車婉婉曾被批「孤獨終老」 終破迷信做高齡媽媽產子組幸福家庭|日日媽媽聲

車婉婉曾被批「孤獨終老」 終破迷信做高齡媽媽產子組幸福家庭|日日媽媽聲

提起車婉婉,大家都會諗起她的可愛混血仔仔BBQ。日前車婉婉上《日日媽媽聲》節目,大談自己成為高齡產婦的心路歷程。現年46歲的車婉婉當年生BBQ時已是一名高齡產婦,生BBQ時已42。懷孕前,她亦面對很多挑戰,她與中澳混血兒Johnathan婚後,雖一直有意生BB,但原來一直搞錯排卵期,錯失了多次機會,加上醫生告之其懷孕機率處於極低水平,所以很難懷孕。今次節目,她將會以過來人的身分鼓勵一眾同路人!

撰文:SundayKiss|圖片:新傳媒資料庫、車婉婉@IG、受訪者提供、羅敏莊@Facebook|編輯:Ruby

計錯三年排卵期 錯過懷孕好時機

車婉婉的兒子得來不易。2013年她與Johnathan結婚,婚後一直很想生BB。但大懵的車婉婉一直計錯排卵期,浪費了三年光陰。她一直對於搞亂了排卵期,總是不清楚何時才是「造人」的正確時間。直至一次body check,婦科醫生教她幾時才是排卵期,她才意識到之前等於無嘗試過!加上懷孕前,她和很多圈中藝人一樣,作息時間不定,忙碌的工作,不健康的生活習慣,令身子虛弱,對懷孕有很多阻滯。

直到一次大病經歷,讓她開始正視身體問題。車婉婉最深刻的一次患病經歷是腸胃炎,她足足嘔了一整夜,其血壓亦低得過分,下壓僅有47。留院期間和生病的不適,讓她開始反思人生,不禁自問:「點解發生喺我身上呢?」經過一番思考,促使她戒掉飲食壞習慣,更找中醫以食療調理身體。於是,當年41歲的她,終於如願,能夠自然懷孕 。

車婉婉
當時懷孕五個多月的車婉婉,肚皮脹得好快,終於感覺自己是孕婦,「個感覺突然間hit到我,因為個肚好澎湃,個BB存在感好強。」

她直語「唔係啩?又話好高齡嘅?」車婉婉得悉有孕的一刻,反應極大,感到難以置信,更認定是奇蹟來臨。「我咁虛弱連自己都照顧唔到啦,仲整多件!」當時車婉婉的經期遲來一個月,出院後依然感到疲累不堪,以為與體虛有關,沒有理會,直到友人質問並送上驗孕棒,一驗之下果真顯示︰pregnant!之後告訴老公,啪一聲放條驗孕棒在他手上,老公當場嚇呆!

相士批「孤獨終老」 差點因迷信錯失良機

早年的車婉婉,在圈內是有名的「神婆」,曾寫過星座書。那時的她十分篤信玄學,更曾被相士批此生絕不可能結婚生仔,一度令她沒有想過要組織家庭。及後,她改信基督教,又認識了比她年輕5歲的丈夫Jonathon,二人拍拖3年最終在2013年結婚,在2017年更迎來兒子BBQ。

 

車婉婉
今次車婉婉上《日日媽媽聲》分享自己作為高齡產婦的經歷,鼓勵同路人。(圖片來源:羅敏莊Facebook)

車婉婉產檢心情似坐過山車

生BB前,車婉婉都有諮詢醫生意見,聽後二人已打定輸數。她說:「醫生話我個數字喺無乜機會嘅幽谷,即係喺嗰啲圖嘅低比率地帶。我先生問過醫生好多問題,尤其係40歲生出嚟嘅小朋友會有咩問題,因為過咗40歲好多問題嘅機率會爆升,而懷孕機率就爆跌,所以佢都俾醫生講到好謝吓,咁我哋都做咗心理準備我哋係唔會有小朋友。」當車婉婉放下一切包袱,以輕鬆的心態享受二人世界之際,好消息就降臨,但隨之而來就是更多的擔心,怕高齡媽媽的小朋友會有問題,「每次產檢個感覺好似坐過山車,等結果嘅心情好忐忑。」

車婉婉
在車婉婉期間,老公每次出門口會看她有冇着高踭鞋,出街食飯又俾老婆話晒事, 「佢成6呎3要食飽肚嘢,我要佢陪我食串燒佢都肯,唔夠佢飽㗎,咁已經好偉大㗎喇!」(圖片來源:受訪者提供)

