一舞傾城｜李婉華跨境狂踩劇情逐點狠批3宗罪 陳法蓉為尷尬回應

一舞傾城｜李婉華開live勞氣批評 「個個去做舞小姐」

《一舞傾城》收視僅20點，第二周更微跌，一眾演員日前為劇集造勢，港姐出身的陳星妤一再預告愛情動作場口陸續有來，而且愈來愈大膽，又預告今周初夜失守，珍貴初夜賣給關楚耀。人在加國的李婉華原來亦有留意《一舞傾城》，在個人頻道「豪華博客」以此劇作話題，李婉華語重深長：

大家唔好以為做藝人好好，好艱難㗎，你哋睇最近《一舞傾城》，成班港姐出身又好、都係去做舞小姐咋。

李婉華狠批《一舞傾城》1. 晚晚拍賣初夜 佩服袁潔儀姐姐「喊得出」

李婉華激動指《一舞傾城》在晚上九時半播出，是對撼ViuTV《全民造星5》94位小鮮肉，但內容以至每一幕都宣揚「賣處」（出賣初夜），她勞氣指出：「啲細路仔未瞓，要PG家長指引，其實係咪應該十一點後先播？」李婉華直指內容令人譁然兼不安：「有個內容好誇張，勸個女下海，一個女人有手有腳，點會因為窮就去賣女？係咁叫個女︰『阿女，你試一次啦，你咪當自己無咗個處女囉，你為咗阿媽，八百萬呀，跟佢我哋咪脫貧囉，我真係唔想咁窮呀。』但佢唔係窮㗎喎！」另一主持林子博原來亦有睇，補充：「個阿媽仲教個女點同男朋友解釋，話踩單車穿咗。」林子博指李婉華太投入：「唔係佢阿媽有問題，而係編劇有問題。」

李婉華狠批《一舞傾城》2.唔係意識大膽，係做埋動作畀你睇！

身為母親的李婉華未見收火，更指自己做戲廿幾年，無可能未見過呢啲劇本，但《一舞傾城》太過強調處女值錢。「一日到黑，集集都宣揚賣處，賣到幾多錢，大佬呀，咩時間播呀？九點半咋，拍呢個題材無問題，但唔係集集不停重複賣處，幾時下海，幾時搵到個有錢佬出價，阿媽講完又到媽媽生講，仲話好似《華燈初上》，點知日日淨係講賣處，救命！」

李婉華直斥處理手法有問題：

有一集莊思敏同李嘉床戲，嘩，就咁用嘢包住重要部位，然後男上女下咁有動作係度郁，嘩，呢啲唔係意識大膽，係教埋你點做！我重申我好鍾意香港，唔想佢唔好，但點解依家會變成咁？

李婉華狠批《一舞傾城》3. 無價值、無品味 唔需要睇晒先批評！

對於李婉華的批評，亦唔係所有網民支持，有網民留言：「你哋三個都只係睇一啲片段，就係咁批評，好唔公平，亦好明顯你係針TVB，好失望！」李婉華不甘示弱反擊：「我並無批評TVB，我只係批評套劇，教壞細路，不合常理，請不要斷章取義」，有網民又鬧：「你單憑幾分鐘去評論，唔係咁好囉」，李婉華回應：「無價值，無品味，嚴重影響下一代價值觀的環節，仲需要我睇晒全套劇，先可以批評？」句句有火！

陳法蓉被問收視下滑 尷尬回應網民負評

對於有網民批評《一舞傾城》劇情老土兼負評多多，結果導致第二星期收視不升反跌，「沙律媽」陳法蓉出席劇集宣傳時亦作出回應，陳法蓉坦言已看畢整個劇本，比之前已改動很多，又解釋主要是想反映以夜總會作為背景的故事，包括古惑仔、姊妹情和90年代港風的感覺，陳法蓉自言已經做到此目標。

由第39分鐘開始聽。