談及呂麗君：

「有啲人天生性格，到死都唔會改！」

「平時我諗嘢0.1秒就做決定，我都諗咗分幾兩分鐘，我都係為咗我對仔女保留返一啲尊嚴。」

「李家超曾講過『害人之心不可有，不過防人之心不可無』，我都要防。我希望記者會後有人會收斂啲。」

「我做嘢都係今日留一線，他朝好相見，我更加唔會趕盡殺絕任何人，唔止係呂小姐，任何人都唔會。」

忽然推介《愛回家》『食屎陳師奶』

「唔知大家有無睇《愛回家》？冇睇你哋有啲失敗，我晚晚食飯無嘢做就睇《愛回家》⋯⋯」原來大劉係想形容商場入面偷拍他與呂麗君的師奶：「《愛回家》裡面有個角色叫『食屎陳師奶』，我唔理佢有冇食屎、係咪陳師奶，總之當時見到有個師奶影我相，我無嬲佢，佢啲人層次係咁我唔會嬲佢，但當我見到佢相機影到呂麗君即係呂姵霖我就嬲！ 」

回應都巿傳說：

「我有諗過都絕子絕孫呀！」

「我谷咗氣好耐，話塞春卷呀、乒乓波、網球呀，點樣鬧人呀，摑人兩巴、人哋喊呀，即刻攞張支票掟埋塊面度，我都隨身唔袋支票嘅。」

「乜嘢都有人作，啲人唔抵得我搵到少少錢，多幾個女朋友。」

「遲啲唔係話我塞人，係話我鍾意俾人塞㖭，乜都得㗎。」

承認有助養女明星：

「有啲真係有助養，但唔係全部，值得我贊助同支持，我就會做，唔代表個個都有。」

「千祈唔好以為我畀個手袋，就可以大家出嚟執番劑喎，執番劑涼茶就可能有。」

「我諗我依家肯去執呀，排隊排到黑龍江！講笑啫，我依家行路，連地下有張銀紙都執唔到呀。」

大劉劉鑾雄否認甘比不開心：點值得啫？

記者會召開前，已聲明不准拍片，只能夠拍照和錄音，所以記者的手提電話均被公關收走，現場準備了不少防疫消毒用品，又為記者準備了蒸餾水，而甘比妹妹Pinga亦有在場幫手。大劉於早上10時45分現身時，穿著一身寶藍色外套加運動褲，坐下後拿著網上有關他和呂麗君的報道翻閱，表情嚴肅，被記者問到點評價呂麗君，他直言唔方便comment，原因係如果真係講，講七七四十九日都講唔完，大家就要喺度講到紮營，至於甘比有冇為這件不開心？他回答：「點值得啫？佢知咩事！」

談及財產處理：

「我寧願全部派晒出去，As a gift。我曾經同律師講，我寧願送咗出去畀錯人，都唔想畀一啲天下間極壞極壞極壞嘅恐怖份子。」

開個人爆料頻道：

「我真係想開個平台，將我見到嘅不平等嘅野講出嚟，但依家啲黑客真係好厲害，咩人都有，我真係好驚。」

The ONE大廈因李嘉欣而命名？

「我私人從來冇諗過無論大廈名叫做『The ONE』，係我個仔改，第一個英文好『水皮』，個稿係人哋交嚟叫我用祕書去登，借個祕書呃個『老襯』。」

罕有提及42歲大仔劉鳴煒：最開心佢好肯做善事

大劉又特別澄財產處理方面的問題，他擔心很多人會誤會「陳凱韻與家人」中，所指的「家人」只係指他的子女，他澄清「家人」就係除了陳凱韻的3個細路，仲有他其他家人，包括呂麗君的仔女，可能亦包括寶詠琴的仔女，他表示不想外人誤會他所有身家都被陳凱韻全部奪取，他說：「講真，我最大個仔今年都42歲，就嚟43歲，到後來呂麗君同陳凱韻生，佢都係最大，佢除咗讀書叻，都好肯好肯做好多善事，呢個係最開心。」

因陳凱韻媽媽捐腎而與陳凱韻結婚？

「我要換腎都搵個後生啲啦，60歲人仲要搵個老腎去換。」

談及「燈神」蕭若元造謠：

「有啲人好鍾意利用網絡，去歌頌自己、去踩人！」

「我好諒解蕭若元，佢搵到食使乜咁吖，如果我有一日要喺平台咁呃like呀，我就大乜X鑊啦！」

稱諒解蕭若元：佢搵到食使乜咁吖

大劉自言唔識用智能電話，但都知有大把網絡打手，特別指出「燈神」蕭若元造謠他有躁狂症，他表示記憶中只和對方見過一次面，沒有所謂十幾次，他也沒有躁狂症，只有是創傷後遺症，不過大劉表示好諒解對方蕭若元，因此不會要求他收回言論，或採取法律行動，或者叫台灣朋友去探吓佢，認為咁都係益咗佢：「我好諒解蕭若元，佢搵到食使乜咁吖，如果我有一日要喺平台咁呃like呀，我就大乜X鑊啦！」

他又表示：「我今日慶幸都搵到稀粥食，我唔希望我做任何嘢影響我第二代第三代生仔冇屎忽，你聽唔聽得明呢句說話呀，有啲人好慘架，為咗搵食，男人賣籮柚又有，女人出賣肉體又有，全世界都有。我今日都好吖，慶幸自己勤勤力力，又借我外母15萬碌到今日咁，唔敢講搵得到好多，兩餐安樂茶飯食！」

大劉歷年金句多多堪回味

大劉當年曾公開指責呂麗君：

「面皮厚過恐龍皮，多年來「呃呃氹氹」總共20幾億元。」

又稱不會向對方追回送出的Hermès手袋：

「我收番任何一個包包就絕子絕孫」

大劉跟甘比結婚後多次公開示愛：

「甘比是我最後一個女人」

「現在就算有100個靚女在我面前，我都無動於衷」

「她從來都不是物質主義的人，亦沒有要求過我買任何禮物，或者零用錢」

談人生哲理：

「是非只有時勢，公道不在人心」

千禧年代，有報導指大劉愛將凌緣庭曾與鄔友正拍拖，大劉陪對方開記招澄清：

「有人當正自己係華倫天奴⋯⋯個細佬——華倫地牢！」

劉鑾雄講投資：

「人性係貪嘅，包括我在內，但我寧願循序漸進，好過一鋪清袋。」

「我想大部份的香港人，都低估了我的智慧。」

兒子劉鳴煒也有金句

不但大劉金句連連，連其兒子劉鳴煒也曾講了一些令人留下深刻印象的金句，劉鳴煒在2015年時，曾教年輕人買樓「睇少啲戲、去少啲日本」，等樓價跌就可以入市，當時被不少網民轟他「成功靠父幹」、「不食人間煙火」，之後大劉就曾為兒子平反，指「今日的年青人只識怨天尤人，他們不是『掂地』，而是『離地』。」