彭楚盈白骨案｜葉劉淑儀回憶案發經過暗指自己曾被「架空」零通報
1999年「彭楚盈白骨案」保安局局長角色是零？！
有關「名模彭楚盈白骨案」，牽涉時任政務司司長陳方安生的兄長；在調查層面上，當時理應向當時任職保安局局長葉劉淑儀匯報。2020年7月葉劉淑儀在政黨頻道節目中，接受訪問時提到1999年嘅「彭楚盈白骨案」，當時佢係香港特區政府保安局局長。由於案件涉及時任政務司司長陳方安大哥方曼生嘅女友彭楚盈，屍體化成具白骨頭顱分離，震驚全城。主持特意問葉太當時身處政府內部對此事有多了解，已經脫離政府司局長體制的葉劉淑儀，罕有開腔提及對此奇案的印象及看法。
葉劉淑儀暗指自己被架空
葉太喺訪問中清楚表示，喺1999年案件發生時，佢作為時任保安局局長「一啲都唔知」：「可以講我一啲都唔知，即係當時嘅警方冇向我通報啦，可能佢哋認為，只係一個普通嘅『 死因不明』個案啦！」葉太推測，當時警方可能因為案件牽涉政務司司長陳方安生嘅家人，選擇直接向陳方安生匯報，而唔係透過保安局局長嘅正常渠道通報：
「但牽涉政務司司長嘅家人佢一定知，咁可能就直接向陳太匯報咗啦，咁亦都可能係合理嘅，因為保障私隱啦⋯⋯呢啲咁嘅事，梗係盡量冚得密㗎啦，牽涉到啲高官！」
葉劉淑儀：「我都係睇報紙先知」
葉太提到自己雖然身為時任保安局局長，但對本案都係「睇報紙先知」，反映當時嘅政府運作模式「未必事事逐級上報」，尤其涉及高官私隱嘅敏感事件：
「咁所以政府都唔係每一樣嘢都一級一級報上去嘅，其實當時我哋政府操作嗰個年代冇咁電子化，我哋有嘢提呈上司，係要睇一本一本唔同顏色嘅file，視乎機密程度。」
葉太亦指出，行政長官同其他官員之間溝通，唔一定需要經過政務司司長，顯示政府內部嘅匯報機制有一定靈活性。
對「陳太把柄」揣測的回應
節目中，主持提到「彭楚盈白骨案會唔會畀人用作把柄威脅陳太？」嘅揣測，葉太認為可能性唔大：「我睇就唔會，因為其實香港都好開明，即係你一家咁多兄弟姐妹，有啲人或者破產、有啲人犯法同你無關，呢啲威脅唔到佢（陳太）。」葉太認為香港社會相對開明，個人家人的行為，通常唔會直接影響高官嘅政治地位。相比之下，葉太提到陳太曾涉及的「十成按揭買樓」事件——或者更有可能成為她的把柄（1993年陳方安生擔任布政司年間購買價值780萬位於玫瑰新邨物業，當時傳出佢獲得銀行十成按揭嘅謠言，事件於1995年被報道，當時港英政府亦有釐清陳方安生並無違規。）葉太在訪問中補充話亦有提及此案已經了結，唔再構成威脅。
翁靜晶回應TVB節目處理手法
節目播出後，翁靜晶在個人社交平台發表回應： 「大家都在討論，無線昨晚的調查報道，沒有特別提『彭楚盈艷骨案』的律師。這也是正常的，畢竟主題在於案件。而且，自從某人進駐TVB之後，我是採取敬而遠之態度，絕對不接受訪問或出鏡的。」
翁靜晶直斥方曼生「豈有此理」
翁靜晶未有正面描述方東昇團隊有沒有向她接洽，續稱： 「『艷骨案』當年人神共憤，民女死於非命，高官隻手遮天。方曼生在TVB的節目中，竟然可以講，重新調查這案件是因為「政治」。」最後翁靜晶一句總結：
「當年操控政治的人，不就是你的家族嗎？ 簡直是豈有此理。」
