高糖

高糖 包裝飲品睇真啲

健康

廣告

早前消委會抽查市面中式飲品樣本,當中有預先包裝及無預先包裝的飲品,含糖量原來都十分驚人,隨便飲一支幾乎已近每日限糖量,此新聞一出即打破大家一直以來對中式飲品的健康形象!正值邊爐及燒烤的「高峰期」,甜飲自然亦飲多咗,一於認清有咩 高糖 飲品要避一避,搵埋營養師嚟教大家點樣飲得健康!

「 高糖 」、「低糖」及「無糖」的定義

高糖 :超每100毫升過7.5克糖
低糖 :每100毫升不超過5克糖
無糖 :每100毫升不超過0.5克糖

食用分量易忽略
面對眾多陷阱 高糖 飲品,究竟應如何避免中伏?當然要從營養標籤入手,但註冊營養師Elaine指,除咗睇營養標籤的每100毫升有幾多糖外,仲要睇埋該食品的食用分量有幾多糖才是最實際!因為有時飲品雖然合乎低糖的標準,即每100毫升少於5克糖,但大家仍有機會因忽略分量而中伏!卓健醫療註冊營養師佘綺玲(Elaine)表示:「雖然每100毫升中有5克糖以下的飲品都可以叫自己做低糖飲品,但因為大家係按包裝分量去飲,一飲就飲一支或一盒。以大盒紙包飲品為例,食用分量約375毫升,假設其糖量為低糖的臨界點的5克糖,飲一盒已攝取18克或以上嘅糖分,約三至五茶匙糖,平時自己落糖亦唔會落咁多吧!」

按世衛標準,一個成人男性每日糖分日攝取量不應超過50克,而在上述例子中,飲一盒低糖的大盒裝紙包飲品,已佔全日限額的三成六,在大時大節的派對或燒烤情況,唔經唔覺飲三盒已超標!另一中伏位,就是標有「Light版」及「輕怡版」的飲品!Elaine更指這類標語是冇意思、純取巧!因為目前無法例去規管這「Light版」及「輕怡版」的字句,大家要睇番營養標籤,及同原版比較先知到有幾「輕怡」,勿單靠標語輕易上當!

世衛指標 日攝最多50克糖
世衛建議日攝糖量50克為標準,其實是以一個成年男士每日攝取2,000kcal的熱量,而糖分佔其一成來計算出日限50克糖的指標。由於正餐及水果等食物,均有一定的糖在內並且難以計算,所以這指標主要針對包裝食物及或外加調味的糖。即是平時食飯及食生果等都已經攝取了一定的糖分,每天額外攝糖量最多為50克。但熱量及糖量因人而異,如女士們所需的熱量實際上比男士更少,所以日攝糖量是絕對少於50克糖!

下頁:易中伏「健康」飲品

易中伏「健康」飲品
打開便利店個雪櫃揀飲品時,相信大家都會按其健康程度來取捨,其實唔少清潤、解渴或有益的飲品都是爆甜的地雷飲品!你以為清清哋,飲支果茶或酸梅湯實冇死?點知睇番個營養標籤,計一計個食用分量又係嚇死人!我哋用方糖表達俾大家睇睇有幾驚人!

下頁:低糖飲品唔一定低糖

食用分量計落唔少糖
標榜低糖的飲品, 雖然的確合乎營養標籤法,但大家在享用一整盒或一整支的時候,其實好易超出預算。正所謂「少數怕長計」,低糖飲品飲得多,一樣會攝取得多糖分,女士飲兩盒紙包飲品已差不多超標,正常糖量的飲品更不敢想像!

下頁:濃縮果汁實加糖&健康飲法

濃縮果汁多外加糖
由於果汁含有天然果糖,單睇營養標籤好難分別是真果糖還是外加糖,大家在「成分」一列中通常見到「濃縮果汁」或「Concentrate」的字眼,那就不是天然榨的果汁!所以Elaine亦不建議大家飲果汁,因為市面上大多果汁都是用濃縮果汁開出來的,當中更會加入添加劑及外加糖,絕對是甜上加甜!

教你健康飲法
退求其次以為無糖飲品一定好?代糖雖零糖分,及不會令大家直接因糖而致肥,但會有機會令身體在進食其他食物時吸收更加多糖,有機會適得其反!原來用「梳打水」DIY果汁飲品亦可飲得健康,絕對是個好味的替代品,以一份果汁溝四份水為最佳,如怕太淡,可以由一比二分量的果汁溝水開始。

佘綺玲
卓健醫療註冊營養師

撰文:Pan
相片:Sing、新傳媒資料室
備註:文中糖量以四捨五入計算至小數點後一位

參考資料:衛生處網頁