吳若希老公生日被放飛機 老婆開工仲要連環暗串兼「詛咒」

老公生日老婆唔喺身邊 吳若希早有準備連送2「詛咒」

早前是吳若希老公Alex的38歲生日，而作為老婆的當日有工作在身要出席TVB新劇《奔跑吧!勇敢的女人們》開鏡拜神，撞正係老公正日生日，Jinny話將時間奉獻畀男主角蕭正南，佢仲鬼馬咁講：

「祝我老公年年有今日，開開心心，每日都好似冇老婆喺身邊咁自由。」

但原來Jinny都有為老公送上生日禮物，Alex事後亦有將禮物在社交平台上分享——吳若希送的禮物竟然是2本書，而書名分別是《老公怎麼還不去死》，以及《無能老公圖鑑》，睇到一眾網民都唔知畀咩反應……

吳若希急留言澄清氹老公

而送上超特別禮物的吳若希，亦在老公的帖文下留言檢更為自己送上的「詛咒」解畫：

「我唔係真係想你死，我希望你長命百歲，當我老嘅時候可以幫我推輪椅！」

她又搞笑加多句：「就算你推我落山都ok！」迅速冧番掂老公！

吳若希多次數臭老公 大叫老公「收聲」

吳若希在2017年與澳門闊少何兆鴻（Alex）結婚，育有一子一女。2人結婚6年，吳若希多次在節目中數臭老公。早前上網台節目《絲打圍爐》擔任嘉賓時，自爆曾經因為老公經常打機，而「掟爛晒啲電腦」，仲「燒咗前度送老公嘅頸巾」。其實吳若希已經唔係第一次公開鬧老公，曾經在《姊妹淘》節目中大爆曾經在現任老公一度分手，當時曾經上對方屋企大鬧：

「嗰陣時我上咗佢屋企打爛晒所有嘢，包括電視、魚缸、花樽、床。因為佢換咗屋企個密碼鎖，即係擺到明要隔開我啦，以後諗住唔見我啦。跟住我就搵咗開鎖佬上去爆咗佢屋企個鎖。」