退選港姐 – Yoki Tong
暑假未開始，全城就掀起一陣選美熱，男又有，女又有；鬥靚嘅又有，鬥騎呢嘅都有！今次嘅主角 Yoki Tong (唐碧霞)，原本都係其中一個鬥靚參選人，第一輪已經被封為大熱門，點知轉個頭就話要專心學業，跟住就退咗選喇！仲係學生喎！梗係要搵佢嚟「學界男女神」亮吓相啦！
其實好地地，又有咁多人睇好，點解無啦啦要退選呢？睇報紙就話，Yoki自覺未夠班，所以都係返去讀埋書先再搵機會！不過Yoki同我哋講呢，就係事前冇諗過參選嘅時間係咁漫長，所以都係想繼續讀好書，完成咗做財務分析師嘅夢想先！
Yoki而家喺香港修讀一個英國巴福特大學嘅工商管理學士課程，雖然係自資嘅遙距課程，但係唔代表佢成績差架！Yoki係第一屆嘅DSE考生，當年考到21分，入到PolyU嘅機電工程系，不過佢本身對engine就冇咩興趣，之後就放棄咗個學額，報咗而家呢間大學喇！
除咗讀書之外，Yoki又做過Model，又做過電視節目主持，長遠都會想喺娛樂圈發展嘅。但係娛樂圈係食青春飯，所以Yoki都希望趁年輕嘅時候可以試多啲嘢，最希望就係可以喺電影方面發展，嚟緊佢都好似會拍電影喇！
選得港姐，都應該對自己嘅外表有一定嘅信心啦，不過Yoki對自己都一樣有唔滿意嘅地方喎！就雙眼喇！雖然係夠大又有神，不過原來佢有成千度近視架！唔戴眼鏡幾乎睇唔到嘢，亦都戴唔到有色嘅隱形眼鏡啦！
Yoki平時最鍾意做運動，因為做運動可以令到身分健康之餘，仲會令自己更上鏡。除咗跑步、打籃球，Yoki仲識跳肚皮舞，佢話對擺pose好有幫助，甚至可以改善行路嘅姿勢，個人拉長咗，睇落都瘦啲架！
[youtube id=”9GZg-Gu6vmk”]「學界男女神」唔止要睇盡中學界靚人，仲要殺入大專界！
所以無論你係讀緊中學定大專，只要你認為自己或者身邊嘅同學仔有呢個資格，都可以自薦或推薦俾我哋!
參加方法好簡單，只要將想推薦嘅同學，或者自薦人嘅facebook ，tag喺下面 “Comment”嘅位置； 再將參加者及提名人嘅姓名、年齡、就讀學校、個人專長、聯絡電話，仲有一個月內影嘅近照兩張(全身及正面)，喺學界男女神facebook專頁 inbox或電郵到[email protected]俾我哋；如果成功通過編輯部審核，就有機會成為「學界男女神」!
「學界男女神」，等緊你嚟挑戰!
撰文: Joanne
攝影: Clay Lam
拍攝: Anthony Leong
剪接:Ks
美術:Linda
Hair+Makeup: Emma@ EM Makeup
參考資料：衛生處網頁
