小一自行分配|2個幾低分都入到「好」的官津小學方法

小一自行分配|2個幾低分都入到「好」的官津小學方法

中小學

小一自行分配學位由即日起至27日接受交表申請。港九多間傳統名校今早已經有很多家長前往交表。小一自行分配學位一向考父母選校工夫,高分孩子當然會博名校,未算高分的有的家長仍會冒險去博,但其實除了傳統名校,一些官津也是不錯的選擇,可以銜接英中、口碑不錯的中學。今次趙Sir分享兩個不夠分也能入官津小的方法,讓父母有多一個方案!

撰文:趙崇德|圖片:Shutterstock|編輯:Ruby

小一自行分配學位|2個低分都能入到官津小的方法

在小一自行分配前夕有家長問我有冇「必入」官津小學嘅方法,我答當然有,家長聽後精神為之一振,以下為家長與我的詳談,想知道「必入」官津小學方法的家長,一定要讀下去。

小一自行分配
港九多間傳統名校今早已經有很多家長前往交表。(圖片來源:新傳媒資料庫)

趙為本人 家為家長

趙:首先,我想你講清楚「必入」嘅意思,係「必入」心儀官津小學,還是「必入」一間小學?

家:兩個意思都想知道,趙sir,你先講我只得15分,點樣必入「心儀」小學?

小一入學
你的子女有「世襲」權(圖片來源:Shutterstock)

方法1:父母是該校職員必獲取錄

趙:喺官津自行分配學校,只有一個方法可以「必入」任何一間心儀嘅官津小學。

家:乜嘢方法咁「秘密」?

趙:完全唔係「秘密」,這方法白紙黑字寫在教育局「小一入學指示」中,不過冇乜家長有留意,喺「指示」之「自行分配學位」階級果一段之第三點甲部咁樣寫:甲)為有兄/姊在該小學就讀或父/母在該小學就職的申請兒童提供的學校約佔學校小一學額30%。

家:趙sir,只得30%,唔係100%,點可算喺必入?

趙:且輕勿燥,跟住果兩點係咁寫:「如有不足之數,以原本預留作統一派位的學額填補」,重有最後一句:「凡屬此類別的申請兒童,必獲取錄。」即係話,只要爸爸媽媽喺心儀小學任全職,唔係part time(兼職),你可以喺秘書、會計、教師,你嘅仔女一定可以喺果間官津小學入讀。

方法2:官小有聯繫的官中或英中

家:夠分數嗎?我得15分咋?

趙:「自行分配」收生分世襲及計分,「世襲」喺唔理分數的,只要你喺心儀小學任職就「必定」收你嘅子女喺度讀。

家:好啦,我唔想為仔女而去心儀小學任職,我只得15分,有冇第二個方法幫啲仔女入名小學?

趙:入名小學就難,入名英文中學就可以。香港官立學校有一個聯繫制度,每一間官小都與一兩間官中聯繫,而奇怪的是,有啲15分都入得嘅官小竟然與皇仁,伊利沙伯官中掛上關係,咁只要家長搵到果啲易入嘅官小,叫仔女苦讀六年,在六年級全級考到頭十名至十五名,便有機會入到名英中官校了。

家:係咩,咁邊啲係易入嘅官小呀?

小一入學
小一入學適齡是五歲八個月至七歲。(圖片來源:Shutterstock)

趙:以下就係15分都有機會入到嘅官小,六年後升上易入大學嘅官中:

校網 官立小學

官立中學(英中)

11 李陞小學

英皇學院、庇利羅士女中

12 北角官小(雲景道)

筲箕灣官中 英皇學院、庇利羅士女中

16 愛秩序灣官立小學

皇仁書院、筲箕灣官中

16 筲箕灣官立小學 筲箕灣官中
18 香島道官立小學

英皇書院、庇利羅士女中

32 塘尾道官立小學 伊利沙伯中學
40 福榮街官立小學 荃灣官中
40 深水埗官立小學 荃灣官中
70 屯門官立小學 屯門官中
72 天水圍官立小學 趙聿修紀念中學

家:以上10間15分都有機會入到嘅官小值得一試,將來考到英中就大有機會入大啦,多謝趙sir 指點!

趙榮德 前喇沙書院副校長,現任社工註冊部紀律委員會會員、香港輔導教師協會榮譽顧問。曾任教育局家庭與學校事宜委員會副主席,熟悉香港教育及升學制度,同時為香港大學專業進修學院之客席講師,亦為升學指南作家,現有著作多達廿二本。(圖片來源:新傳媒資料庫)
趙榮德 前喇沙書院副校長,現任社工註冊部紀律委員會會員、香港輔導教師協會榮譽顧問。曾任教育局家庭與學校事宜委員會副主席,熟悉香港教育及升學制度,同時為香港大學專業進修學院之客席講師,亦為升學指南作家,現有著作多達廿二本。(圖片來源:新傳媒資料庫)

你認同嗎?

更多精選內容