死有對証｜陳曉華演法醫被韋家雄狂鬧！正能量反擊Mean爆金句 網民Cap爆潛力圖
韋家雄Mean爆金句連環放送
劇中韋家雄飾演的法醫部大佬林琛，出名難相處，對住「菜鳥」陳曉華毫不留情，一開口就狂噴刻薄金句！當陳曉華想參與調查時，他嫌棄對方經驗淺，更粗聲粗氣連環狙擊：「學嘢你就返學啦」、「你做咗超過兩日法醫好耐喇，我做咗廿八年，你睇到嘅嘢我睇唔到咩」、「唔好喺度豬扮人」、「第一日返工就要請食飯？如果聽日唔撈又要請食食飯咁屎忽呀？」句句啜核又到肉，完美演繹職場惡魔上司，令觀眾看得牙癢癢。
陳曉華正能量反擊死纏爛打
雖然被上司瘋狂刁難，但自小立志做法醫的陳曉華未有被嚇窒，反而正能量爆燈，用「笑臉」加「死纏爛打」戰術反擊！當韋家雄禁止她觀看解剖時，陳曉華立即化身小粉絲，笑著說：「我戙開啲唔出聲，唔會阻到你」、「我實習嘅時候你係我偶像」、「唔該你吖！」連環高帽加誠懇眼神，Chur到韋家雄冇晒符，最終無奈屈服，但要求她入解剖室不准出聲。陳曉華將「菜鳥」的傻氣與毅力演得活靈活現，與韋家雄的互動充滿喜感。
陳曉華「面懵心精」整蠱馬貫東
陳曉華的角色看似戇直，其實「面懵心精」！劇中她與衝動火爆的重案組高級警員高俊（馬貫東飾）結下不解之緣。其中一幕馬貫東不慎碌落山坡「拗柴」卻死頂扮冇事，即被陳曉華看穿。她隨即Chok出「無知樣」大嗌：「高 Sir 跳一跳落嚟就扭親，救命呀！」更故意嚇對方：「扭親好大件事，我有個病人之 前跑步前扭親，冇留院觀察，結果兩日後就死咗啦！」嚇到馬貫東臉色大變。陳曉華受訪時透露，為角色做了不少準備，包括閱讀專業文獻，並將角色的強迫症習慣融入生活，令演繹更立體。
網民熱議韋家雄金句：準備Cap圖！
劇集播出後，網民對韋家雄的「Mean爆」演出反應熱烈，認為他的刻薄金句極具潛力。不少人留言表示準備瘋狂截圖：「韋家雄啲對白好正，全部可以做sticker！」、「陳曉華個角色好可愛，畀人鬧都笑笑口好得意。」、「呢對上下靶好有火花，好期待佢哋之後點鬥法！」、「韋家雄啲表情同金句，肯定會變『潛力圖』洗版！」、「終於有套唔係談情說愛嘅劇，查案加搞笑好吸引！」。