老公最驚生女

除了BB的健康之外,最令Johnathan害怕的竟是怕生女!車婉婉笑言︰「佢係驚慄!當佢知道我有咗嗰陣,佢去祈禱,話千祈唔好係女。因為佢覺得女要擔心好多嘢,仲話要綁住個女喺屋企,因為『啲boys好曳』,我諗啲爸爸係有呢啲擔心嘅。」很意外,Johnathan竟有如此的想法,始終很多爸爸都想要個前世情人。「鍾意啫,但係好多嘢擔心囉。生仔又有另一樣嘢擔心,怕佢撞親、又怕佢打交,仔比較粗暴活躍啲,不過仔女都係一個祝福,最緊要健康。」

其後,車婉婉公佈自己陀B仔,但原來佢哋都唔想知住!因他倆想保持一點神秘感,「我哋唔想知住,而且身邊朋友好鍾意講『你塊面係咁一定係仔』、『你皮膚咁樣一定係女』,我好鍾意聽呢啲,覺得好有趣。」

車婉婉
見證過父母婚姻失敗,車婉婉一直不相信婚姻,直至遇到中澳混血兒兼游泳教練Johnathan,豐富了她的生命,2013年兩人拉埋天窗。
車婉婉
她和兒子BBQ(圖片來源:車婉婉@Instagram)

母愛氾濫變喊包

懷孕後,車婉婉驚覺自己不期然母愛氾濫起來,小小事都好易喊,她記得在懷孕初期,第一次感覺情緒變化是聽到朋友的懷孕朋友告之,找不到BB的心跳,她聽罷竟然哭起來。「我依家講番都就嚟想喊,當時朋友唔知我懷孕,佢見我喊都呆咗。因為身同感受好強烈,明白係好擔心,我就話俾朋友知我都有咗BB。」

第二次是老公一句說話,令車婉婉覺得好委屈,眼淚如泉湧般流個不停,「我好忟憎,我衝入廁所諗住沖完涼離家出走,好黐線,之後沖完涼、洗埋頭出嚟仲不停喊,終於我要祈禱幫自己冷靜,我老公呆咗望住我,『你做咩?我喺呢度。』我講唔到嘢,我要冷靜。其實我一向唔係咁嘅人,比較樂觀,就算喊都唔會喊咁耐,應該係懷孕嘅荷爾蒙影響咗我。」

BBQ出世讓她感到母親的偉大

車婉婉在2017年3月順產誕下重8磅9安士混血B仔Justus,乳名BBQ,兒子眼大大似乎較似媽媽。車婉婉表示誕下兒子後令她更覺母親的徫大:「自然分娩係一個非常艱巨嘅過程,亦令我非常尊敬各位媽媽。」

車婉婉
車婉婉在2017年3月順產誕下重8磅9安士混血B仔Justus,乳名BBQ。(圖片來源:受訪者提供)
車婉婉
41歲懷孕的車婉婉,準備迎接兒子。(圖片來源:受訪者提供)
車婉婉
BBQ眼睛圓大,像爸爸媽媽。(圖片來源:受訪者提供)

做嚴母迫學好中文

對於教育方面,車婉婉已決定要教好BBQ的中文,因自小不學好,愈大愈難學,不想小朋友是一個只滿口英文的ABC。「我好唔贊成淨係講英文,因為英文太容易學,相反中文如果細個唔pick up,以後都會唔識點寫,中學先去學『人、口、手、大、小』?我覺得係好大件事。」

好好栽培兒子 一生一體藝

車婉婉更希望栽培BBQ學識一種運動、一種音樂,用以培養興趣及專注力,「我老公係游泳教練,一定會教佢游水,亦係求生技能。好似游水你一跳入泳池,你係無電話,無得打機,你可以好專注去游水。做人其中一個成功之道就係專注,如果小朋友自小培養專注力,對佢將來有好大受用。」

近年好多報道小朋友承受不了壓力輕生,車婉婉覺得如果小朋友有嗜好,就可以利用嗜好為自己減壓。「呢方面我一定會努力做好,發掘佢嘅興趣,如果佢有興趣游水,就栽培佢游水;佢想打波,就由佢打波;佢比較靜態想玩音樂又俾佢玩囉,總之一定要幫小朋友搵到興趣。」

車婉婉
受母親影響,車婉婉希望做一個嚴母,除了教好中文之 外,更需培養小朋友成為一個有道德、有紀律的人。

你又點睇?

更多精選內容