Mayanne 小喇叭｜第一代「奬老」爆昔日幕後趣聞 陳小春被取代之謎

林曉峰入行全靠一條鞋帶

嘉樂憶述當年接到獎門人邀約電話時相當意外，並笑言全靠獎門人自己的口賤才能才得以跳出武師界。談到獎門人當年為何睇中林曉峰，原因竟和張國榮和一條鞋帶有關，林曉峰 說：

「嗰時拍《金枝玉葉》，有一場戲講張國榮先生上樓梯，我做助手跟住後面，當時佢唔知左腳定右腳甩咗鞋帶。拍完嗰場後我哋放 Break，返到嚟個甩嘅鞋帶就調轉咗喺另一隻腳。當時導演嗌完 Roll 機後，我就嗌『咪住，好似唔連戲喎』，大家咪即刻睇番錄影帶：『係喎』。嗰日原來獎門人都喺現場，佢心諗原來呢條𡃁仔都幾上心，就搵佢嚟做嘢啦。」

蘭茜解釋如何由嘉賓變獎老

至於蘭茜擔任獎老的原因，則與玩獎門人遊戲時全情投入「刨西瓜」及「刨粟米」有關。祥仔則暢談當年如何與志偉、洪天明及鄧兆尊夾計，以各人的腳毛及腋窩毛整蠱遲入組的姚樂怡，最後遭樂怡喊打喊殺，十分搞笑。

（圖片來源：TVB）

林曉峰 重演當年點樣馬拉松式開會開到靈魂出竅。（圖片來源：TVB）

「四大獎老」分享電視台收視大戰

四人還大談當年錄影《獎門人》的「宵夜度橋日常」，當年因為電視台大戰，《獎門人》最高峯一星期連播五晚，林曉峰 大方分享了當年的度橋及上班流程日常：「下午三點返嚟開會，一路開到八點五十分。當年我哋就諗咗改歌詞唱啲嘉賓名出嚟，咁每日揸車就要度 18 隻歌，每個嘉賓要有 3 隻，返到去獎門人就會坐喺度問邊隻好笑。然後度度度度到食飯，其實係食唔落架喎。有時做到一點鐘左右收廠，但未完架，喺化妝間再開會，開到三點度，跟住就宵夜架喇，然後再搵地方。記得有一次打風，我哋搵到地方時已天光，成六點幾七點。」

一句撤換初代獎老陳小春！

四人之中，雖然嘉樂被專稱「大師兄」，但原來第一代獎老竟是林曉峰及陳小春，林曉峰 大爆當年嘉樂之所以被「獎門人」曾志偉睇中接小春棒，全因「把口夠賤」！至於為何要換走陳小春，原來係因為曾志偉認為「陳小春唔紅，要換個更紅的」，不過龍虎武師出身的錢嘉樂為了轉型做主持，也下過一番苦功！

曾志偉解釋為何被叫「阿爸」

全集最驚喜部分，是當眾人輪流模仿獎門人時，頑皮的志偉即手持小喇叭走入廠送驚喜，令當時除掉雙鞋跪地扮緊志偉的嘉樂大嗌驚驚。志偉一到埗即扮作氣沖沖搞笑謂：「幾多人打電話畀我呀，問：『你仲唔落去？佢哋踩到你一文不值呀！』」之後眾人瘋狂互窒，混亂間曾展望竟大叫志偉「Daddy」，隨即惹起哄動，志偉反應極快接招謂：「出得街架咩？你話畀大家聽媽咪係邊個？！」

曾志偉親解為何被專稱「阿爸」，志偉說：「阿爸負責畀錢（埋單）架嘛，咁咪叫阿爸咯。」蘭茜聞言即指志偉另一外號是「埋單俠」。另志偉又會親解《獎門人》換主題曲之謎，答案更相當有愛，並與小朋友有莫大關係，欲知詳情？密切留意節目。

（圖片來源：TVB）