中年好聲音2｜劉可《忘記他》跳唱張佳添大讚「呢碟牛河愈食愈想食」
今集對戰組合如下，動感歌曲組別如下：
《忘記他》劉可（91分） VS《信者得愛》陳蒨葶（85分）
《雨中感嘆號》劉威煌（82分） VS《淑女》顏米羔（94分）
情感歌曲組別：
《愛我的人和我愛的人》陳燕娜（83分） VS《領悟》梁浩賢（84分）
《有一種悲傷》黃劍文（84分）VS《我要快樂》王學琳（82分出局）VS《背叛》沈宗賢（86分）
《不了情》王玥（82分） VS《我應該》鄭梓浩
劉可挑戰動感歌曲《忘記他》放飛自我
每次出場均令人有驚喜的劉可再有新搞作，擅長抒情歌的他挑戰動感歌曲《忘記他》，以灰色西裝上陣的他在台上放飛自我，演唱時扭扭吓之餘又做出得戚樣，鬼咁風騷！張佳添笑言：
「呢碟係乾炒牛河嚟，黑鼆鼆格衰衰咁，點知食落好味又飽肚，愈食愈想食，你完全唔似任何一個藝人，你嘅拍子感、聲線同埋態度加埋就係一碟乾炒牛河，呢個就係你嚟。」
周國豐則說：「第一次聽到有人畀女飛咗之後係咁開心，《忘記他》係講畀女飛架嘛。」
製作組實現重病Fans願望 全場派心心
劉可演出過後，婉婉透露現場來了一位因患癌即將要接受化療的劉可粉絲，該名粉絲心願是希望能夠現場欣賞劉可演出；製作組除為該名粉絲實現願望，婉婉並着全場所有人做心心手勢為該名粉絲打氣，劉可亦在台上感性說：
「好高興喺《中年好聲音 2》有鍾意我同支持我嘅人，希望呢位病人可以盡快康復，請大家畀最熱烈嘅掌聲佢。」
陳蒨葶唱鄭秀文《信者得愛》邊唱邊除衫
兩位女將陳蒨葶和王玥的演出同樣搶焦。獻唱天后鄭秀文《信者得愛》的陳蒨葶，以 Oversize 黑色外套蒙頭上陣大晒神秘感，演出期間再慢慢除去外套又 Rap又跳，拉高全場氣氛，肥媽大讚：「真係好 Sammi（鄭秀文）呀，連個樣都似。」
「三孩之母」王玥穿上旗袍化身上海歌女獻唱《不了情》
王玥則穿上旗袍化身上海歌女，身形 Fit 爆的她完全不像三孩之母，保養得宜；王玥大晒靚聲深情獻唱《不了情》，評判陳慧嫻聽畢說：「你嘅聲音好適合呢隻歌。」張佳添則說：
「好鍾意你嘅音色，你今日把聲好好聽，最後一段『忘不了』，感情滲晒出嚟。」
