中年好聲音2丨許志安哥哥62歲現身海選 素人參賽者一開聲聽到伍仲衡O嘴

阿姐功架十足《女殺手》 伍仲衡聽到O嘴抽水

《中年好聲音2》海選唔少得騎呢參賽者。其中1293號自稱「網絡填詞人」苗姜就最為奇葩，一出場就唱《女殺手》，聽到肥媽同伍仲衡都O曬嘴。伍仲衡聽到完全O嘴，仲問對方點解無唱惡搞版歌詞「剝衫剝褲通街走」，對方又接到搞笑說「入到100強都可以試下㗎」！

曾志偉最冧台妹參賽者

除咗香港參賽者之外，今屆亦有海外參賽者報名參加。881號台灣參賽者Madeline Ko指自己特意從台灣飛到香港參加今次海選，總監製曾志偉一聽到就嚇到擘大口，評判肥媽同伍仲衡都未開口講嘢，曾志偉就忍唔住連問Madeline多條問題，仲大讚：「哇厲害哦！」

上世紀亞視兒童節目主持蔡偉光 為女兒報名參賽

53歲蔡偉光曾經喺亞視做過兒童節目主持、MV男主角，又參加過多個歌唱比賽，今次會參賽係因為想鼓勵個女做事要有信心。有豐富經驗嘅蔡偉光的確非常有台風，唱歌技巧亦一流！

許志安62歲哥哥參賽 兩兄弟一個餅印

今年62歲的許志安哥哥許志偉現身《中年好聲音2》海選，不過許志偉一出場並沒有表明自己係許志安嘅哥哥，直到評判伍仲衡指出其單眼皮令佢聯想到許志安時，許志偉先點頭承認自己身份。許志偉亦冇選擇細佬許志安嘅歌曲，反而選唱張學友的《忘情冷雨夜》，不過唔知係唔係太緊張，音準拍子都有啲甩漏。

參賽前曾聯絡55歲許志安 對方卻已讀不回

許志偉在傳媒接受訪問時被問到許志安有否為自己加油打氣，許志偉驚爆雖然曾經聯絡過許志安，但對方並沒有回覆短訊。許志偉為胞弟護航，表示許志安可能太忙，才沒有回覆自己，不過依然感到有點傷心。

呂良偉弟弟呂良國型爆出場

呂良偉的弟弟呂良國今日型爆現身，一出場冇講太多嘢就直接唱出李克勤的《一生不變》。今年已經62歲嘅呂良國帶上黑框眼鏡，穿上黑色西裝外套，打扮簡單得嚟非常有型，獲網民大讚！

47歲馬評人馬可思宣傳賣口乖 靚聲獻唱黎明

47歲馬評人馬可思今日亦有參加海選，自我介紹嘅時候就宣傳自己頻道賣口乖：「我係MyTV super 18台賽馬主持馬克思，我係為咗MyTV Super 18台而嚟嘅」，賣完廣告就唱出黎明嘅《哪有一天不想你》，不過都係唱得冇幾句就被叮走！

今日海選共有千人塞爆錄影廠，評判之一的伍仲衡繼續充當「殺手」角色，相信不夠的選手唱兩句便被「叮走」，選手中不乏熟悉面孔，童星「光頭仔」王嘉明亦有參賽；呂良偉亦鼓勵弟弟參賽；許志安的哥哥亦有參加海選，他直言弟弟許志安及弟婦Sammy都不知道他參賽；屯門Nana亦有現身，這次是陪老公來參賽。