

即睇KSW滘西灣休閒垂釣樂園-魚排詳細地址及聯絡方法

圖文授權:鯨魚‧蝦子媽咪親子log