吳廷燁 親子好去處

【超級孝順仔】58歲吳廷燁 半山搬公屋照顧93歲媽媽

娛樂

廣告

《鐵探》中,悍匪山狗(林偉飾)被擊斃後,劇集即刻有新角色加入,就係由吳廷燁飾演嘅幕後大佬營長!入行多年嘅吳廷燁於劇中殺氣登場,非常矚目!然而,現實中嘅佢其實係個超級孝順仔!

撰文:東方新地|圖片:微博、劇照、新傳媒圖片庫

吳廷燁演黑幫殺氣超入骨

現年58歲嘅吳廷燁原來同梁朝偉丶周星馳及吳鎮宇係同期TVB藝員訓練班出身,雖然時至今日其發展唔及三位影帝,但至少入行至今所演出過嘅角色無數,工作長做長有,而觀眾對佢亦有深刻印象!

最近係《鐵探》出場嘅吳廷燁演黑幫頭目,一出場就有唔少大頭特寫,其中喺暗黑房間入面幾個抽煙鏡頭,最為突出,皆因即使零對白、只係吞雲吐霧,再加上兇惡眼神,已經完全演活出黑社會大佬嘅懾人氣勢!

據知,今次係吳廷燁事隔36年重返TVB拍劇,之前佢就去過亞視發展,之後再離開亞視決定北上闖一闖,結果咁就十幾年。喺亞視期間,吳廷燁參演過《洪熙官》、《精武門》及《法網群英》等劇集,而角色獲得觀眾喜愛!

單身多年為咗佢?

不過,講到最印象深刻嘅就緊係1998年拍攝嘅《我和殭屍有個約會》啦!《我》中,吳廷燁飾演殭屍「堂本真悟」,而且仲與飾女殭屍「山本未來」嘅張文慈有感情線!

據知,張文慈更曾經公開表示:「如果第時大家都未結婚,可以考慮一齊!」吳廷燁亦表示對張有好感!當時有情者透露:「Pinky(張文慈)同壽仔好friend,以前拍劇,收工梗送Pinky返屋企,但因為大家都唔主動,又驚冇咗呢個朋友,所以冇行多一步,但佢哋依家仲keep住聯絡,好關心大家!」

直至2004年,張文慈遇上交通意外,吳廷燁就咁啱經過救人,Pinky其後公開答謝對方幫忙,而男方反笑言:「希望張文慈可以相伴一晚。」不過之後Pinky重申,二人只是朋友關係,雖然一直有保持聯絡,但從來冇拍拖,亦知男方只想照顧年長嘅媽媽,所以選擇唔拍拖搵女朋友!

超級孝順仔

講起吳廷燁媽媽,原來已經年屆90幾歲高齡,加上視力唔好,所以為咗方便照顧媽媽,吳廷燁放棄原本租住嘅半山大屋,特意搬到公屋同媽媽同住,一有時間就會煮飯畀媽媽食,而吳廷燁更曾坦言:「以前佢照顧我,依家我照顧返佢!」,認真係一位孝順大暖男!

吳廷燁搬返去黃大仙鳳德村公屋,唔使工作,就會返屋企陪老人家。然而,作為公眾人物,面對熱情街坊時,佢亦會帶上口罩先至出街,雖然都會被認出,但吳廷燁就笑稱無所謂,因為自己又唔係super star!

圈中人緣極好

吳廷燁同梁朝偉係無綫第11期訓練班同學,兩人亦因此成為老友,經常攬頭攬頸,至今仍不時相約敘舊。曾有指吳廷燁遇上事業樽頸時,梁朝偉就主動喺多部電影中推薦佢參演部分配角,例如《無間道》嘅張Sir和《大魔術師》嘅托子,相當唔話得!

由電影《無間道》拍到去電視劇《無間道》,吳廷燁都係做張sir ,更是電視劇骨幹人物,同羅嘉良及羅仲謙都有唔少對手戲。吳廷燁喺電影《無間道》演高級督察,同劉德華、黃秋生拍住演出,大家一 定記得佢都有正氣凜然一面!