一年抱兩區永權親授2招添丁秘笈+與仔仔相處的5道法則|日日媽媽聲

一年抱兩區永權親授2招添丁秘笈+與仔仔相處的5道法則|日日媽媽聲

提起區永權,大家都會想起他是「有線幫」,以及電視主持。其實區永權更是一年抱兩好爸爸,他曾在網上分享自己的生仔秘笈,日前更上《日日媽媽聲》大談當湊仔公的經歷。今次,我們就歸納出區永權生仔秘笈及5項育兒秘訣,教大家如何和孩子保持超溫馨關係,爸媽不妨參詳!

撰文:Sunday Kiss|圖片:新傳媒資料庫、區永權IG

一年抱兩秘訣「晨操」助生仔

大家都說陳豪三年抱三很犀利,但原來區永權更威水,以破圈中紀錄一年抱兩兒。當然惹來大家關心紛紛求秘訣。他曾言「細佬係上天送俾我哋嘅禮物,好多人話孕婦生完之後,嗰副『引擎』運作得好順,好容易就有第二胎,我就係呢個情況下,細佬就出現咗。」現時區永權育有2011年1月出世的大仔靖嵐(Aidan),年12月出世的細仔靖崋(音:華)(Ambrose),兩兄弟咁高咁大,行出街常被誤以為Twins!除了天意之外,Albert本身都有些少秘訣,就是「早晨製造」,「唔肯定係咪關事,但係我經驗之談啦。」

他表示「夫妻朝早互動係易中啲,我聽過一個方法,太太可以每朝量一量體溫,如果平時keep得好準確,例如37.5度,如果嗰日高咗啲,就好容易中㗎喇。」他倆就沒有量體溫,惟喜歡做「晨操」,他笑說:「太太婚後冇做嘢一段時間,我就做娛樂新聞好晏先返工,所以我哋生活模式好適合『晨操』,我嗰兩個就係咁嘅情況下製造,我嘅經驗之談囉,哈哈!」夫妻「晨操」好處多,新的一天充滿朝氣,有心有力。他另提到身體酸鹼度(pH值)是否影響生仔生女,傳聞鹼性體質較易生仔,他認為並沒關係,「我喺公司日日飲蒸餾水,蒸餾水嘅酸性偏高啲,但我都冇影響。」

區永權
日前區永權和另外兩位星爸上《日日媽媽聲》大談湊仔經。(圖片來源:區永權IG)
區永權
細仔Ambrose最鍾意食嘢,乜都鍾意食!(圖片來源:新傳媒資料庫)

兩子相差11個月

家家有本難念的經,Albert聽過無數星級分享,都難以應用在家中兩隻甩繩馬騮身上,分別四歲半和三歲半的小兄弟,每日都愛吵架、爭食、爭玩,乜都嘈一餐,Albert沒好氣說:「佢兩個只相差11個月,頭幾年湊佢哋係好辛苦,呢個啱啱飲完奶,轉頭又要招呼另一個,但好多人話,只要捱過24小時無微不至照顧嘅時間,就會變得好好玩。依家睇佢兩個都好好笑,聽佢哋BB嗌交其實好過癮。」

Albert於2009年與太太Clara結婚,2011年便組成了幸福四口之家,能夠一年抱兩快速達標,他亦始料不及。「生第一個時我係交俾個天,好快就接收咗呢份咁好嘅禮物,第二個原本冇諗住咁近。大仔係2011年1月出世,細仔個預產期本來係2012年1月,仲要同大仔exactly同一日!仲諗咗好多嘢慶祝,點知細仔早產五星期,所以變咗一個年頭、一個年尾喇。」

區永權
Albert覺得發掘興趣不一定愈早愈好,自己就是一個好人辦,「好似我學結他都係大學先開始,因為認清楚自己興趣,比起其他人更認真學習。」(圖片來源:新傳媒資料庫)

區永權5道育兒法則 譜超溫馨父子情

落手落腳親自湊仔

早前區永權曾在社交平台表示,家中菲傭姐姐回鄉探親後,受疫情影響,需無了期押後返港。區永權忽然無「姐姐」可用,惟有自己親力親為做湊仔公。期間,他化身成多功能爸爸,幫忙做家務、又要陪仔仔溫書、做功課。甚至乎做屋企的牙醫,在網上分享自己為囝囝剝牙的照片。他曾言:「在家千日好!但在家咁多日…又點算好?其實基本上係節目豐富,絕無冷場,更加需要乜都要自己來,乜嘢都要做,包括做功課、做家務,同埋做牙醫!今日阿Bu又做甩牙仔,整個過程簡直係快!靚!正!完全唔痛,仲唔使花費一分一毫,實在太正啦!」

