側田挑戰《數字人生》畫面震撼 曾揚言「北京三線歌手都好過香港」犯眾怒
側田疫情期間回歸香港市場被網民嫌棄
其實闊別香港樂壇多年的側田，曾2022年回港開演唱會回饋歌迷，不過當時似乎反應麻麻，仲被網民轟「滾返去做三線歌手！」，就連小肥、傳媒人洗白都無效，側田喺會展騷演唱會尾場痛哭講返出道以來的種種「冤屈」！
由初出道講起「公司話有人會搞我」
側田早前宣布搞part2時已大耍悲情牌，2022年底的會展演唱會尾場再出招，首先講返自己細個已經常俾人恰，講返初出道以來的負面新聞，包括被公開脫帽照以及與女歌手林苑同居等緋聞 ，側田表示，當年之所以無回應，係認為好多嘢對得住自己就得，所以唔想回應，又欲言又止地表示：
「廿年前搞我嘅人依家都走晒，你哋明啦！」
側田：「Not everything is about politics, ok？」
後來講講吓，側田開始喊爆表示唔明點解要「做佢」，認為自己已經好低調，不過後尾自己諗通咗，唔鍾意佢嘅人就點都唔會鍾意佢，仲話「Not everything is about politics, ok？」最後側田一於懶理，認為粉絲知佢咩性格，表示自己對呢行又愛又恨，2020年喺泰國搵返初心，而家個人好低調，重點係要對得住自己。
網民：又係你自己話香港搵唔到錢
側田呢番感言在場亦聽到唔少粉絲大叫支持佢的說話，不過好多網民對「Not everything is about politics, ok？」呢句就唔多認同「你生老病死 成個社會體制全部都係politic，點樣唔關事」「又係你自己話香港搵唔到錢」「做明星無PR，認錯都唔肯？」「放棄香港，之後又喊住咁返來，呢條友唔洗識佢都知佢x街」「因果循環」但對於側田歌唱實力，網民認為係無可否定。
當年慘被曹格起飛腳
側田在09年和曹格在香港落酒吧飲酒，離開時因一言不合，曹格竟然當街出拳起飛腳怒打側田，事後警方以「普通襲擊罪」拘捕曹格，最後兩人和解，曹格唔使留案底。
側田曾稱「北京三線歌手都好過香港」遭非議
側田在2010年接受傳媒訪問時，曾經表達過「在北京當個三線歌手，肯定比我現在賺的多十倍。我不明白為甚麼還有人覺得香港市場重要。」惹來網民非議，不過他在北京逗留了3年，難以適應之後低調返港，結果到2016年江蘇衛視節目蒙面唱將才再被人提起。19年再踏紅館之後，就消失至今。
側田昨晚打爆機 挑戰魔王級《數字人生》「我寧願失敗，都好過冇試過！」
說回側田在最新一集《唱錢》「明星版」中的表現，他在賽前更拋下豪言：「我寧願失敗，都好過冇試過！」他最終勇敢挑戰極少人敢碰的Monster Level歌曲、林子祥的《數字人生》。這首長達1分56秒的歌曲不但比一般過關歌長一倍，歌詞更是密集得令人窒息。然而，側田竟以綜合94.1%的驚人高分成功過關，拍子準確度更高達98.1%！過程中，他唱到激動處更直接除衫降溫，而且有八成時間是「瞇埋眼」將歌詞一輪嘴背唱出來，畫面極度震撼。演唱完畢後，全場觀眾及主持均陷入瘋狂，大嗌「好癲」，評審Eric Kwok更搞笑表示：「真係只有呢隻歌先至配得起你。」
側田自爆最驚唱哥哥金曲 全靠機械腔過關
雖然側田在《數字人生》中表現神勇，但他坦言全晚最令他「驚豬」的，反而是張國榮（哥哥）的名曲《風繼續吹》。他解釋：「呢隻歌我練咗好耐」，因為歌曲的Free Tempo（自由節奏）極難掌握，非常考驗歌手功力。評審Eric Kwok亦補充：「佢難在音同音之間會扭吓扭吓。」結果側田開唱僅半分鐘，音準bar已跌穿一半，嚇得他急急變換唱法，以近乎「機械腔」的方式驚險捱過關，與挑戰《數字人生》時的揮灑自如形成強烈對比，場面相當搞笑，也足證他為了節目做足準備，對每首歌都認真對待。
側田遇強愈強 全晚表現如開演唱會
側田全晚表現猶如一場迷你演唱會，最終更為家庭觀眾成功爭取到30,000港元現金獎。他由Level 1的《分分鐘需要你》一直唱到Level 8的《命硬》，綜合表現呈現出「遇強愈強」的趨勢，歌曲難度愈高，他反而發揮得愈好，盡顯頂級唱功。例如在挑戰Level 2古巨基的《天才與白痴》時，Eric Kwok已明言歌曲拍子變化多端，高難度位甚多，但側田仍以高達98.4%的拍子準確率輕鬆過關，綜合成績亦有97.4%。這種超強的節奏感，也為他最終能完美駕馭《數字人生》這首魔王級歌曲埋下伏筆，證明他事前做足功課，絕非「揸流攤」。
網民洗版式激讚「樂壇欠側田一個交代」
節目播出後，側田的「神級」表現隨即引爆網上討論區及社交媒體，網民一面倒洗版式給予好評，直指他的實力不容置疑。大批網民留言激讚：「今集好睇到癲」、「根本就玩住嘢都會Win」、「《數字人生》過到關，勁！」、「全家人喺度大嗌」、「睇到心都跳埋出嚟」、「回憶返晒嚟，正」。更有不少人為他感到不值，高呼：「樂壇欠側田一個交代」、「超級實力派歌手」、「應該沒有人可以超越他了」。這股熱潮更意外引發「搶飛潮」，不少觀眾紛紛表示：「勁呀，側田打爆機，即刻想買佢演唱會飛呀」，足證其實力派歌手的魅力依然強勁。
