中年好聲音2｜陳蒨葶低分出局霎時黑面 總決賽最後6強或變全男班！
今集《中年好聲音2》8強戰出場名單及歌曲如下：
《讓一切隨風》劉威煌
《抉擇》譚輝智
《明星》古淖文
《為你鍾情》陳俞霏
《星夜星塵》陳蒨葶
《心債》安雅希
《仍然記得嗰一次》黃劍文
《忘盡心中情》顏米羔
《普通人》沈宗賢
安雅希獻唱梅艷芳《心債》編曲出事大跌Watt
「大魔王」安雅希獻唱天后梅艷芳的《心債》，她將歌曲改編成華爾滋風格，可惜未能打動評審，肥媽說：「你擺得太多感情同咬字落去，呢隻歌其實你唱得愈簡單就會愈好，呢隻歌最緊要係歌詞，阿梅唱到好似講嘢咁，如果你明白歌詞講咩，用個歌詞意思講番出嚟，咁就贏架喇！」周國豐則直言：
「阿梅嘅歌係好難拿捏個感情，呢隻係其中一首，呢隻歌嗰種戚戚然、乸住乸住係好難拿捏，你今日表現係一般水準，感唔感動到我哋呢？呢首唔得。」
古淖文唱《明星》感觸落淚
愈唱愈強的古淖文獻唱《明星》，到尾聲時一度感觸落淚，他解釋：
「好想送呢首歌畀佢，佢就係喺呢個比賽認識嘅兄弟梁浩賢，佢離開舞台時講咗一句說話深深打動到我，佢話：『我嚟得呢個舞台，我只係希望大家記得我。』我哋企得起呢個舞台，除咗透過歌聲感動大家之外，我哋只想有一個要求，就係希望大家記得我哋、記得我哋個名，就係咁簡單！」
女歌手買少見少！《為你鍾情》陳俞霏
選唱《為你鍾情》的陳俞霏賽前接受製作組專訪，她透露 18 歲時曾經失聲無辦法再唱歌，她說：「我 18 歲時已經開始出嚟唱歌，因為太過消耗自己把聲同身體，一下子身體爆煲，又哮喘又生息肉，搞到聲都冇埋，醫生話我冇辦法再唱歌！」
18歲失戀後壓力爆煲放棄唱歌全靠一人打救！
俞霏自言不是認命的人，不想毅然放棄音樂夢：「音樂陪咗我 18 年，我唔想冇咗，我係咁搵邊啲老師可以醫失聲，最後搵到美國一位叫 Seth Riggs 嘅人，佢係 MichaelJackson 嘅聲樂老師，揸住唔夠一萬蚊港紙飛去搵佢，我好幸運上咗兩堂課，把聲就好番！」
譚輝智再玩踩鋼線獲讚「冇晒啲懶音」 唱《抉擇》奪MVP象牙筷子
昨晚表現最亮眼一位是譚輝智，獻唱林子祥的《抉擇》的他再玩踩鋼線，膽生毛的他透露賽前從未唱過這首歌，他笑言：「第一次唱呢隻歌，係睇歌詞而定呢首歌，因為好想唱一首勵志歌，同埋啲歌詞又真係幾易記，多謝霑叔！」以全白Look 上陣、化身白馬王子的輝智，其深情演出獲得一致好評，肥媽大讚：「你今日冇晒啲懶音，同你初初嗰時係兩個樣！」陳慧嫻說：「鍾意你嘅地方係你每一句、每一個字都有諗過點去表達同發音，冇諗到你連個『的』字都有方法令人留意到你係點唱！」周國豐說：「你有樣嘢對參賽者嚟講係可遇不可求，唔係好多參賽者擁有呢樣嘢，就係你好有觀眾緣！」最終輝智斬獲全晚最高分的 92 分，並第四度獲得 MVP，名副其實愈唱愈強！
黃劍文和顏米羔同奪89分
同樣獲得 89 分的黃劍文和顏米羔，昨晚的表現亦相當不俗。黃劍文自彈自唱《仍然記得嗰一次》大晒 Sweet 爆一面，陳慧嫻笑言：「 我對民歌情有獨鍾，你一開始有民歌嘅 Feel 已經好鍾意，突然間 Albert Au（區瑞強）上身咁！」伍仲衡則建議劍文不要再自彈自唱，他笑言：「你唔使次次彈結他，你彈完又唔係好勁嗰啲，唔好彈啦！就咁 C Chord 就出嚟彈咩，你要出嚟要畀人感覺勁先得，呢個係唱歌比賽，彈乜鬼結他！」獻唱《忘盡心中情》的顏米羔亦獲好評，伍仲衡說：「唱得唔錯，尤其是個頭開得好好，鬆咗好多，冇咗以前嗰種挑機感覺。」肥媽說：「米羔叻咗好多，佢以前日日都殺父仇人咁款，唔可以拎 Johnny哥哥（葉振棠）同你比，你有自己 Style，同埋又唱到隻歌嘅感情出嚟。」至於獻唱《星夜星塵》的陳蒨葶表現未如理想，僅獲得全晚最低分的 78 分，最終在累積排名榜包尾，止步 9 強。
《中年好聲音 2》14 強 MV《隆重登場》將於今晚播出《東張西望》後隆重首播
《隆重登場》由評審之一的張佳添重新編曲。《中年好聲音 2》14 強選手古淖文、黃劍文、譚輝智、顏米羔、陳蒨葶、陳燕娜、陳俞霏、王玥、林若盈、劉威煌、沈宗賢、鄭梓浩、安雅希和劉可，日前齊集電視城古裝街拍攝MV，他們的造型以黑、銀色 Tone 為主，Rock 味甚濃。今次 MV 拍攝難度指數十分高，全長 4 分鐘的 MV 以一鏡到底方式拍攝，MV 的舞蹈由孖八（李俊華）編舞，14 位選手足足用了兩星期時間排練！拍攝當日遇上少少阻滯，皆因當天早上還下着雨，幸好拍攝時停了雨兼出太陽，製作組即把握時機拍攝，14 位選手亦相當爭氣，僅用了 7 Takes 便完成拍攝，表現專業！
「中一生」合體獻聲致敬金庸
明晚適逢是已故武俠文學泰斗金庸先生的百歲生忌，製作組邀來「中一生」周吉佩、李佳、羅啟豪、龍婷、支嚳儀、顏志恒和丁文俊，獻唱多首金庸先生筆下小說改篇的劇集金曲，包括《萬水千山縱橫》、《倆忘烟水裡》、《情義兩心堅》、《始終會行運》、《雪山飛狐》、《笑傲江湖》和《世間始終你好》。此外，14 強「中二生」日前合體拍攝 14 強 MV《隆重登場》，該版本《隆重登場》由評審之一的張佳添重新編曲，正式 MV 將於周一（11 日）晚隆重首播，密切留意！
