中年好聲音2｜劉可出局！10強名單提早曝光！myTV SUPER疑錯手劇透賽果
今集出場名單如下 張佳添將會派出最高20分！
《歸來吧》譚輝智｜93分（晉級 MVP）
《我寂寞》黃劍文｜90分
《夜機》安雅希｜86分
《傻女》陳燕娜｜81分
《月亮》沈宗賢｜87分
《與淚抱擁》劉威煌｜85分
最新一集，譚輝智選唱《歸來吧》，佢輕易駕馭呢首難唱嘅歌，令肥媽聽到喊嘅同時更獲張佳添俾出20分滿分，總分93分！
對比上集 最低分數危險區選手似乎無變：
《戀戀風塵》古淖文｜88分
《飄雪》陳蒨葶｜79分（危險區）
《人生何處不相逢》劉可｜79分（危險區）
《去吧！》鄭梓浩｜84分
《逝去的諾言》王玥』｜75分（危險區）
《我心不死》顏米羔｜93分
《情意結》陳俞霏｜85分
《紅茶館》林若盈｜82分
劉可淨係多謝陳慧嫻、彭家麗
事實上劉可的出局感言也沒有特別多謝肥媽、伍仲衡或張佳添等評判，只強調最開心係遇到陳慧嫻，更盛讚對方係自己「畢生的偶像」，現場所見其他參賽者也不特別傷感，另外劉可還對彭家麗表示感謝。
網民發現myTV SUPER初一劇透
雖然真正的12強賽果要到初二晚上煙花匯演後才播出，但因為這一集早在過年前已經錄好，之前一直有傳劉可和王玥都要離開，甚至有參與十強賽事錄影的觀眾更放風林若盈和陳蒨葶將在十強賽中被篩走，不過傳言歸傳言，始終未有實證，想不到在大年初一早上，有觀眾發現 myTV SUPER提早將《你看不見的中年好聲音2》第10集上架，並發現據講一開始就劇透了12強賽果——劉可和王玥將會被淘汰出局！
《中年好聲音2》10強名單提早曝光
在12強誕生後，無綫電視於2月3日在電視城舉行記者會，特別邀請了《聲夢傳奇》畢業生應邀出席，並分享揀選最想與其合唱的選手，據了解《聲夢傳奇》兩屆畢業生冼靖峰、文凱婷、黃洛妍、XiX、趙小婷、彭家賢、趙紫諾、金永衡、劉詠彤、趙頌宜10個單位將與《中年好聲音2》12強合唱，有消息指林若盈和陳蒨葶亦將在這回合被篩走，換言之，《 中年好聲音2》的最後10強名單如下：
- 譚輝智
- 黃劍文
- 安雅希
- 陳燕娜
- 沈宗賢
- 劉威煌
- 古淖文
- 鄭梓浩
- 顏米羔
- 陳俞霏
越唱越強！黃劍文再有好表現！
說回年初二播出的一集，自彈自唱的劍文演出《我寂寞》，大晒煙嗓唱出寂寞感覺，而他的留鬚流浪造型亦加分不少，慧嫻大讚：「恭喜晒你，呢隻歌你做咗好多功課，畀到嘢我睇、畀到嘢我聽，真係畀咗好多心機落去，呢樣值好多分，令我好感動。」肥媽亦大讚劍文做足功課：「引用一句好老土嘅說話，海上扒龍船，岸上有人見，你真係有做功課。」伍仲衡則說：「自從《愛很簡單》個回合，已經覺得你返咗嚟，同埋你畀咗呢首歌新嘅面孔，有啲王傑嗰啲浪子Feel，好不羈，好鬼正呀你！」
安雅希獻唱《夜機》有缺失
穿上酒紅裙的安雅希獻唱《夜機》，她將歌曲改編成 Bossa Nova 風格，雅希邊唱邊搖 Chill 到爆。對於雅希的演出，慧嫻說：「你係一個戰鬥格嘅歌手，但呢隻歌唔係太適合比賽，你聲音係屬於厚同低沉，唱呢隻歌係好聽，不過呢隻咁平淡嘅歌表現唔到你威猛嘅地方。」
伍仲衡亦認同慧嫻所說：「呢隻歌大部分時間係中低音，而你嘅高音係好聽，攞分好多時喺個 Chorus 度，要有啲嘢畀人聽。」張佳添則說：「 Bossa Nova 係輕鬆嘢，大強（吳大強）唱可以攞到好高分，你會玩啲Ad-lib，但 Phrasing 上面唔夠新鮮感畀我哋，你 Own 唔到呢個版本，聽完之後係覺得好好聽，但未夠 Impressed 囉。」
陳慧嫻親揭當年於事業高峰期暫別樂壇之謎
《夜機》乃慧嫻爆紅作品之一，當年正值事業高峰的慧嫻宣布暫別樂壇遠赴美國讀書，令一眾歌迷依依不捨，今集慧嫻自揭箇中原因：「我個人好簡單，唔多諗嘢，多得我老竇係超級控制狂，佢話咩我就做咩，雖然我有唱《反叛》，但都係被迫㗎啫！爸爸覺得我唱咗歌，滿足咗自己愛好喇，咁不如讀埋大學，如果第時唔唱歌，都起碼有個學歷喺度，當時我自己都喊，都好唔捨得啲歌迷。」
陳慧嫻狠評劉可：令到隻歌唔知變咗乜鬼嘢
「大魔王」劉可未能承接上一集氣勢，表現失色再度跌入危險區！獻唱《人生何處不相逢》的劉可透露歌曲是送給亡父，惟因他將歌曲改編到三不像，獲慧嫻直言感失望：「你揀呢隻歌我有啲失望，唔明點解你要揀呢隻歌，呢隻歌係小調，唔 Expect 你用現代嘅方法去唱，你又重新編曲，令到隻歌唔知變咗乜鬼嘢。」肥媽說：
「你好想表達好多嘢，但你依家諗多咗，唔知自己想點，有啲三不像，拉低自己分唔抵嘛！」
最終劉可僅獲 79 分，與同獲 79 分的陳蒨葶和獲 75 分的王玥齊齊跌入危險區。
網民同表失望 直指「搏淘汰」有內幕
對於劉可的表現，一直有持正反意見的網民，不少對劉可甚有意見的觀眾認為他早應淘汰，但亦有觀眾為其不值，覺得他懷才不遇，甚至被節目組玩弄！不過去到今次表演失準，有忠實觀眾都在留言區表示劉可應該係早知要出局，所以表現得毫無感情，「知道點唱都要輸」：