努力養家

區永權做顧家好爸爸,原來與父母有關。童年她的爸媽都是很努力工作,賺錢養家,只有很小時間與孩子相處。所以區永權努力工作,同時盡抽用時間建立父子情,給孩子父愛。

兩個仔性格皆是活潑好動,令家中充滿歡樂,「都過癮嘅,睇住佢哋郁手郁腳都幾好笑。」(圖片來源:區永權IG)
兩個仔性格皆是活潑好動,令家中充滿歡樂,「都過癮嘅,睇住佢哋郁手郁腳都幾好笑。」(圖片來源:區永權IG)

重孩子意見

貼心爸爸區永權,都曾有迷惘期,和很多家長一樣,都擔心孩子輸在起跑線。於是為小朋友報讀很多不同的興趣班和補習班。直至一次,他發現仔仔上數學堂,課堂上只要求小朋友數1到100,而且發現孩子無興趣這些課堂。於是,他重新審視,回想自己大學時很喜歡結他,很想學,於是他因為喜歡所以以不放棄努力學習,讓他明白到興趣不是逼出來的。面對兩個兒子,也主張聽他們的意願,他們不想學琴,就不逼孩子學琴。大仔想畫畫,他就支持他。

跟上潮流

此外,區永權為了譜出良好的親子情。他學習當一個跟得上潮流的好爸爸,跟兒子們一起成長。當流行社交活動,兒子們擁有自己的IG,區永權會Follow他們,甚至陪兒子追喜歡的KOL,務求投其所好,增加親子話題。

不縱容

雖然區永權很開明,但不代表他放任孩子。他對孩子管教是張弛有度,特別重視孩子待人處事的態度。在孩子面前,他相當有威嚴,只要一個眼神,足以令兒子們改正。

區永權
Albert一直都恨生女,但理智大過慾望,兩個仔已令他和太太疲憊不堪,生兩個真的夠晒數。 太太 Clara(圖片來源:受訪者提供)

明星專訪聽盡湊仔經

華仔好縱個女

區永權訪問過多位中外名人、屢到外地影展採訪,後轉投TVB,多年來訪問過劉德華、楊千嬅、張智霖等紅星,鏡頭前主要講個人及工作,鏡頭後與Albert也分享了不少育兒趣事。

「華仔其實好好㗎,鏡頭後佢乜都肯講,屋企都會講,但一roll機佢就有條底線,只會輕輕講吓。佢話自己都係一個好縱小朋友嘅爹哋,不過細節嘢就唔方便講喇。」華仔50歲才做爸爸,做慈父縱個女也在所難免,「都應該縱㗎喇,佢家財萬貫,個女又咁可愛,如果我有咁嘅女我都縱!」育有兩子的Albert好羨慕生女的爸爸,就像有個小情人嬌嗲自己,「見到朋友同啲女嘅互動好sweet,好吸引好羨慕。」不過Albert話照顧兩個仔已經筋疲力盡,沒精力去追多個女,「理智戰勝慾望!」

Chilam父子愛秘密兜風

另一嘉賓張智霖有「小Chilam」魔童,Albert爆兩父子常瞞着袁詠儀(靚靚)去坐跑車兜風,「Chilam有好多靚跑車,好鍾意帶個仔去兜風,其實靚靚唔係太鍾意,我身邊都有朋友係咁,啲媽咪都係唔鍾意,因為跑車如果開得急,入彎會擺來擺去,小朋友會撞來撞去,都有啲危險。」不過Chilam開車好穩陣,車速不會太快,魔童亦坐得過癮,坐完之後要小心善後,以免被靚靚看穿!Albert說:「仔都係鍾意黐爸爸,佢絕對因為爸爸鍾意咗車,兩父子會靜雞雞去坐車兜風,坐完後要睇下有冇破綻,好似阿仔戴住條鏈,個鏈墜fing咗去後面,會移番正先返屋企,唔可以留下蛛絲馬跡俾媽咪睇到。」

區永權
Albert坦言,希望爸爸在囝囝心目中的形象是開心、是玩樂隊長,而非一名惡爸。(圖片來源:新傳媒資料庫)

 

Albert與太太都是慈父慈母,但兩個仔曳曳時,媽咪的訓話會當「唱歌」,爸爸大喝一聲才會驚,「有時都要有父威。」(圖片來源:區永權IG)
Albert與太太都是慈父慈母,但兩個仔曳曳時,媽咪的訓話會當「唱歌」,爸爸大喝一聲才會驚,「有時都要有父威。」(圖片來源:區永權IG)

關鍵詞
名人親子

你又點睇?

更多精選內容